Emĩbĩrĩ 26

1Neryo Agrĩpa mwabwira Paũlo ati, Unawite ehamũlĩ yʼeritonda ebyawe. Neryo Paũlo mwasumba ebyala biwe, mwatsũka eritonda ebiwe ati,

2Uwe mwami Agrĩpa! Ngwite embanga, kusangwa mũnabwĩre ngatonda ebyage embere syawe, busana nʼemyatsi yosĩ eyo Bayũda bakanyĩhandĩkĩrĩraya. 3Kandi kusangwa nawe ũnasĩ ndeke emitsye yosĩ nʼobuhaka bwʼAbayũda. Neryo ngakusaba nyiti, Unyihulikirire, butsira erĩyĩhanĩa.

4Kandi Abayũda bosĩ banasĩ emigendere yage erĩtsũka omo bwana bwage. Banasĩ ngoko nabirisiba emyaka yosĩ omo kihanda kyage, kandi eYerũsalema nibya. 5Kusangwa banyasĩ oko biro bingi, kumbe banzĩre erĩbũga, ngoko nabya Mũfarĩsayo omo mitsye ĩkalĩre yʼekisomo kyetu ngʼOmũfarĩsayo. 6Na lino nyimene oko lubanza busana nʼamaha wʼendagane eyo Nyamuhanga alaga abotata-kulu wetu. 7Erilaga eryo ebihanda byetu erĩkũmĩ nʼebibiri, bakayiketera, omugulu bakakolera Nyamuhanga yo kutsibu omo kiro nʼomo musibo. Uwe Mwami! Busana nʼamaha aya, ngahandĩkĩrĩrĩbawa nʼAbayũda. 8Busana nakĩ mũkaganĩraya muti lĩkalĩre Nyamuhanga erĩlũbũkya abaholĩ kwehĩ?

9Nage naganĩraya nyiti, ritolere inakola emyatsi mingi eyikalwa nʼerĩna lya Yesu wʼeNazaretĩ. 10Monakola nyitya eYerũsalema. Monabana ehamũlĩ oko bahererĩ bakulu eriboha bandu ba Nyamuhanga omo mũlĩkĩ, kandi omugulu bĩtawa monalĩga. 11Engendo nyingi monasuyirabo omo manyũmba wʼerĩhĩndanamo gosĩ, kandi monalenga erĩkũnabo eritsuma ekisomo kyabo. Kandi monahitana kubo ko kutsibu, monakwamirirabo erĩhĩka oko mĩyĩ yʼehali.

Paũlo akatũla omwatsi wʼerilama liwe

12Omugulu nabya ngakola nyitya, monaya eDamasĩkĩ inyinawite ehamũlĩ nʼeritumwa lyʼabahererĩ bakulu. 13Neryo omwʼitungi, uwe mwami, monalangira omo nzira ekyakakala kĩkalũa elubula, ekĩkakangabasanaya kwilaba, eryuba, ekĩkakoleraya nʼerĩnyĩtĩmbako, nʼabandu abo nabya nabo oko lugendo. 14Neryo ĩtwe bosĩ twabere twabiwa oko kitaka, monowa omulenge akabũga nage, omo mũbũge wʼAbaebrania ati, Saũlo, Saũlo, busana nakĩ ũkanyendereraya kwehĩ? Lĩkalĩre ukʼuwe erilasa oko migera eyĩkakũna ende. 15Nage monabũga nyiti, Mukama, uwendi kwehĩ? Neryo Omukama mwabũga ati, Indi Yesu oyo ũkendereraya. 16Nĩkwa, hangana oko bisando byawe. Nabirikubulukira busana nʼomwatsi wʼerĩkũhĩra mo mũkolĩ nʼomũtũlĩ wʼemyatsi eyo wabirilolako, nʼemyatsi eyo nasyakũbũlũkĩrya. 17Nasyakũlamya oko bandu bʼAbayũda, nʼabandu bʼEbihanda, abo ngakutumako. 18Ũkandisyalĩbũla ameso wabo, ibatoka eribinduka erĩlũa omo mwĩrĩmya nʼeribindukira ekyakakala, nʼeribinduka erĩlũa oko butabale bwʼeSatanĩ nʼeribindukira Nyamuhanga. Neryo busana nʼerĩnyĩkĩrĩrya babane eribuyirwa lyʼebibi, kandi babane omwanya omo katĩkatĩ kʼabandu abo Nyamuhanga abiriyisoga, nʼabo abirihigula.

