Enzũko 31

Yakobo akasuba ewabo eKanana

1Neryo Yakobo mowa ebĩnywa byʼabagala ba Labanĩ bakabũga bati, Yakobo abiriheka ebindu byosĩ ebyabya bya tata wetu. Kandi obuteke bosĩ obũ abiribanabo omo bindu bya tata wetu. 2Neryo Yakobo mwalangira obũsũ bwa Labanĩ, isibukiri ngʼerĩmbere. 3Neryo Omwami Mukulu mwabwira Yakobo, ati, Usube oko kihugo kyʼabotata wawe, nʼoko kihanda kyawe. Nage nasyabya haguma nawe. 4Neryo Yakobo mwatumira uku Rakelĩ na Lea ati, base omwʼirima ahali ekihangulo kiwe, 5mwabwirabo ati, Namalangira obũsũ bwa tata wenyũ, sibukiri ũkwʼĩngye ngʼerĩmbere; nĩkwa Nyamuhanga wa tata wage abiribya haguma nage. 6Nenyũ mũnasĩ ngoko nabirikolera tata wenyũ nʼamaka wage gosĩ. 7Na tata wenyũ abirinyiteba, abiribindingula oluhembo lwage lo ngendo ĩkũmĩ; nĩkwa Nyamuhanga mwatamuleka akanyĩta. 8Anabya abũga ati, Esyʼebitanga syasyabya luhembo lwawe; neryo esyombene syosĩ mosyabuta esyʼebitanga. Anabya abũga ati, Esyʼamalemba syasyabya luhembo lwawe, ekihangulo kyosĩ ikyabuta esyʼamalemba. 9Litya Nyamuhanga abirisagulabyo tata wenyũ, nʼerimbabyo. 10Enyũma wʼaho omugulu ebihangulo byahaka, monasumba ameso wage, monalangira omo nzolĩ, neryo lebaya, esyombaya esyasamba oko kihangulo mosyabya syʼamalemba esyʼebitanga, nʼesyʼebinyenze. 11Neryo omũlaĩka wa Nyamuhanga mwabũga nage omo nzolĩ, ati, Yakobo; nage monabũga nyiti, Nandi hano. 12Neryo mwabũga ati, Sumba ameso wawe lino; ulangire, esyombaya syosĩ esikasamba oko kihangulo ni syʼamalemba, nʼebitanga, nʼebinyenze. Kusangwa nabirilangira ebyosĩ ebyo Labanĩ akakukolera. 13Ĩngye indi Nyamuhanga wʼeBetelĩ, aho wahakabaya endũyĩ yʼamagũta, aho wanyĩlahĩrayako. Lino uhangane, Ũlũe omo kihugo ekĩ, Usube omo kihugo ekyo wabutawamo. 14Rakelĩ na Lea mobamũsũbĩrya mobamubwira bati, Hakine kihande kutse mwandu busana netu omo nyũmba ya tata wetu kwehĩ? 15Sialituganza ngʼabʼehandi kwehĩ? Kusangwa abĩrĩtũgũlya, abirirya omũtahyo gʼũkwʼĩtwe ekyo kyahwere. 16Kusangwa ebindu byosĩ ebyo Nyamuhanga abirisagula tata wetu, ebyo ni byetu nʼabana betu. Lino, ebyosĩ Nyamuhanga abirikubwira, ukolebyo.

17Litya Yakobo mwahangana mwahĩra bagala buwe nʼabakalĩ buwe oko syongamia, 18neryo mwatwala ebihangulo biwe byosĩ, nʼebindu byosĩ byʼabana nʼebihangulo ebyo ayibanira ePadanĩ-aramũ, eriya uku Ĩsaka tata wuwe omo kihugo kyʼeKanana. 19Nĩkwa Labanĩ abya iniamabigenda erĩyatwa obweya bwʼesyombũlĩ siwe, kandi Rakelĩ mwĩba ebisambo ebyabya bya tata wuwe. 20Nĩkwa Yakobo mwomboloka uku Labanĩ Omunya Sũrĩa, kusangwa mwatamubwira kwʼakatswa. 21Neryo mwatswa nʼebyosĩ abya awite, mwahangana, mwasoka Olũsĩ Efũratĩ, erĩlolya obũsũ buwe ebwanga bwʼekitwa kyʼeGĩleadĩ.

