Abaebrania 4

1Nyamuhanga abirituha endagane yʼeriluhuka liwe. Neryo tubahe hakasyabya omuguma gʼũkwʼĩnywe oyukabula eriingira omwʼiluhuka eryo. 2Kusangwa Engulu Yowene moyatũhĩkako ngoko yahĩka kubo; nĩkwa ekĩnywa ekyo bowa mokitetawatĩkyabo kusangwa mobagana erĩkĩrĩryakyo. 3Nĩkwa ĩtwe twĩkĩrĩraya tukingira omwʼiluhuka lya Nyamuhanga; ngoko kĩsakĩre kiti,

Monalahĩrya omwʼihitana lyage nyiti,

Sibendisyingira omo kihugo ekyo aho nangaherebo eriluhuka.

Mwabũga atya nomo emĩbĩrĩ yiwe yanahwa oko mugulu ahangika ekihugo. 4Kusangwa kĩbũgĩre ehandi busana nʼekiro kyʼebirinda kiti, Nyamuhanga mwaluhuka oko kiro kyʼebirinda oko mĩbĩrĩ yiwe yosĩ akola. 5Kandi busana nʼomwatsi oyũ ati, Sibendisyingira omo kihugo ekyo aho nangaherebo eriluhuka. 6Neryo abakangĩrĩrĩbawa Engulu Yowene erĩmbere mobatingira omwʼiluhuka eryo busana nʼerĩtendĩkĩrĩrya. Nĩkwa abandi bakingira omwʼiluhuka eryo. 7Neryo Nyamuhanga akahula kandi ekiro ati, Mũnabwĩre. Enyũma wʼebiro bingi Nyamuhanga mwabũga omo bĩnywa bya Dawĩdĩ ati,

Lero mũnabwĩre, mwamowa omulenge wuwe,

Sĩmũkalaye emitima yenyũ.

8Kusangwa kumbe Yosũa aha abandu eriluhuka lya Nyamuhanga, kumbe Nyamuhanga siangasyahula ekindi kiro enyũma wʼaho.

9Neryo hane eriluhuka busana nʼabandu ba Nyamuhanga eriri ngʼeriluhuka lyʼeSabato. 10Kusangwa oyukingira omwʼiluhuka lya Nyamuhanga naye akaluhuka oko mĩbĩrĩ yiwe, ngoko Nyamuhanga aluhuka oko mĩbĩrĩ yiwe. 11Neryo tuyitsinge kutsibu eriingira omwʼiluhuka eryo. Sihabye omundu oyukagana erĩowa ngoko bakola, nʼeritaluka eriingira mulyo.

12Kusangwa ekĩnywa kya Nyamuhanga kiriho, kandi kinemukola omũbĩrĩ, kandi kĩtwĩre kwilaba omũyalĩ owawite amoya abiri. Kikatsimita erĩhĩka okwʼigaba omutima nʼekĩrĩmu; kandi erĩhĩka okwʼigaba esyonungo nʼomungoso. Kandi kikatoka eritswera erisonda nʼamalengekanĩa gʼomutima. 13Sihali ekĩhangĩkĩre ekĩbĩsamĩre uku Nyamuhanga. Nĩkwa ebyosĩ bisanzukere, kandi biminyikere omo meso wa Nyamuhanga. Kandi twasyayĩbalya ukwʼiye.

Yesu omũhererĩ mukulu

14Tuhambe ndeke emyatsi eyo twabĩrĩkĩrĩrya, kusangwa tuwite omũhererĩ mukulu oko bahererĩ bosĩ, oyo wabirilaba omo lubula, Ye Yesu Mugala wa Nyamuhanga. 15Kusangwa omũhererĩ wetu mukulu oko bahererĩ bosĩ si mundu oyũtetũkwĩra obũlĩge omo bolo-bolo bwetu. Nĩkwa tuwite omũhererĩ mukulu oko bahererĩ bosĩ oyo walengawako omo myatsi yʼemĩsĩndo yosĩ eyikatulengako netu, nĩkwa mwatakola ebibi. 16Neryo tuyitwale hakũhĩ nʼobwĩranda oko kĩtũmbĩ kyʼobwami kya Nyamuhanga, ahali olukogo. Tutoke eribana eriganyira, kandi twangirire olukogo lwʼerĩtũwatĩkya oko mugulu wʼobwaga.

Currently Selected:

Abaebrania 4: KB80

Highlight

Copy

Compare