Enzũko 33

Yakobo na Esaũ bakalolanako

1Neryo Yakobo mwasumba ameso wuwe mwatungerera, neryo lebaya Esaũ akasa, haguma nʼabalume magana ani. Neryo mwagabira abana bʼuku Lea, nʼuku Rakelĩ, nʼoko babegerya babiri. 2Neryo mwahĩra ababegerya nʼabana babo embere, na Lea nʼabana buwe omo katĩkatĩ, na Rakelĩ na Yosefũ oko ndũlĩ. 3Naye mwasoka embere syabo, neryo mũnama oko kitaka esyongendo sirinda, erĩhĩka hakũhĩ na mugala wabo. 4Na Esaũ mwatibita erĩhĩndana naye, mwamuwako, nʼeriwa oko bĩkya biwe, nʼerimulyatsirira. Neryo mobaliriranako nʼemĩsonĩa. 5Neryo Esaũ mwasumba ameso wuwe mwalangira abakalĩ nʼabana, mwabũga ati, Abali haguma nawe ni bahi kwehĩ? Na Yakobo mwabũga ati, Ni bana abo Nyamuhanga abiriha omugombe wawe omwʼiganyira liwe. 6Neryo ababegerya mobasa hakũhĩ haguma nʼabana babo, nabo mobũnama. 7Na Lea nʼabana buwe nibya mobayĩtũnda hakũhĩ, mobũnama. Enyũma wʼaho Yosefũ na Rakelĩ mobasa hakũhĩ, nabo mobũnama. 8Neryo Esaũ mwabũga ati, Emilondo eyo ngabĩhĩndana nayo nĩ yakĩ kwehĩ? Neryo Yakobo mwabũga ati, Eribana erĩsĩmwa omo meso wʼomukama wage. 9Na Esaũ mwabũga ati, Ngwite bingi, mugala wetu. Uleke ebyo uwite bibye byawe. 10Na Yakobo mwabũga ati, Iyihi, ngakusaba, nyiti, lino namabya nabiribana erĩsĩmwa omo meso wawe, wangirire oluhembo lwage omo byala byage; kusangwa nabirilangira obũsũ bwawe ngoko mundu akalangira obũsũ bwa Nyamuhanga, nawe wabirinyitsemera. 11Ngakũbũlaya, wangirire oluhembo lwage olo gulyaleterawa, kusangwa Nyamuhanga abirinyikolera omo lukogo, nʼakandi kusangwa ngwite bingi. Neryo Yakobo mwamuhatikana, naye mwĩmyabyo. 12Neryo Esaũ mwabũga ati, Twĩmaye enzira tugende, nage nasyagenda embere syawe. 13Neryo Yakobo mwamũsũbĩrya ati, Omukama wage anasĩ abana ko bali bolo, nʼebihangulo nʼebĩhyo ebiri haguma nage biwite ebyana. Byamabingwa kutsibu, ibikandihola. 14Ngakulembalemba nyiti, mukama wage usoke embere syʼomugombe wawe, nage nasyasondolabo bolo-bolo, ngʼolulengo lʼolugendo lwʼesyonde esiri embere syage nʼoko lulengo lʼolugendo lwʼabana, erĩhĩka aho nasyeya omukama wage eSeĩrĩ. 15Neryo Esaũ mwabũga ati, Uleke lino ngakũsĩgĩre oko bandu abali haguma nage. Yakobo naye mwabũga ati, Busana nakĩ kwehĩ? Uleke nyibane erĩsĩmwa omo meso wʼomukama wage. 16Neryo Esaũ mwasubula ekiro ekyo omo nzira yiwe erĩhĩka eSeĩrĩ. 17Yakobo mwahongoka eriya eSũkotĩ, mwayĩhĩmbĩra enyũmba, kandi mwahĩmba otutalikirire busana nʼesyonde siwe. Kyaleka erĩna lyaho iryahulwa mo Sũkotĩ.

18Nĩkwa Yakobo mwahĩka buholo oko mũyĩ wʼeSekemũ owali omo kihugo kyʼeKanana omugulu asa akalũa ePadanĩ-aramũ. Mwalalirira omo kyaswa kyʼomũyĩ. 19Neryo mwagula ekihande kyʼekitaka aho ahanda ehema yiwe, omo byala byʼabana ba Hamorĩ, ĩse wa Sekemũ, oko bihande byʼekĩtsĩpa erĩgana. 20Neryo mwahĩmbaho ekiherero, mwalukaho mo Elĩ-elohe-ĩsraeli. Kiti, Nyamuhanga, Nyamuhanga wa Ĩsraelĩ.

Currently Selected:

Enzũko 33: KB80

Highlight

Copy