Paũlo akabũga busana nʼomũbĩrĩ wuwe

19Neryo, Mwami Agrĩpa, mondagana erĩowa erilota eryo lyʼesyonzolĩ syʼelubula. 20Nĩkwa monatsũka erĩkangĩrĩrya bandu bʼeDamasĩkĩ, nʼabandu bʼeYerũsalema, nʼomo kihugo kyosĩ kyʼeYũdea, nʼoko Bihanda, nyiti babindule emitima yabo balũe kwʼebibi, babindukire Nyamuhanga, kandi bakole emĩbĩrĩ eyo eyĩkakangaya eribinduka lyabo. 21Busana nʼomwatsi oyũ Abayũda mobanyihamba omo Hekalũ, mobalenga erĩnyĩta. 22Neryo kusangwa Nyamuhanga mwanyĩwatĩkya, nyimene erihĩka mũnabwĩre erĩtũlago oko bagunda nʼoko bakulu. Ebyo ngabũga go nʼomwatsi ogo abamĩnyererĩ na Musa babũga bati akandisyabererera. 23Bati, Kristo asyagalwa, kandi busana nʼerĩlũbũka liwe oko baholĩ, asyabya owʼerĩmbere wʼerĩtũla omwatsi wʼekyakakala kyʼerilama oko bandu bʼAbayũda, nʼoko bandu bʼEbihanda.

24Neryo Paũlo abere akatonda ebiwe byʼatya, Festo mwabũga nʼomulenge munene ati, Paũlo, uli kwʼĩsĩre! Amenge wawe manene abirikuhindula mo mũsĩre! 25Neryo Paũlo mwamũsũbĩrya ati, Uwe Festo Mubuya, Sindi kwʼĩsĩre! Ebĩnywa ngabũga, ni byʼekwenene, si byʼerĩsĩre. 26Kusangwa omwami anasĩ emyatsi eyĩ, kandi ngabũga naye butsira eriubaha, kusangwa nabiriminya ndeke kwʼanasĩ oko myatsi yosĩ eyĩ, kusangwa ebĩ mobitetakolwa omo bũbĩso-bĩso. 27Uwe Mwami Agrĩpa Wamĩkĩrĩrya abamĩnyererĩ kwehĩ? Nyĩnasĩ ko wĩkĩrĩryebo. 28Neryo Agrĩpa mwabũga na Paũlo ati, Oko katambĩ kake kano uti wasyanyibindula eribya Mukristo! 29Neryo Paũlo mwabũga ati, Kumbe omo ndambĩ nge kutse omo ndambĩ nyiri, ngasaba Nyamuhanga nyiti kumbe uwe, nʼabandi bosĩ abakanyihulikirira mũnabwĩre, kumbe babye ngoko nyiri, nĩkwa butsira amahulula aya.

30Neryo omwami, nʼomũtabalĩ mukulu, na Berenĩke, nʼababya bĩkere haguma nabo, mobahangana. 31Neryo babere babigenda elutambi, mobatsũka erĩkanĩa haguma bati, Omundu oyũ sialitakola ekyangamwĩtĩsya, kutse eribohwa omo mũlĩkĩ. 32Neryo Agrĩpa mwabũga na Festo ati, Omundu oyũ angabohwerwe, kumbe ataliabũga ati angatswerwa na Kaĩsarĩ.

Currently Selected:

Emĩbĩrĩ 26: KB80

Highlight

Copy