22Neryo Labanĩ mwabwirwa ekiro kyʼebisatu ngoko Yakobo abiritswa. 23Neryo Labanĩ mwatwala abagala buwe haguma naye, mwakwama Yakobo olugendo lwʼebiro birinda. Mwamubana oko kitwa kyʼeGĩleadĩ. 24Kandi Nyamuhanga mwahĩka uku Labanĩ Omunya Sũrĩa, omo nzolĩ omo kiro, mwabũga naye ati, Ũyĩtegaye ĩsĩwabũga ekibuya kutse ekibi uku Yakobo. 25Nĩkwa Labanĩ mwahĩka uku Yakobo. Neryo Yakobo iniamabihanda ehema yiwe yʼoko kitwa, nĩkwa Labanĩ nʼabagala babo mobahanda awabo oko kitwa kyʼeGĩleadĩ. 26Neryo Labanĩ mwabũga na Yakobo ati, Wabirikolakĩ, erinyombolokako bũbĩso-bĩso, nʼeriheka bali bage ngʼabanyegwa bʼomũyalĩ kwehĩ? 27Ko watswa bũbĩso-bĩso busana nakĩ, nʼeriomboloka, mutambwira inatoka eribahamula nʼobutseme haguma nʼesyonyimbo nʼengoma nʼebinanga. 28Mutaleka ngalyatsirira bagala bage nʼabali bage kwehĩ? Wabirikola omo bũkĩrũ. 29Obũtokĩ buli omo byala byage erikukola nabi, nĩkwa Nyamuhanga wa tata wawe mwambwĩre mũlĩgolo omo kiro ati, Ũyĩtegaye sũbũge na Yakobo ekĩnywa kibuya kutse kibi. 30Na lino ukasonda erigenda kusangwa ũkwĩre enyũmba ya tata wawe yʼolukando, nĩkwa wabĩrĩba ebisambo byage busana nakĩ kwehĩ? 31Na Yakobo mwasũbĩrya nʼeribwira Labanĩ ati, Kusangwa nubaha; kyaleka ĩnabũga nyiti, Kwamũhwa wasyanzagula bali bawe nʼamaka. 32Nʼomundu wasyeya kwʼebisambo byawe, siendisyabyaho. Embere syʼabagala betu uminyerere ebyawe omo byage, utwalebyo. Kusangwa Yakobo ĩsyasĩ ko Rakelĩ abĩrĩbabyo. 33Neryo Labanĩ mwingira omo hema ya Yakobo, nʼomo hema ya Lea, nʼomo hema yʼababegerya babiri, nĩkwa mwatabana byomo. Neryo mwalũa omo hema ya Lea, mwingira omo hema ya Rakelĩ. 34Nĩkwa Rakelĩ ĩnĩamabĩĩmya ebisambo nʼerĩhĩrabyo omo kĩtũmbĩ kyʼoko ngamia, mwĩkalira kubyo. Neryo Labanĩ mwamamata omo hema yosĩ, nĩkwa mwatabanabyo. 35Neryo Rakelĩ mwabũga na tata wuwe ati, Omukama wage, siahitane sinangatoka erihangana embere syawe kusangwa nyiri oko mitsye yʼabakalĩ. Nĩkwa Labanĩ mwasondyabyo, nĩkwa mwatabana ebisambo ebyo.

