Emĩbĩrĩ 23

1Neryo Paũlo mwatungerera bandu bʼerĩbũgĩro bo ndeke, neryo mwabũga nabo ati, Ĩnywe balĩkyetu! Nabiribyaho embere sya Nyamuhanga erĩhĩka mũnabwĩre nʼobunya-mutima bubuya. 2Neryo omũhererĩ mukulu oko bahererĩ bosĩ, ye Anania, mwahamula ababya bimene hakũhĩ naye ati baswĩraye Paũlo yʼoko buno. 3Neryo Paũlo mwabũga naye ati, Nyamuhanga asyakũswĩrya, uwe lũhĩmbo lũhakabĩrye embemba! Uwe wĩkere aho erinyitswera omo Migambo, nĩkwa ukakota Emigambo uti banyĩswĩraye! 4Nĩkwa abandu ababya bimeneho mobabũga bati, Ukatsuma omũhererĩ mukulu oko bahererĩ bosĩ ba Nyamuhanga kwehĩ? 5Nĩkwa Paũlo mwabũga ati, Balĩkyetu sĩndwe nyasĩ kwʼali mũhererĩ mukulu oko bahererĩ bosĩ. Kusangwa kĩsakĩre kiti, Sũsyebũga ekibi busana nʼomũtabalĩ wʼabandu benyu.

6Nĩkwa Paũlo abere abiminya kwʼekihande kiguma kyabya kyʼAbasadũkayo nʼekindi kyabya kyʼAbafarĩsayo, mwabũgĩra omwʼĩbũgĩro ati, Balĩkyetu! Ĩngye indi Mũfarĩsayo, omugala wʼAbafarĩsayo. Ngaletawa oko lubanza embere syʼerĩbũgĩro busana nʼamaha wʼerĩlũbũka lyʼabaholĩ! 7Neryo abere abĩbũga atya, mohabya erinegena omo katĩkatĩ kʼAbafarĩsayo nʼAbasadũkayo, nʼendeko moyagabana. 8Kusangwa Abasadũkayo bati, Sihali erĩlũbũka, kandi sihali omũlaĩka, kutse sihali ekĩrĩmũ; nĩkwa Abafarĩsayo bakalĩga ebyosĩ. 9Neryo mohabya obogo bunene, nʼabandi bakangĩrĩrya bʼEmigambo bʼekihanda kyʼAbafarĩsayo mobahangana mobakuba obuhaka bo kutsibu bati, Sitwetabana oko mundu oyũ kwʼekibi. Kyanganabya ĩnĩ kĩrĩmũ kutse omũlaĩka akabũga naye kwehĩ?

10Neryo erinegena lĩnene molyatsũka, nĩkwa omukulu wʼabasĩrĩkanĩ mubaha ati bakanditulanga Paũlo mo bihande-bihande, neryo mwahana abasĩrĩkanĩ ati bandagalireho basagulebo ye Paũlo nʼamaka omo byala byabo, bamulete omo nyũmba yʼabasĩrĩkanĩ.

11Oko kiro ekĩkwamĩre ekyo, Omukama mwahangana hakũhĩ na Paũlo ati, Uhande omutima! Wabĩrĩtũla omwatsi wage wʼeYerũsalema, litya litolere ĩwatũla omwatsi wage wʼeRoma nibya.

Embĩta yʼerĩĩta Paũlo

12Neryo bwabere bwabikya, Abayũda mobamuyira embĩta. Mobayisema bati sibendirya kutse erĩpũlya bate bĩta Paũlo. 13Abandu abaya embĩta eyĩ babya bangi kwilaba makũmi ani. 14Neryo mobaya oko bahererĩ bakulu nʼabakulu bati, Twabiriyisema erĩtendĩgerya akalyo tute twĩta Paũlo. 15Neryo ĩnywe haguma nʼabʼerĩbũgĩro mubwire omukulu wʼabasĩrĩkanĩ elfu muti abaletere Paũlo, ngoko mukasonda eriminya ndeke-ndeke omwatsi wuwe. Nĩkwa ĩtwe tũsĩkĩre erĩmwĩta ate ahĩka na hano.

