Enzũko 30

1Omugulu Rakelĩ alangira ngoko atetabutira Yakobo yo bana, Rakelĩ mwabya nʼobũha uku mwali wabo. Neryo mwabũga na Yakobo ati, Umba abana, bite bitya iningandihola. 2Neryo Yakobo mwahitana uku Rakelĩ. Mwabũga ati, Ĩngye indi omo mwanya wa Nyamuhanga oyo wabirikũkakĩrya olubuto omo nda kwehĩ? 3Naye mwabũga ati, Lebaya, omũbegerya wage ye Bĩlĩha, ũmwĩmaye. Iniatoka eributira oko marwĩ wage, inabana abana busana naye. 4Neryo mwamuha Bĩlĩha omũbegerya wuwe eribya mũkalĩ wuwe, neryo Yakobo mwamwĩmya. 5Na Bĩlĩha mwaheka obukule, neryo mwabutira Yakobo yʼomugala. 6Neryo Rakelĩ mwabũga ati, Nyamuhanga abirimba erĩbanza, amabĩowa omulenge wage nibya, abirimba omugala. Neryo mwaluka erĩna liwe mo Danĩ. 7Na Bĩlĩha omũbegerya wa Rakelĩ mwaheka obukule kandi, mwabutira Yakobo yʼomugala wʼakabiri. 8Na Rakelĩ mwabũga ati, Okwʼirengana lĩkalĩre nabirirengana na mwali wetu, namakĩnda. Neryo mwaluka erĩna liwe mo Nafũtalĩ.

9Omugulu Lea alangira ngoko amabyũmbya okwʼibuta, mwĩmya Sĩlpa, omũbegerya wuwe, mwamuha Yakobo eribya mũkalĩ wuwe. 10Na Sĩlpa omũbegerya wa Lea mwabutira Yakobo yʼomugala. 11Lea mwabũga ati, Omũyĩsa goyũ! Neryo mwaluka erĩna liwe mo Gadĩ. 12Sĩlpa omũbegerya wa Lea mwabutira Yakobo yʼomugala wʼakabiri. 13Neryo Lea mwabũga ati, Indi wʼobutseme! Kusangwa abakalĩ basyanyahula mo wʼomũyĩsa. Neryo mwaluka erĩna liwe mo Aserĩ.

14Neryo Rũbenĩ mwalendera oko biro byʼerigesa engano, mwayabana esyondehe omo kisuki, neryo mwatwalirasyo nyĩnya wuwe Lea. Neryo Rakelĩ mwabwira Lea ati, Ngakũbũlaya nyiti Umba oko ndehe sya mugala wawe. 15Naye mwabũga naye ati, Ko ni mwatsi muke erinyisagula ĩbage kwehĩ? Nʼakandi ũkĩmaya esyondehe sya mugala wage nibya kwehĩ? Neryo Rakelĩ mwabũga ati, Busana nʼekyo akandigotsera ewawe yo mũnabwĩre busana nʼesyondehe sya mugala wawe. 16Neryo Yakobo mwasa akalũa omwʼirima omwʼĩgolo-golo, na Lea mwayahĩndana naye, mwabũga ati, Litolere iwagotsera omwage; kusangwa kwenene nabirikugula oko ndehe sya mugala wage. Neryo mwagotsera omuwe ekiro ekyo. 17Neryo Nyamuhanga mowa Lea, neryo Lea mwaheka obukule, mwabutira Yakobo yʼomugala wʼakatanu. 18Neryo Lea mwabũga ati, Nyamuhanga abirimba oluhembo lwage, kusangwa monaha omũbegerya wage ũkwʼĩbage. Neryo mwaluka erĩna liwe mo Ĩsakarĩ. 19Na Lea mwaheka obukule kandi, neryo mwabutira Yakobo yʼomugala wʼendatu. 20Lea mwabũga ati, Nyamuhanga abirimba olũsũnzo lowene. Lino ĩbage akandĩkala nage, kusangwa nabirimubutira abagala ndatu. Neryo mwaluka erĩna liwe mo Zebũlũnĩ. 21Enyũma wʼaho Lea mwabuta omwana wʼobũkalĩ, mwaluka erĩna liwe mo Dĩna. 22Neryo Nyamuhanga mwibuka Rakelĩ, mwamwowa, mwabohola enda yiwe. 23Naye mwaheka obukule, mwabuta mugala, mwabũga ati, Nyamuhanga abĩrĩnyĩlũsya okwʼihemuka lyage. 24Neryo mwaluka erĩna liwe mo Yosefũ, ati, Omwami Mukulu ambe ogundi mugala.

