Enzũko 32

Erĩhĩndana lya Yakobo na Esaũ

1Neryo Yakobo mwayigendera omo nzira yiwe, nʼabalaĩka ba Nyamuhanga mobahĩndana naye. 2Omugulu Yakobo alola kubo mwabũga ati, Oyũ ni mulondo wa Nyamuhanga. Mwahula erĩna lyʼaho mo Mahanaĩmũ.

3Neryo Yakobo mwatuma abakwenda buwe embere siwe uku Esaũ mugala wabo omo kihugo kyʼeSeĩrĩ, kye kihugo kyʼeEdomũ. 4Mwahanabo ati, ko mwasyabũga mutya oko mukama wage Esaũ: muti, Omugombe wawe Yakobo amabũga ati, Nabiribya mubunga haguma na Labanĩ erĩhĩka lino. 5Kandi ngwite esyonde, nʼesyopunda, nʼesyombene, nʼabagombe bʼobulume nʼabʼobũkalĩ, neryo namabatuma eribwira omukama wage, inabana eriganyira embere syʼameso wawe. 6Abakwenda abo mobasuba ewa Yakobo, bati, Motwahĩkĩre uku mugala wenyũ Esaũ, kandi anemwasa erĩhĩndana nawe, nʼabalume magana ani bali haguma naye. 7Neryo Yakobo mubaha kutsibu, mwakwa buba, neryo mwagaba abandu ababya haguma naye, nʼebihangulo, nʼesyonde, nʼesyongamia, mwatwasyo mo milondo ĩbĩrĩ, 8mwabũga ati, Esaũ amasa akĩta omulondo muguma akaswĩryago, neryo ogundi mulondo owakasĩgala asyabala.

Erisaba lya Yakobo

9Neryo Yakobo mwabũga ati, Uwe Nyamuhanga wa tata wage Abrahamũ, na Nyamuhanga wa tata wage Ĩsaka, uwe Mwami Mukulu, oyo wambwira ati, Usube oko kihugo kyawe, nʼoko kĩtũnga kyawe, nasyakukolera ebibuya, 10sinyitolere nʼahake oko bibuya byawe byosĩ nʼokwʼitendiregula lyosĩ eryo wakangaya omugombe wawe. Nasoka eYorodanĩ eyĩ nʼomũtso musa, na lino nabiribya milondo ĩbĩrĩ. 11Ngakusaba, ũnyĩlamaye omo byala bya mugala wetu, omo byala bya Esaũ, kusangwa ngamubaha, isyasa nʼerĩnyĩta, nʼabokoyo haguma nʼabana. 12Nawe mowabũga uti, Kwenene nasyakukola ndeke, nʼeriyira abana bawe ngʼemisege yʼomo ngetsi, eyite yangatoka eriganzwa busana nʼobungi.

Yakobo akasangana na Esaũ

13Neryo Yakobo mwagotseraho ekiro ekyo, neryo mwĩmya oluhembo oko bindu abya nabyo bibye luhembo busana na mugala wabo ye Esaũ. 14Mwĩmya esyombene magana abiri nʼesyombaya makũmĩ abiri, nʼesyombũlĩ magana abiri, nʼesyombangale makũmĩ abiri, 15nʼesyongamia esikakamawa makũmĩ asatu nʼebyana byasyo, nʼesyonde makũmĩ ani, nʼesyondabana ĩkũmĩ, nʼesyopunda syʼobũkalĩ makũmĩ abiri nʼebyana ĩkũmĩ. 16Neryo mwahĩrabyo omo byala byʼabagombe buwe, obuli kihangulo aho wakyo, neryo mwabũga nʼabagombe buwe ati, Musoke embere syage, mũhĩre omwanya omo katĩkatĩ kʼobuli kihangulo. 17Neryo mwategeka owʼerĩmbere ati, Omugulu Esaũ mugala wetu akahĩndana nawe, amakũbũlya ati, Uli mundu wandi kwehĩ? Ukagahi kwehĩ? Nʼesiri embere syawe ni syandi kwehĩ? 18neryo ĩwabũga uti, Ni syʼomugombe wawe Yakobo. Ni luhembo lukatumawa oko mukama wage Esaũ. Neryo lebaya, naye ane enyũma syetu. 19Neryo mwahana owʼakabiri nʼowʼakasatu nibya, nʼabosĩ ababinga ebihangulo, ati, Ko mwasyabũga mutya na Esaũ mwamubandana. 20Nʼakandi mwasyabũga muti, Lebaya, omugombe wawe Yokobo ane enyũma syetu. Kusangwa mwabũga ati, Nasyamwolobya omo luhembo olukatangirira embere syage, nʼenyũma wʼaho nasyalangira obũsũ buwe. Kwamũhwa asyanyĩsĩma. 21Litya oluhembo molwasoka embere siwe. Naye mwagotseraho ekiro ekyo omo kilaliriro.

Yakobo akahambana nʼomũlaĩka

22Neryo mwahangana ekiro ekyo mwĩmya abakalĩ buwe babiri, nʼababegerya buwe babiri, nʼabana buwe ĩkũmĩ nʼomuguma, mwasoka oko kisokero kyʼeYabokĩ. 23Mwĩmyabo mwasokyabo olũsĩ mwasokya nʼebyosĩ abya nabyo. 24Neryo Yakobo mwasĩgala ĩyowene, nʼomundu muguma mwahambana naye erĩhĩka oko bũtũkũ erikya. 25Neryo omugulu alangira kwʼate angamũkĩnda, omũlaĩka oyo mwatũla oko nyonga yʼekihinga kiwe. Enyonga yʼekihinga kya Yakobo moyahenyuka, omugulu ahambana nʼomundu oyo. 26Naye mwabũga ati, Undeke, nyigende, kusangwa bukakya. Neryo Yakobo mwabũga ati, Sindiendikulegulako erigenda ute wanzumula. 27Neryo mwamũsũbĩrya ati, Erĩna lyawe uwendi kwehĩ? Naye mwabũga ati, Ĩngye Yakobo. 28Neryo omundu oyo mwabũga ati, Erĩna lyawe siryendisyaswahulwa mo Yakobo, nĩkwa Ĩsraelĩ, kusangwa wabirirengana na Nyamuhanga nʼabandu, nawe wamasĩnga. 29Na Yakobo mwamũbũlya ati, Ngakũbũlaya unyibwire erĩna lyawe. Naye mwabũga ati, Busana nakĩ ũkabũlaya erĩna lyage kwehĩ? Neryo mwamutsumuliraho. 30Neryo Yakobo mwalukaho mo Penũelĩ, kusangwa abũga ati, Twamalolanako na Nyamuhanga ameso nʼawandi, nʼengebe yage yamalamĩbwa. 31Eryuba molyahuluka ukwʼiye omugulu asokera ePenũ elĩ, neryo mwahinira oko kihinga kiwe. 32Kikaleka abana ba Ĩsraelĩ ibatalya Omũ sĩsa owali oko nyonga yʼekihinga, erĩhĩka na mũnabwire, kusangwa mwatũla oko nyonga yʼekihinga kya Yakobo oko mũsĩsa wʼendungu.

Currently Selected:

Enzũko 32: KB80

Highlight

Copy