Enzũko 29

Yakobo akakolera Labanĩ

1Neryo Yakobo mwĩmya enzira, mwahĩka omo kihugo kyʼabana bʼendata. 2Neryo mwasamalira, neryo mwalangira ekitehero omwʼirima, kandi lebaya, ebihangulo bisatu byʼesyombũlĩ byabya bigotsere oko mũsĩke wakyo. Kusangwa omo kitehero ekyo imobakanywĩsĩraya ebihangulo byʼesyombũlĩ. Nĩkwa erĩbwe eryabya oko kitehero lyabya ĩnene. 3Nʼaho hʼebihangulo byosĩ byabya bĩhĩndene, ĩbakakũmbagalaya erĩbwe ĩryalũa oko mwanya wʼekitehero, ĩbanywĩsya esyombũlĩ neryo ĩbasũbya erĩbwe kandi oko kitehero aho walyo. 4Yakobo mwabũga nabo ati, Balĩkyetu, muli banyahi kwehĩ? Neryo bati, Ĩtwe tuli bʼeHaranĩ. 5Neryo mwabũga nabo ati, Mũnasĩ Labanĩ mugala wa Nahorĩ kwehĩ? Nabo mobabũga bati, Tũnamwasĩ. 6Naye mwabũga nabo ati, Anabũkĩre kwehĩ? Nabo mobabũga bati, Anabũkĩre. Neryo lebaya, Rakelĩ, mwali wuwe akasa nʼesyombũlĩ. 7Neryo Yakobo mwabũga ati, Lebaya, eryuba siririryasingirira, kandi endambĩ sĩrĩyahĩka erĩhĩndanĩa ebihangulo. Mũnywĩsaye esyombũlĩ, mugende mũlĩsayesyo. 8Nabo mobabũga bati, Sitwangatoka ebihangulo byosĩ bite byahĩndana, neryo bakakũmbagalya erĩbwe erĩlũa oko lũkyo lwʼekitehero. Ĩtwasomya esyombũlĩ. 9Abere akĩnabũga nabo, Rakelĩ mwasa nʼesyombũlĩ sya tata wuwe, kusangwa yo wabya mũlĩsya wasyo. 10Enyũma wʼaho omugulu Yakobo alangira Rakelĩ, mwali wa Labanĩ nyĩnya-lume wuwe, nʼesyombũlĩ sya Labanĩ nyĩ-nya-lume wuwe, Yakobo mwaya hakũhĩ mwakũmbagalya erĩbwe erĩlũsyalyo oko mwanya wʼekitehero, mwasomya ekihangulo kya Labanĩ nyĩnya-lume wuwe. 11Neryo Yakobo mwalyatsirira Rakelĩ, mwasumba omulenge wuwe mwalira. 12Na Yakobo wabwira Rakelĩ ngoko ali mũhwa wa tata wuwe, nʼakandi ngoko ali mugala wa Rebeka. Neryo Rakelĩ mwatibita mwayabwira ĩse wuwe. 13Enyũma wʼaho, omugulu Labanĩ owa engulu ya Yakobo mũhwa wuwe, mwatibita erĩyahĩndana naye, mwamuwako, mwamulyatsirira, mwamuleta omo nyũmba yiwe. Neryo Yakobo mwabwira Labanĩ yʼemyatsi yosĩ eyĩ. 14Neryo Labanĩ mwabũga naye ati, Kwenene uli ĩkũha lyage nʼomubiri wage. Neryo mwĩkala haguma naye nga mukera muguma. 15Neryo Labanĩ mwabũga na Yakobo ati, Kusangwa uli mugala wetu, wasyanyikolera busa kwehĩ? Umbwire, ebihembo byawe nga byasyabyakĩ? 16Na Labanĩ abya nʼabali babiri. Erĩna lyʼomukulu lyabya Lea, nʼerĩna lyʼomulere lyabya Rakelĩ. 17Neryo ameso wa Lea abya molo nĩkwa Rakelĩ abya mubuya, abya atungukere. 18Neryo Yakobo mwanza Rakelĩ. Mwabũga ati, Nasyakukolera myaka irinda busana na Rakelĩ mwali wawe mulere. 19Na Labanĩ mwabũga ati, Lyowene inakuhaye kwilaba erimuha ogundi mundu. Wĩkale haguma nage. 20Neryo Yakobo mwakola emyaka irinda busana na Rakelĩ, moyabya nga biro bike busana nʼerimwanza.

Erĩherũkya lya Yakobo

21Neryo Yakobo mwabũga na Labanĩ ati, Umba mũkalĩ wage, kusangwa ebiro byage byamahĩkana, nyĩmwĩmaye. 22Na Labanĩ mwahĩndanĩa abalume bosĩ baho bo haguma, mwakokotya erirya ĩnene. 23Nʼenyũma omwʼĩgolo-golo, mwamutwalira Lea mwali wuwe naye mwamwĩmya. 24Na Labanĩ mwaha Sĩlpa uku Lea mwali wuwe eribya mũbegerya wuwe. 25Enyũma wʼaho omo ngyakya, lebaya, abya ini Lea. Neryo mwabũga na Labanĩ ati, Ekĩ nĩkĩ ekyo wamangolera kwehĩ? Mondakukolera busana na Rakelĩ kwehĩ? Busana nakĩ wamandeba kwehĩ? 26Neryo Labanĩ mwabũga ati, Eno si mitsye yetu erĩherũkya Omulere embere wʼomukulu. 27Ũberereraye ebiro birinda byʼoyũ, netu twasyakuha ogundi nibya busana nʼomũbĩrĩ wasyangolera eyindi myaka irinda. 28Neryo Yakobo mwakola atya mwaberererya ebiro birinda biwe. Neryo Labanĩ mwamuha Rakelĩ mwali wuwe eribya mũkalĩ wuwe. 29Neryo Labanĩ mwaha omũbegerya wuwe Bĩlĩha uku Rakelĩ mwali wuwe eribya mũbegerya wuwe. 30Neryo Yakobo mwĩmya Rakelĩ, mwanza Rakelĩ kwilaba Lea, mwamukolera eyindi myaka irinda.

Abana ba Yakobo

31Neryo Omwami Mukulu mwalangira ngoko Lea mwasombwa, neryo mwalĩbũla enda yiwe, na Rakelĩ mwabya mugumba. 32Neryo Lea mwaheka obukule, mwabuta mugala, mwahula erĩna liwe mo Rũbenĩ, kusangwa abũga ati, Omwami Mukulu abirilangira obũlĩge bwage; lino ĩbage akandinyanza. 33Neryo Lea mwaheka obukule kandi, mwabuta omugala; mwabũga ati, Kusangwa Omwami Mukulu abĩrĩowa ko nasombawa, kyalekĩre iniamba omugala oyũ nibya; neryo mwahula erĩna liwe mo Sĩmeonĩ. 34Kandi mwaheka obukule, mwabuta omugala; mwabũga ati, Lino ĩbage akandinyibegerako, kusangwa namamubutira bagala basatu; kyaleka erĩna liwe iryahulwa mo Lawĩ. 35Neryo kandi mwaheka obukule, mwabuta omugala; neryo mwabũga ati, Engendo eyĩ ngandipipa Omwami Mukulu; kyaleka iniahulwa mo Yũda; neryo mũmbya eributa.

Currently Selected:

Enzũko 29: KB80

Highlight

Copy