Emĩbĩrĩ 22

1Ĩnywe balĩkyetu, nʼabotata, muhulikirire, ngatonda ebyage embere syenyũ! 2Nabo babere bakamuhulikirira akabũga nabo omo Kiebrania, mobabya bũkũtũ-kũtũ, neryo Paũlo mwaswabũga ati,

3Ĩngye indi Mũyũda, nabutirawa eTarso yʼeKĩlĩkĩa, nĩkwa nakulira omo mũyĩ oyũ wʼeYerũsalema. Nakangĩrĩrĩbawa na Gamalĩelĩ, kandi nakangĩrĩrĩbawa erikwama Emigambo yʼaboso-kulu wetu, ĩnyĩkwĩre omũhwa wʼerikolera Nyamuhanga, ngoko ĩnywe bosĩ muli nago mũnabwĩre. 4Monendererya nʼerĩĩta abakwama Enzira yʼomukama eyo, eriboha abalume nʼabakalĩ, nʼerĩhĩrabo omo manyũmba wʼomũlĩkĩ. 5Omũhererĩ mukulu oko bahererĩ bosĩ, nʼerĩbũgĩro lyosĩ lyʼabakulu bangatũlago batya nibya. Mobamba esyobarua oko balĩkyetu, kandi monahongoka eriya eDamasĩkĩ erireta abaliyo bʼeYerũsalema ĩbanabohĩre, busana nʼerisuyirabo.

Paũlo akatũla omwatsi wʼerilama liwe

6Neryo omugulu nabya omo lugendo lwage olo hakũhĩ nʼeDamasĩkĩ nga saa sĩta, neryo-neryo ekyakakala kĩkalĩre mokyanyĩkolerya ehosĩ kĩkalũa elubula. 7Nage monawa oko kitaka, monowa omulenge akabũga nage ati, Saũlo, Saũloĩ! Busana nakĩ ũkanyendereraya kwehĩ? 8Nage monasũbĩrya nyiti, Uwendi kwehĩ Mukama? Naye mwambwira ati, Ĩngye indi Yesu Omũnazaretĩ, oyo ũkendereraya. 9Abandu ababya haguma nage mobalangira ekyakakala ekyo kwenene, nĩkwa mobataminya omulenge wʼoyo wabya akabũga nage. 10Nage monabũlya nyiti, Mukama, nyiyire nyiti kwehĩ? Omukama mwambwira ati, Hangana, uye eDamasĩkĩ, nʼeyo wasyabwirwa ebyosĩ ebyo Nyamuhanga abirihamula ebyo wangakola. 11Nabya ndĩmatĩme busana nʼerĩkangabasanĩa lyʼekyakakala ekyo, neryo ababya haguma nage mobanyiwata oko byala erinyisondola erĩhĩka eDamasĩkĩ.

12Neryo habya mundu muguma yo Anania, oyo wabya mundu wʼekisomo, kandi abya akakenga Emigambo yetu, kandi iniakahulawa ndeke nʼAbayũda bosĩ ababya bĩkere eDamasĩkĩ. 13Iye mwambĩkako, mwimana hakũhĩ nage, mwambwira ati, Saũlo, mũlĩkyetu, ubane erilangira lyawe! Oko saa eyo nyisa-nyisa monasamalira endata ngamulolako. 14Neryo Anania mwabũga ati, Nyamuhanga wʼaboso-kulu wetu abiriyisogawe eriminya erisonda liwe, nʼerilangira Oyutunganene, nʼerĩmowa akabũga nʼomulenge wuwe. 15Kusangwa wasyabya mũlangĩrĩ busana naye, eribwira abandu bosĩ ebyo wabirilangira nʼebyo wabĩrĩowa. 16Na lino, ukalinda busana nakĩ kwehĩ? Hangana, ũbatĩsĩbawe, kandi Ulakire erĩna liwe, ebibi byawe byerĩbawe.

Paũlo akabirikirawa erĩkangĩrĩrya Ebihanda

17Neryo monasuba eYerũsalema, kandi nabere ngasabira omo Hekalũ, monalota esyonzolĩ. 18Kandi monalangira Omukama akabũga nage ati, Wanguhe, Ũlũe eYerũsalema yo lũba, kusangwa bandu sĩbendĩrĩga ũkatũla omwatsi busana nage. 19Nage monasũbĩrya nyiti, Mukama, banasĩ ndeke ngoko nabya ngagenda omo manyũmba wʼerĩhĩndanamo nʼerĩswĩrya abakwĩkĩrĩraya nʼerĩhĩrabo omo mũlĩkĩ. 20Kandi omugulu bĩta omũlangĩrĩ wawe ye Setefano, nabya nyimeneho nʼerĩrĩga oluholo luwe, nabya ngateya esyongimba syʼabamwĩta. 21Neryo Omukama mwabũga nage ati, Ugende! Kusangwa nasyakutuma ehali oko Bihanda.

22Nĩkwa bandu mobamuhulikirira erĩhĩka oko kĩnywa ekĩ, neryo mobasumba emirenge yabo bati, Omundu ngʼoyũ alũe omo kihugo, kusangwa siatolere akabyaho! 23Kandi mobabũya olukanda nʼerĩlũsya esyongimba syabo nʼerigusanga olũtũtũ omo kyanya. 24Neryo omukulu wʼabasĩrĩkanĩ elfu mwahana ati, Paũlo aletawe omo nyũmba yʼabasĩrĩkanĩ, kandi mwahana ati aswĩrĩbawe eriminya ekikaleka Abayũda ĩbamũta obogo. 25Nĩkwa babere babimuboha omo bikoba bati bakamũswĩraya, Paũlo mwabwira omukulu wʼerĩgana oyo wabya akahanganaho, ati, Linatolere omo Migambo erĩswĩrya omundu Muroma isialiatonda nʼeritswerwa olubanza kwehĩ? 26Neryo omukulu wʼabasĩrĩkanĩ erĩgana abere owa omwatsi oyo, mwayabwira omukulu wʼamaelfu ati, Ukasonda erikolakĩ kwehĩ? Omundu oyũ ni Muroma! 27Neryo omukulu wʼamaelfu mwasa mwabũga na Paũlo ati, Umbwire, uli Muroma kwehĩ? Paũlo mwasũbĩrya ati, Inga. 28Neryo omukulu wʼeelfu oyo mwabũga ati, Nage nagula eribya Muroma omo bũgũlĩ bunene. Nĩkwa Paũlo mwabũga ati, Ĩngye nabutawa mo Muroma. 29Neryo abandu abasonda erirenga uku Paũlo, mobamũlwĩka lũba, nʼomukulu wʼeelfu mubaha omugulu aminya Paũlo kwʼali Muroma, kusangwa abya ĩnĩabĩrĩmũhĩra omo mahulula.

Paũlo embere wʼerĩbũgĩro

30Nĩkwa engyakya, omukulu wʼabasĩrĩkanĩ oyo mwasonda eriminya ndeke Abayũda nga bakahandĩkĩrĩraya Paũlo yokĩ. Neryo mwamubohola, kandi mwahamula abahererĩ bakulu nʼabʼerĩbũgĩro lyosĩ ati bahĩndane. Neryo mwaleta Paũlo yʼembere syabo.

Currently Selected:

Emĩbĩrĩ 22: KB80

Highlight

Copy