Enzũko 34

Dĩna na Sekemũ

1Nĩkwa Dĩna, mwali wa Lea, oyo abutira Yakobo, mwayalenderera oko bali bʼomo kihugo ekyo. 2Na Sekemũ, mugala wa Hamorĩ Mũhĩvĩ, omukama wʼekihugo, mwamulolako. Mwamuhamba, mwamwĩmya, mwamuhemula. 3Neryo Sekemũ mwanza Dĩna mwali wa Yakobo yo ndeke, kandi mwanza omwana-muto oyo, neryo mwabũga naye ebĩnywa bitendere. 4Neryo Sekemũ mwabũga na tata wuwe ye Hamorĩ ati, Ũnyĩtahĩraye omwanamuto oyũ eribya mũkalĩ wage. 5Nĩkwa Yakobo mowa kwʼamabĩtsandya Dĩna mwali wuwe. Abagala buwe babya haguma nʼebihangulo biwe omo lũlĩsĩryo, neryo Yakobo mwabya bũkũtũ erĩhĩka okwʼasa lyabo. 6Neryo Hamorĩ ĩse wa Sekemũ mwaya ewa Yakobo erĩkanĩa naye. 7Nʼabagala ba Yakobo mobasa bakalũa omo lũlĩsĩryo babĩowago. Mobasũ sũmana, mobahitana kutsibu, kusangwa amabĩhalya oko Baĩsraelĩ eriteta mwali wa Yakobo kusangwa omwatsi ali ngʼoyũ isialikolawa. 8Neryo Hamorĩ mwakanĩa nabo ati, Omutima wa mugala wage Sekemũ amanza mwali wenyũ. Ngababũlaya nyiti, mumuheye abye mũkalĩ wuwe. 9Kandi tũ taha-tahanaye. Mutuhe bali benyũ, nenyũ mwĩmaye bali betu. 10Nenyũ mwasyĩkala haguma netu. Ekihugo kiri embere syenyũ. Mwĩkale mutundire mukyo, muyibanire mwʼebindu. 11Kandi Sekemũ mwabwira Yakobo nʼabagala babo Dĩna ati, Muleke nyibane erĩsĩmwa omo meso wenyũ, nʼebyo mwasyanzwera, nasyabanabyo. 12Mwahule omũtahyo, nomo byangabya bingi nʼebihembo, nasyabanabyo ngoko mukandimbwira. Nĩkwa mumbe omwana-muto eribya mũkalĩ wage. 13Nĩkwa abagala ba Yakobo mobasũ bĩrya Sekemũ na Hamorĩ tata wuwe omo matebo, mobabũga batya kusangwa ĩnĩabĩrĩtsandya mwali wabo ye Dĩna. 14Neryo mobabwirabo bati, Sitwangatoka erikola ekĩ, eriha mwali wetu oko yutabwene; kusangwa ekyo nĩʼlolo kwĩtwe. 15Hali kiguma ekyangatuma ĩtwabalĩgĩra. Mwamasonda eribya nga twe, obuli mulume kwĩnywe ĩnĩabanĩbwa. 16Neryo twasyabaha bali betu, netu twasyĩmya bali benyũ, netu twasyĩkala nenyũ, neryo itwabya kihanda kiguma. 17Nĩkwa mwamatĩndatowa erĩbanĩbwa, neryo ĩtwĩmya mwali wetu itwagenda ewetu.

18Ebĩnywa byabo mobyatsemesya Hamorĩ, na Sekemũ mugala wa Hamorĩ. 19Neryo omũlwana oyo mwatalinda erikola omwatsi oyo, kusangwa mwatsema busana na mwali wa Yakobo. Sekemũ naye, abya akengĩrwe kwilaba abosĩ bʼekĩtũnga kya tata wuwe. 20Neryo Hamorĩ na Sekemũ mugala wuwe mobasa oko kyaganda kyʼomũyĩ wabo, mobakanĩa nʼabalume bʼomũyĩ wabo, bati, 21Abalume aba nĩ bĩra betu. Neryo tuleke bĩkale omo kihugo, batundire mukyo. Kusangwa ekihugo ni kinene kinatolerebo. Twĩmaye bali babo eribya bakalĩ betu, netu tuhebo abana-bato betu. 22Nĩkwa hali kiguma kisa kyasyaleka abalume aba ĩbĩkala netu, eribya kihanda kiguma, bati obuli mulume omo katĩkatĩ ketu abanĩbawe, ngoko babwene. 23Ebihangulo byabo nʼebindu byabo, nʼesyonyama syabo sibyendisyabya byetu kwehĩ? Tũlĩgĩrebo, neryo basyĩkala haguma netu. 24Neryo abalume bosĩ bʼomũyĩ mobahũlĩkĩrĩrya Hamorĩ na Sekemũ mugala wuwe. Obuli mulume oyũkalĩre, mwabanĩbwa, nʼabosĩ bʼomũyĩ wuwe.

Erĩkwa lyʼabandu ba Sekemũ

25Neryo mokyabya enyũma wʼaho oko kiro kyʼakasatu, omugulu babya nʼobwagalĩ, ababiri bʼoko bagala ba Yakobo, Sĩmeonĩ na Lawĩ, abagala babo Dĩna, mobĩmya, obuli mundu omũyalĩ wuwe, mobahĩka oko mũyĩ mo basombĩ, mobĩta abalume bosĩ. 26Mobĩta na Hamorĩ na Sekemũ mugala wuwe omo mũyalĩ, mobatwala Dĩna erĩmũlũsya omo nyũmba ya Sekemũ, neryo mobayigendera. 27Neryo abandi bagala ba Yakobo mobasa eriya embũlũlĩ, mobahũnga omũyĩ, kusangwa batsandaya mwali wabo. 28Mobĩmya ebihangulo byabo, nʼesyonde syabo, nʼesyopunda syabo, nʼebyosĩ ebyabya omo mũyĩ, nʼebyabya omo malima, 29nʼobũsokĩ bwabo bosĩ, nʼabana babo bosĩ nʼabakalĩ babo, mobatwalabo mo banyegwa nʼerĩhũngwa, nʼebyosĩ ebyabya omo manyũmba. 30Neryo Yakobo mwabwira Sĩmeonĩ na Lawĩ ati, Mwabĩrĩnyagalĩranĩa, mukaleka inakumba nabi oko ndũnĩ syʼekihugo, nʼoko Banya Kanana, nʼoko Baperĩsĩ, kandi, eriganza lyetu nĩ ĩke, basyakuma-kumana busana nage nʼerĩnyĩta. Nage nasyaherĩbwa, ĩngye nʼekĩtũnga kyage. 31Nabo mobabũga bati, Angakolĩre mwali wetu ngʼomũmalaya kwehĩ?

Currently Selected:

Enzũko 34: KB80

Highlight

Copy