Emĩbĩrĩ 24

Abayũda bakahandikirira Paũlo

1Enyũma wʼebiro bitanu, omũhererĩ mukulu oko bahererĩ bosĩ, ye Anania, mwaya eKaĩsarĩa haguma nʼabandi bakulu, nʼembũyĩ oyukahulawa mo Tertũlo. Neryo mobahandikirira Paũlo embere wʼomũtabalĩ mukulu ye Felĩkĩ. 2Neryo babere babibirikira Paũlo, Tertũlo mwatsũka erimuhandikirira, ĩnĩakabũga nʼomũtabalĩ ati, Uwe Felĩkĩ mubuya! Busana nawe tukabuyahirawa nʼobuholo bunene, nʼakandi busana nʼerilembera lyawe, ebibi byabirikungwa, nʼebibuya byabirikolwa busana nʼekihanda ekĩ. 3Tũkasĩma omwatsi oyũ ehosĩ emigulu yosĩ, kandi tukaleta ewasĩngya. 4Nĩkwa sĩnyanzĩre erĩkũlũhya, ngakulemba-lemba Ũtowe hake busana nʼobubuya bwawe. 5Kusangwa twabĩrĩrebya omundu oyũ kwʼali mũtĩngĩtya, kandi nĩ mũkatĩsanĩa omo katĩkatĩ kʼAbayũda omo kihugo kyosĩ, kandi nĩ mũhanganĩrĩ wʼekihanda kyʼAbanazaretĩ. 6Kandi mwalenga erĩtsandya eHekalũ, neryo motwamuhamba. [Twabya twanzĩre erimutswera ngʼEmigambo yetu. 7Nĩkwa Lũsĩa omukulu wʼeelfu yʼabasĩrĩkanĩ mwasa, mwatusagulaye nʼamaka manene. 8Neryo Lũsĩa mwahamula ati abahandĩkĩrĩrĩ buwe bahĩke embere syawe.] Nawe wamamũbũlya ndeke wasyatoka eriminya emyatsi eyo tukamuhandikirira. 9NʼAbayũda nabo mobamuhandikirira bati emyatsi eyo ni kwenene.

Paũlo akatonda ebiwe embere sya Felĩkĩ

10Neryo omũtabalĩ mukulu mwakoherya Paũlo ati abũge. Neryo Paũlo mwasũbĩrya ati, Nyĩnasĩ wabiribya mũtswerĩ wʼekihanda ekĩ omo myaka mingi, neryo ngatonda ebyage ĩnyĩnatsemĩre. 11Nawe wanganatoka eriminya ngoko hamatalaba biro ĩkũmĩ na bibiri bisa omugulu naya eYerũsalema erĩyaramĩrĩayo. 12Abayũda mobatanyibana ngakanĩa nʼomundu kutse erĩtwa eyĩsesĩ omo Hekalũ, kutse omo manyũmba wʼerĩhĩndanamo, kutse omo mũyĩ. 13Kandi sibangatoka erĩkũkangya kwenene emyatsi eyo bakanyihandikirira lino. 14Nĩkwa ekiguma ngakubwira nyiti, ngakolera Nyamuhanga wʼaboso-kulu wetu omo Nzira yʼomukama, eyo yo bakahula mo kindi kisomo. Kandi ngĩkĩrĩraya ebyosĩ ebiri omo Migambo ya Musa, nʼebyosĩ ebĩsakĩre omo bamĩnyererĩ. 15Kandi nyiwite amaha uku Nyamuhanga, awʼabandu aba nabo bakasĩmago, ngoko hasyabya erĩlũbũka lyʼabatunganene nʼababi. 16Neryo ngayitsinga eribya ebiro byosĩ nʼobunya-mutima bubuya, embere sya Nyamuhanga, nʼembere syʼabandu.

17Na lino enyũma wʼeyindi myaka, monahĩka eYerũsalema erireta olũsũnzo busana nʼekihanda kyetu, nʼerireta amahere. 18Neryo omugulu nabya ngakola nyitya mobanyeya omo Hekalũ inabiribuga emitsye yʼeriera, isihali endeko kutse olukanda. 19Nĩkwa habya abandi Bayũda bʼeAsĩa, nabo kumbe bangahĩka embere syawe ibanyihandikirira, bamabya bawite omwatsi ũkwʼingye. 20Kutse abandu aba nabo batũlego nga babana emĩbĩrĩ mibi omugulu nahangana embere wʼErĩbũgĩro. 21Monabũga omwatsi muguma omugulu nahangana omo katĩkatĩ kabo, nyiti, Ngaletawa oko lubanza embere syenyũ mũnabwĩre busana nʼerĩlũbũka lyʼabaholĩ.

22Nĩkwa Felĩkĩ, ĩnĩanasĩ ndeke omwatsi wʼeNzira eyo, mwabwirabo ati, balinde, Omukulu wʼabasĩrĩkanĩ elfu ye Lũsĩa, asyabya abiasa, nasyatwa olubanza lwenyũ. 23Neryo mwahana omukulu wʼerĩgana ati, ategaye Paũlo, nĩkwa amuhe obwĩranda, kandi syakakĩrĩraye abĩra buwe erĩmũwatĩkya.

Paũlo embere sya Felĩkĩ na Derũsĩla

24Nĩkwa enyũma wʼebindi biro, Felĩkĩ mwahĩka nʼomũkalĩ wuwe Mũyũda. Neryo mwatumira uku Paũlo, kandi mwamuhulikirira akabũga omwatsi wʼerĩkĩrĩrya Kristo Yesu. 25Kandi omugulu Paũlo abya akakanĩa omwatsi wʼeritunganene nʼowʼerĩyĩteya, nʼomwatsi wʼeritswera erikandisyasa, Felĩkĩ mubaha ati, Lino ukatagenda, neryo nasyabya nabibana omugulu nasyaswakubirikira. 26Kandi mwabya akahĩra amaha uku Paũlo, ati Paũlo asyamuha ekyũtũlĩro. Kyaleka iniamutumirako engendo nyingi, nʼerĩkanĩa naye.

27Nĩkwa emyaka ĩbĩrĩ yabere yabilaba, Porkĩo Festo mwaya oko ngoma ya Felĩkĩ ngʼomũtabalĩ. Nĩkwa Felĩkĩ mwanza erĩsĩmwa nʼAbayũda, kyaleka ĩnĩasĩga Paũlo yʼomo mũlĩkĩ.

Currently Selected:

Emĩbĩrĩ 24: KB80

Highlight

Copy