Emĩbĩrĩ 27

Paũlo akaya eRoma omo bwato

1Neryo babere babisoha bati tuye eĨtalĩa omo bwato, mobahĩra Paũlo nʼabandi bandu bʼomũlĩkĩ uku Yũlĩo, omukulu wʼomulondo wʼabasĩrĩkanĩ bʼAbaroma owakahulawa mo Mulondo wa Aũgũsto. 2Kandi motwingira omo bwato bwʼeAdaramĩtĩ, obwasonda eriya oko bihugo ebiri oko mũsĩke wʼeAsĩa. Neryo motwahongoka omo ngetsi. Kandi Arĩstarĩko, Omunya Makedonĩa wʼeTesalonĩka, abya haguma netu. 3Engyakya motwahĩka eSĩdona. Yũlĩo mwakola Paũlo yo ndeke, mwamuha ehamũlĩ eriyabana abĩra buwe nʼerĩwatĩkĩbwa. 4Neryo motwalũa eSĩdona motwaya hakũhĩ nʼeKĩpũro kusangwa erihunga lyabya lĩkalĩre. 5Neryo twabere twabisoka engetsi eyĩhererenĩe nʼeKĩlĩkĩa nʼePamfũlĩa, motwahĩka eMĩra omũyĩ wʼeLĩkĩa: 6Neryo eyo eMĩra omukulu wʼerĩgana, mweya obwato bwʼeAlesandũrĩa obukaya eĨtalĩa, neryo mwatũhĩra mubo.

7Neryo motwagenda mubo mo bolobolo ebiro bingi, motwahĩka eKĩnĩdo nʼobũlĩge, kusangwa erihunga molĩtalĩga tukagenda, motwalaba eyĩkwa kwʼeKrete, hakũhĩ nʼeSalmone. 8Neryo motwatwanganaho nʼobũlĩge, motwahĩka ahakahulawa mo Ahabonderere Ndeke, ahabya hakũhĩ nʼomũyĩ wʼeLasea.

9Neryo omugulu muli abere abilaba, olugendo molwakala busana nʼobwĩko, kusangwa Ekiro kikulu Kyʼeritsira Kalyo ikyamabilaba. Neryo Paũlo mwahanabo 10ati, Ĩnywe balume! Namalebya olugendo lukandikala busana nʼeritsanda, nʼerihera lyʼebindu omo bwato, nʼobwato, nʼobwĩko bwʼesyongebe syetu nibya. 11Nĩkwa omukulu wʼabasĩrĩkanĩ erĩgana mwalĩga ebĩnywa byʼomũsondolĩ wʼobwato, nʼomwenye obwato, kwilaba ebĩnywa Paũlo abũga. 12Kandi ahʼerĩhĩra obwato sihabya howene busana nʼerĩkalaho omo mikera yʼeritsuku, neryo abandu bangi mobasoha bati balweho, bagende, bahĩke eFoĩnĩkĩ. EFoĩnĩkĩ ni kiharo kyʼeKrete kibondere ndeke busana nʼamato. Nʼaho hakalola omo katĩkatĩ kʼesyondambi ĩbĩrĩ syʼebwanga bwʼendata, bati bĩkaleho omo mikera yʼeritsuku.

Ekihunga omo ngetsi

13Neryo omugulu erihunga lyʼelutambi lwʼeyĩkwa lyabuhirira bolo-bolo, mobaganĩrya bati bamabana ekyo babya banzĩre, mobasumba engomo yʼobwato, mobalaba hakũhĩ nʼeKrete, ibakalandalanda oko na mũsĩke. 14Nĩkwa oko kandi katambĩ ekihunga kinene kyʼakanyabungu ekikahulawa mo Eryʼelutambi lwʼendata, mokyabuhirira kĩkalũa oko mũsĩke. 15Nĩkwa mokyayĩswĩrya oko bwato, nʼobwato mobwataluka erĩlolya omo kihunga ekyo, motwalekabo tutya, nʼerihunga molyatuheka. 16Neryo motwalaba hakũhĩ nʼakatsira kake akakahulawa mo Kaũda aho erihunga likabondera hake, neryo motwaboha akato kake kʼoko bwato, ĩhakalĩre nibya. 17Neryo babere babisumbako oko bwato, neryo mobaboha obwato omo bikoba. Neryo mobubaha bati bakandihatira omo misege hakũhĩ nʼomũsĩke wʼeLĩbĩa, mobakĩmya esyongimba esĩkakũna obwato. Neryo ekihunga mokyaheka obwato. 18Neryo enyũma wʼekiro kiguma ekihunga mokyatugusanga kutsibu, neryo mobatsũka erigusa ebindu ebyabya omo bwato byʼomo ngetsi. 19Nĩkwa enyũma wʼebiro bisatu mobagusa esyongimba syʼobwato syʼomo ngetsi omo byala byabo. 20Kandi motutalangira eryuba kutse esyongũnũnũ omo biro bingi, nʼekihunga kinene ĩkĩkĩnatũkũna-kũna, motwabula amaha wʼerĩlamĩbwa.