16Nĩkwa omũhwa wa Paũlo mowa embĩta yʼerimulamba, neryo mwasa, mwingira omo nyũmba yʼabasĩrĩkanĩ, mwabwira Paũlo. 17Nĩkwa Paũlo mwabirikira omukulu wʼerĩgana, mwamubwira ati, Utwale omũlwana oyũ oko mukulu wʼeelfu, kusangwa awite ekyʼerimubwira. 18Neryo omukulu oyo mwamutwala oko mukulu wʼeelfu mwabũga ati, Paũlo, omundu wʼomũlĩkĩ, mwakanyibirikira ati, nyirete, omũlwana oyũ yʼukʼuwe kusangwa awite ekyʼerikubwira. 19Neryo omukulu wʼeelfu mwamuwata oko byala nʼerimutwala omo ngonde, mwamũbũlya omo bũbĩso-bĩso, ati, Ni mwatsi wahi ukasonda erinyibwira kwehĩ? 20Neryo mwabũga ati, Abayũda babirihanana bati bakakũbũlaya ũsyendagalaya ye Paũlo omo ngyakya okwʼĩbũgĩro ngʼukasonda erĩbũlya eyindi myatsi yiwe. 21Nĩkwa sũlĩgĩrebo, kusangwa abalume bangi kwilaba makũmĩ ani bakamulambira omo nzira. Nabo babĩrĩlahĩrya bati sibendirya kutse erĩpũlya bate bĩta Paũlo. Na lino babĩrĩyĩtegekanĩa eririnda endagane yawe. 22Neryo omukulu wʼeelfu mwaleka omũlwana erigenda abimubwira ati, Subwire mundu nʼomuguma ko wabirinyibwira emyatsi eyĩ.

Paũlo akatumawa oko mũtabalĩ ye Felĩkĩ

23Neryo omukulu wʼeelfu oyo Mwabirikira abakulu babiri bʼamagana, mwabwirabo ati, Mũtegekanaye abasĩrĩkanĩ magana abiri, nʼabandu bʼesyosabayĩrĩ makũmĩ alinda, nʼabandu bʼamatũmo magana abiri, babye ĩbabĩrĩyĩtegekanĩa oko saa ĩsatu syʼekiro. 24Kandi mubane esyosabayĩrĩ busana na Paũlo erimutwala ndeke oko mũtabalĩ Felĩkĩ. 25Neryo mwasaka ebarua, ati,

26Ĩngye Klaũdĩo Lũsĩa, ngakutumira Obuholo, uwe Mũtabalĩ mukulu mubuya, Felĩkĩ. 27Abayũda mobahamba omundu oyũ ibakasonda erĩmwĩta. Nage monowa kwʼali Muroma, neryo monahĩkaho nʼabasĩrĩkanĩ erĩmũlamya. 28Kandi monasonda eriminya ekyaleka ĩbamũhandĩkĩrĩrya, monamuleta okwʼĩbũgĩro lyabo. 29Neryo monabana ĩbakamũhandĩkĩrĩraya busana nʼemyatsi yʼEmigambo yabo, isibawite ekyangamwĩtĩsya, kutse isibawite ekyangamũbohesya. 30Kandi namabibwirwa kwʼAbayũda babiriya embĩta busana nʼomundu oyũ, namakutumiraye lũba. Nĩkwa namabwira abakamũhandĩkĩrĩraya nyiti, bamuhandikirire embere syawe.

31Neryo abasĩrĩkanĩ mobakola ngoko babwirawa. Mobatwala Paũlo yʼomo kiro oko Antĩpatĩrĩ. 32Neryo engyakya abasĩrĩkanĩ mobasuba omo manyũmba wabo, ĩbakasĩga bandu bʼesyosabayĩrĩ eritwala Paũlo eKaĩsarĩa. 33Neryo babere babĩhĩka eKaĩsarĩa, mobaha omũtabalĩ mukulu yʼebarua, kandi mobahĩra Paũlo embere siwe. 34Omũtabalĩ mukulu oyo mwasoma ebarua, neryo mwabũlya Paũlo nga ni wʼekihugo kyahi, neryo mwaminya kwʼali wʼekihugo kyʼeKĩlĩkĩa. 35Neryo mwabũga ati, Nasyakuhulikirira abahandĩkĩrĩrĩ bawe bahĩka. Neryo mwahana ati Paũlo ateyĩbawe omo kikali kya Herode.

Currently Selected:

Emĩbĩrĩ 23: KB80

Highlight

Copy