Emĩbĩrĩ 25

Paũlo akabũlaya eriyasohwa embere sya Kaĩsarĩ

1Neryo Festo mwahĩka omo kihugo ekyo, neryo enyũma wʼebiro bisatu mwalũa eKaĩsarĩa mwaya eYerũsalema. 2Nĩkwa abahererĩ bakulu nʼabasondolĩ bʼAbayũda mobahandikirira Paũlo. Kandi mobahatikana Festo, 3bati awatĩkayebo erireta Paũlo yʼeYerũsalema, ibamabimulamba erĩmwĩtĩra omo nzira. 4Neryo Festo mwasũbĩryabo ati, Paũlo akateyĩbawa eKaĩsarĩa, nage ngayayo lũba. 5Kandi ati, Abandu bakulu omo katĩkatĩ kenyũ bayeyo haguma nage eKaĩsarĩa, neryo ibahandikirira omundu oyo, amabya ali kwʼebibi.

6Neryo Festo abere abisibaho omo katĩkatĩ kabo ebiro munani kutse ĩkũmĩ, mwandagalira eKaĩsarĩa. Neryo engyakya wʼaho mwĩkala oko kĩtũmbĩ kiwe omo nyũmba yʼolubanza, mwahamula ati Paũlo aletawe. 7Neryo Paũlo abere ahĩka, Abayũda abalũa eYerũsalema mobamũtĩmbako, ĩbakamũhandĩkĩrĩraya emyatsi mingi eyo batetoka erĩsĩsya. 8Nĩkwa Paũlo mwatonda ebiwe ati, Sĩndĩtahalya oko Migambo yʼAbayũda, kutse oko Hekalũ, kutse uku Kaĩsarĩ. 9Nĩkwa Festo, iniakasonda erĩtsemesya Bayũda bo ndeke, mwabũga na Paũlo ati, Wamalĩga eriya eYerũsalema nʼeritswerwa embere syage eyo busana nʼebyo bakakuhandikirira ebĩ kwehĩ? 10Neryo Paũlo mwabũga ati, Nyimene embere wʼenyũmba yʼolubanza ya Kaĩsarĩ, aho nyitolere eritswerwa. Sinditakola Abayũda bo nabi, ngoko ũnasĩ ndeke. 11Namabya indi mukola-nabi, kutse namabya nabirikola ekyangaleka inahola, sindigana erihola. Nĩkwa hate kindu kyʼekwenene omo ebyo bakanyihandikirirako, sihali mundu wanganyihotera kubo. Ngabũlaya eriya embere sya Kaĩsarĩ. 12Neryo Festo abere abĩkanĩa haguma nʼabandu bʼerĩbũgĩro liwe, mwasũbĩrya ati, Ũkabũlaya eriya embere sya Kaĩsarĩ, ewa Kaĩsarĩ yo wanasyaya.

Paũlo embere sya Agrĩpa na Berenĩke

13Neryo enyũma wʼebindi biro, Omwami Agrĩpa na Berenĩke mobahĩka eKaĩsarĩa erĩbũkya Festo. 14Neryo babere bakasibayo biro bingi, Festo mwakanĩrya Omwami Agrĩpa omwatsi wa Paũlo ati, Felĩkĩ mwasĩga omundu muguma wʼomũlĩkĩ. 15Neryo omugulu nabya eYerũsalema, abahererĩ bakulu nʼabakulu bʼAbayũda mobamũhandĩkĩrĩrya, bati nyimutswere akwe. 16Nĩkwa monasũbĩryabo nyiti si mitsye yʼAbaroma erihotera omundu ate ahĩka emuliro wʼabahandĩkĩrĩrĩ buwe obũsũ nʼobũsũ, nʼeribana omwanya wʼerĩbũga ebiwe busana nʼomwatsi ogo bakamuhandikirirako. 17Neryo babere bahĩndana hano, mondalindirira, nĩkwa engyakya monĩkala oko kĩtũmbĩ kyage omo nyũmba yʼolubanza, neryo monahamula, nyiti omundu oyo aletawe. 18Neryo omugulu abahandĩkĩrĩrĩ bahangana, mobatamuhandikirira oko bibi ebyo naganĩraya. 19Nĩkwa mobanegena na Paũlo omo myatsi yʼekisomo kyabo, nʼomo myatsi yʼomundu muguma, ye Yesu oyo wahola. Nĩkwa Paũlo ati aneho. 20Nĩkwa monabula aho nagasonda emyatsi eyĩ, nĩkwa monabũlya Paũlo ngʼanzĩre eriya eYerũsalema nʼeriyasamba busana nʼemyatsi eyĩ. 21Nĩkwa Paũlo abere abũlya ati atswerawe na Kaĩsarĩ omo myatsi eyĩ, monahana nyiti ateyĩbawe erĩhĩka aho nasyamutumira ewa Kaĩsarĩ. 22Neryo Agrĩpa mwabwira Festo ati, Nage nibya nyanzĩre erĩowa omundu oyũ. Festo mwasũbĩrya ati, Omo ngyakya wasyamowa.

23Neryo engyakya, Agrĩpa mwahĩka haguma na Berenĩke, omwʼikengwa ĩnene, neryo mwingira omo nyũmba eyo bakasoheramo esyombanza, iniali haguma nʼabakulu bʼabasĩrĩkanĩ bʼeelfu, nʼabakulu bʼomũyĩ. Neryo Festo mwahamula ati Paũlo aletawe. 24Neryo Festo mwabũga ati, Uwe mwami Agrĩpa, nʼĩnywe bandu bosĩ abali hano haguma netu, mũnasamalĩre omundu oyũ, nĩkwa abandu bosĩ bʼAbayũda bʼeYerũsalema nʼabʼeno, babirimutsongera nʼolukanda lunene bati siabyeho kandi. 25Nĩkwa mondamubana ko mwatsi akola owangamwĩtĩsya; nĩkwa kusangwa amabũlya ati atswerawe na Kaĩsarĩ, monatwalo erimutuma eRoma. 26Nĩkwa singwite ekyo nangasakira omukama wage busana na Paũlo. Kikaleka inamuleta embere syʼĩnywe bosĩ, nʼembere syawe, uwe mwami Agrĩpa, neryo twabya twamabĩmũbũlya, inabana omwatsi ogo nangasaka. 27Kusangwa oko bũlengekanĩa bwage nyiti Sĩryowene erituma omundu wʼomũlĩkĩ, nʼeritindahula emyatsi eyo bakamũhandĩkĩrĩraya.

Currently Selected:

Emĩbĩrĩ 25: KB80

Highlight

Copy