21Neryo babere babitsira akalyo ko biro bingi, Paũlo mwahangana omo katĩkatĩ kabo ati, Ĩnywe balume! Kumbe mwalikwama erihana lyage, kandi kumbe sĩmwetalũa eKrete, nga simwetabana eriagalwa erĩ, nʼeritala lyʼebindu. 22Nĩkwa lino ngabagonga-gonga nyiti muhande emitima! Sihali mundu oyo wasyakwa, bo nʼobwato busa bo bunemwendisyahera. 23Kusangwa omo kiro kino, ye Nyamuhanga, nage indi wuwe, kandi ngamukolera, mwatuma omũlaĩka wuwe erihangana hakũhĩ nage. 24Naye mwambwira ati, Paũlo, Sigubahe! Litolere iwahangana embere sya Kaĩsarĩ. Kandi lebaya, Nyamuhanga abirikuha abandu bosĩ abakagenda haguma nawe omo bwato. 25Neryo ĩnywe balume, muhande emitima yenyũ! Kusangwa nyĩkĩrĩrye Nyamuhanga, ko binemwendisyabya bitya ngoko indiabwirawa. 26Nĩkwa twasyaguswa oko kitsira kiguma.

27Nĩkwa omugulu ekiro kyʼerĩkũmĩ nʼebini kyabere kyabĩhĩka, twabere tunemuhekwa litya-litya omo ngetsi ye Ardĩa, omo katĩ-kanene, abasokya bʼobwato mobaganĩrya nga bamabĩhĩka hakũhĩ nʼekitaka. 28Neryo mobakĩmya olulengero lʼomo magetsi, mobabana ekitaka kiri metere makũmĩ ani omwisi. Enyũma wʼaho hake mobaswalenga magetsi, mobabana emetere makũmĩ asatu. 29Nĩkwa mobubaha eriguswa oko mabwe, neryo mobagusa esyongomo ĩnĩ syʼekyuma syʼenyũma wʼobwato, neryo mobasaba bati bukye. 30Nĩkwa abasokya mobalenga eritibita erĩlũa omo bwato. Neryo mobakĩmĩrya akato kake kʼomo ngetsi, nga bakasonda erĩhĩra esyongomo embere wʼobwato. 31Nĩkwa Paũlo mwabwira abasĩrĩkanĩ nʼomukulu wʼerĩgana lyʼabasĩrĩkanĩ ati, Abasokya aba bamatĩndasĩgala omo bwato, ĩnywe simwenditoka erĩlamĩbwa. 32Neryo abasĩrĩkanĩ mobatwa ebikoba byʼakato kake ako nako mokalũaho.

33Neryo bwabere bwasonda erikya, Paũlo mwalembabo ati balye akalyo, ati, Mũnabwĩre ni kiro kyʼerĩkũmĩ nʼebini ĩmũkategaya nʼeritsira akalyo, isimwetalyakĩ. 34Neryo ngabalemba-lemba mulye akalyo, kusangwa kakandibaganula. Sihali nʼoluywiri nʼoluguma lʼoko mitwe yenyũ olukandihera. 35Neryo abere abĩbũga atya, Paũlo mwĩmya obundu, mwaha Nyamuhanga ewasĩngya emuliro wʼabandu bosĩ, neryo mwatsũtsangabo, mwatsũka erirya. 36Neryo abosĩ mobasĩkya omutima, mobalya akalyo. 37Ĩtwe bosĩ ko twabya omo bwato, twabya bandu magana abiri nʼamakũmĩ alinda nʼendatu (276). 38Neryo babere babĩũgũta, mobangũhya obwato, bakagusa engano yʼomo ngetsi.

Erĩkwa lyʼobwato

39Neryo bwabere bwakya, mobataminya ekihugo ekyo, nĩkwa mobalangira obwerere bwʼekiharo kyʼomusege, neryo mobasonda eritwala obwato bʼoko musege oyo, kyamatokekana. 40Neryo mobagusa esyongomo esyo, mobasĩgasyo omo ngetsi. Kandi mobakũndũla ebikoba ebikaboha omuti owakabindula obwato. Kandi mobasumba olukimba olwʼemuliro wʼobwato, neryo erihunga molyalolyabo oko musege. 41Nĩkwa erĩhĩka omo masanga-sangano wʼamagetsi, mobalolya obwato bʼoko kitaka. Kandi omutwe wʼobwato mwahatira, mwataswatoka erigenda, nĩkwa obwato mobwatsũka erisatangika enyũma busana nʼamaka wʼebisunda byʼengetsi.

42Neryo abasĩrĩkanĩ mobayisunasuna erĩĩta bandu bʼomũlĩkĩ, Sihabye oyukatsiha nʼeritswa. 43Nĩkwa omukulu wʼabasĩrĩkanĩ erĩgana, iniakasonda erĩlamya Paũlo, mwakakĩryabo erĩĩtabo, neryo mwahanabo ati abasĩ eritsiha batsũke eriyigusa omo magetsi, bahĩke oko kitaka. 44Kandi ati abandi bakwamebo oko bisayi, nʼabandi oko bihande-bihande byʼobwato. Neryo abosĩ mobabala, mobahĩka oko kitaka ko ndeke.

Currently Selected:

Emĩbĩrĩ 27: KB80

Highlight

Copy