25Enyũma wʼaho omugulu Rakelĩ abuta Yosefũ, Yakobo mwabũga na Labanĩ ati, Unyihamule nyigende ewetu nʼomo kihugo kyetu. 26Umba abakalĩ bage nʼabana bage, abo nabirikolera ukuwe, Uleke nyigende, kusangwa ũnasĩ omũbĩrĩ wage nakukolera. 27Neryo Labanĩ mwamubwira ati, Namabya nabĩrĩsĩmwa omo meso wawe, Wĩkale. Kusangwa namaminya ngoko Mwami Mukulu abirinzumula busana nawe. 28Neryo Labanĩ mwabũga ati, Wahule oluhembo lwawe, nasyakuhalo. 29Neryo mwamũsũbĩrya ati, Ũnasĩ ngoko nabirikukolera, kandi ngoko ebihangulo byawe byabiribya haguma nage. 30Kusangwa byabya bike ebyo wabya uwite nde nasa, neryo byabirikanya eribya bingi, kandi Omwami Mukulu abirikutsumula ehosĩ nabĩrĩlolya. Na lino nasyabirikira ekĩtũnga kyage kyo mugulu wahi kwehĩ? 31Neryo Labanĩ mwabũga ati, Nasyakuhakĩ kwehĩ? Yakobo mwabũga ati, Siwendisyambakĩ. Omwatsi goyũ, wamakolago, nasyalĩsya ekihangulo kyawe kandi nʼerĩteyakyo. 32Ngandilaba omo kihangulo kyawe kyosĩ mũnabwĩre, erĩlũsya mukyo obuli kihanda kyʼebitanga nʼebihanda byʼesyombũlĩ, nʼobuli kyana kyʼembũlĩ kyʼomũlĩme, nʼesyombene-hene syʼebitanga nʼesyʼamalemba, nabyo byasyabya oluhembo lwage. 33Litya eritunganene ryage lyasyatũlago busana nage, omugulu wasyasa oko mwatsi wʼoluhembo lwage olo guli nalo. Obuli mbene-hene eyite nʼebitanga-bitanga kutse amalemba, nʼemĩrĩme omo katĩkatĩ kʼehyana hyʼesyombũlĩ, yamabanika ewage, ĩnĩ bwĩbĩ. 34Labanĩ mwabũga ati, Lyowene, bibye bitya ngʼekĩnywa kyawe. 35Neryo ekiro ekyo mwalũsya esyombaya syʼamalemba nʼesyʼebitanga, nʼesyombenehene syʼobũkalĩ esyʼamalemba nʼesyʼebitanga, obuli nzeru mũsyo, nʼemĩrĩme yosĩ yʼesyombũlĩ, mwahĩrasyo omo byala byʼabagala buwe. 36Neryo Labanĩ mwayigaba uku Yakobo olugendo lwʼebiro bisatu, neryo Yakobo mwalĩsya esyasĩgala oko bihangulo bya Labanĩ.

37Neryo Yakobo mwĩmya emyũtso mibisi yʼomũlĩbĩnĩ, nʼeyʼomuti wʼomũlozĩ, nʼeyʼobubondo, neryo mwahĩra muyo mwʼamalemba obweru-bweru buhuluke omo katĩkatĩ kʼemyũtso. 38Neryo mwahĩra emyũtso eyo yʼomo mbuga aho sikapũlĩraya aho ebihangulo bikasomera. Nasyo mosyahaka omugulu syasa okwʼĩpũlya. 39Ebihangulo mobyahaka emuliro wʼemyũtso eyo, nʼebihangulo mobyabuta esyʼamalemba, nʼebitanga, nʼebinyenze. 40Neryo Yakobo mwasombola ebyana byʼesyombũlĩ, mwalolya amũsũ wʼebihangulo gʼoko syʼamalemba nʼemĩrĩme yosĩ omo kihangulo kya Labanĩ. Neryo mwahĩra ebihangulo biwe aho wabyo, mwatahĩrabyo omo kihangulo kya Labanĩ. 41Enyũma wʼaho omugulu esyʼamaka syʼekihangulo syahaka, Yakobo, mwahĩra emyũtso embere syʼameso wʼekihangulo omo mbuga, isyahakira omo katĩkatĩ kʼemyũtso. 42Nĩkwa omugulu ekihangulo kyabya kĩbondĩre, mwatahĩrasyomo. Neryo esĩbondĩre mosyabya sya Labanĩ, nʼesyʼamaka mosyabya sya Yakobo. 43Neryo omundu oyo mwakamaha kutsibu, mwabya nʼebihangulo binene, nʼabagombe bʼobũkalĩ, nʼabʼobulume, nʼesyongamia nʼesyopunda.

Currently Selected:

Enzũko 30: KB80

Highlight

Copy