36Neryo Yakobo mwahitana, mwanegena na Labanĩ. Neryo Yakobo mwasũbĩrya mwabwira Labanĩ ati, Erĩlolo lyage ni ryahi kwehĩ? Ebibi byage ni byahi, ebyaleka iwanyibingula utya kwehĩ? 37Wabirimata-mata omo bindu byage byosĩ wamabana mokĩ oko byʼomo nyũmba yawe kwehĩ? Ũkĩhĩre embere syʼabagala betu nʼabagala benyũ, batutswere ĩtwe babiri. 38Emyaka makũmĩ abiri eyĩ nabiribya haguma nawe; esyombũlĩ syawe nʼesyombene syawe mosĩtatesya ehyana hyasyo, kutse sinditalya oko mbangale syʼekihangulo kyawe. 39Esyĩtawa nʼebisoro mondakuleterasyo. Ĩngyowene monaheka eririha lyasyo; mowabũlyasyo omo byala byage, kutse syamĩbwa omwʼitungi kutse omo kiro. 40Emibere yage ko yabya itya; omwʼitungi inumirira, nʼeritsuku molyanyĩta omo kiro nʼotũgotserĩ motwabula omo meso wage. 41Emyaka makũmĩ abiri eyĩ inyine omo nyũmba yawe. Monakukolera emyaka ĩkũmĩ nʼĩnĩ busana nʼabali bawe babiri, nʼemyaka ndatu busana nʼesyombene syawe, kandi mowabindula oluhembo lwage lo ngendo ĩkũmĩ. 42Kumbe Nyamuhanga wa tata wage, Nyamuhanga wa Abrahamũ, nʼolubahwa lwa Ĩsaka, bitalibya haguma nage, kwenene nga wabirinyĩhehetya butsira kindu. Nyamuhanga abirilola oko bũlĩge bwage nʼomũbĩrĩ wʼebyala byage, neryo mwakũkũngĩre omo kiro kya mũlĩgolo.

43Neryo Labanĩ mwasũbĩrya mwabũga na Yakobo, ati, Abali ni bali bage, nʼabana ni bana bage, nʼebihangulo ni bihangulo byage, nʼebyosĩ ukalangira ni byage. Nĩkwa nage nangakolĩrekĩ mũnabwĩre uku bali bage aba, nʼabana babo abo babuta kwehĩ? 44Na lino Wase tũhĩre endagano ĩngye nawe. Ibye kĩmĩnyĩsyo omo katĩkatĩ kage nawe. 45Neryo Yakobo mwĩmya erĩbwe mwasingikalyo ngʼendũyĩ. 46Neryo Yakobo mwabwira bagala babo ati, Mũsongaye amabwe. Neryo mobasongya amabwe, mobayirago mo kilundo. Neryo mobaliraho hakũhĩ nʼekilundo ekyo. 47Neryo Labanĩ mwalukaho mo Yegarĩ-saha-dũta, nĩkwa Yakobo mwalukaho mo Gĩleadĩ. 48Neryo Labanĩ mwabũga ati, Ekilundo ekĩ nĩ kĩmĩnyĩsyo omo katĩkatĩ kage nawe mũnabwĩre. Kyaleka erĩna lyakyo ikyalukwa mo Galedĩ, 49na Mĩsĩpa, kusangwa ati, Omwami Mukulu ategaye omo katĩkatĩ kage nawe omugulu tuli hali na hali. 50Nawe wamagalya bali bage, kandi wamahalĩkanĩa bali bage, hate mundu haguma netu, langira, Nyamuhanga nĩ mũlangĩrĩ omo katĩkatĩ kage nawe. 51Neryo Labanĩ mwabwira Yakobo ati, Tungerera ekilundo ekĩ, ulangire endũyĩ eyo nabĩrĩhanganĩa omo katĩkatĩ kage nawe. 52Ekilundo ekĩ kibye mũlangĩrĩ, nʼendũyĩ ibye mũlangĩrĩ, ngoko nyitendisyakiruka ekilundo ekĩ eriya ukʼuwe, nawe kʼutendisyakiruka ekilundo ekĩ nʼendũyĩ eyĩ eriasa ewage erikola nabi. 53Nyamuhanga wa Abrahamũ, na Nyamuhanga wa Nahorĩ, Nyamuhanga wa tata wabo, atswere omo katĩkatĩ ketu. Neryo Yakobo mwayisema oko lubahwa lwa tata wuwe Ĩsaka. 54Na Yakobo mwahera obuhere oko kitwa, mwabirikira bagala babo erirya akalyo, neryo mobalya, mobasibayo nʼerigotserayo omo kitwa. 55Nʼomo ngyakya-ngyakya Labanĩ mwahangana, mwalyatsirira abagala buwe nʼabali buwe, mwatsumulabo. Labanĩ mwahongoka erisuba ewuwe.

Currently Selected:

Enzũko 31: KB80

Highlight

Copy