1 Petero 4

Emikolere mihya-mihya

1Neryo kusangwa Kristo abiriagalwa omo mubiri, nenyũ nibya mũyĩsũnze obũlengekanĩa obo, kusangwa oyukagalawa omo mubiri abĩrĩũmbya oko bibi. 2Nĩkwa lino omugulu mukineho omo mubiri, mukwame erisonda lya Nyamuhanga butsira esyongumbu syʼabandu. 3Kusangwa oko mugulu owalaba mwabirikwama endambĩ yingaho amalengekanĩa wʼabatĩkĩrĩrye. Mwabya mukakwama erĩsĩngĩra, nʼesyongumbu, nʼerĩkũnda, nʼeritamira, nʼerĩyalũmba, nʼesyonye syʼesyosanamu. 4Kandi abʼebihanda bakasweka omugulu mutesangira nabo omo syonye syabo syʼeritamira, neryo bakabatsuma. 5Nĩkwa basyakanganĩa Nyamuhanga ebyo bakola, naye asĩkĩre erĩtwa esyombanza syʼabaliho nʼesyʼabaholĩre. 6Kusangwa Engulu Yowene yabĩrĩtũlwa ukwʼabo babirihola, nomo babiritswerwa omo mubiri ngʼabandu bosĩ ko bakatswerawa. Nĩkwa mwatũlayo kubo batoke eribyaho omo kĩrĩmũ ngʼerisonda lya Nyamuhanga.

Abateya bowene bʼolũsũnzo lwa Nyamuhanga

7Endũlĩ yʼemyatsi yosĩ iri hakũhĩ. Neryo mubye nʼobũlengekanĩa bwʼamenge, nʼobwʼerĩyĩteya, imwatoka erisaba. 8Kwilaba emyatsi yosĩ, mũkwe omũhwa wʼerianzana kutsibu, kusangwa olwanzo lũkakũnĩngĩra ebibi bingi. 9Mũkokanaye omo manyũmba wenyũ butsira eriyitonga-tonga. 10Obuli mundu abirihabwa olũsũnzo lwʼomũsĩndo olũkalũa uku Nyamuhanga. Mukolerane omo lũsũnzo olo, ngʼabateya bʼolũsũnzo mĩsĩndomĩsĩndo Nyamuhanga akatuha. 11Oyũkatũlago, atũle ebĩnywa bya Nyamuhanga. Oyukakola omũbĩrĩ, akolego omo maka ago Nyamuhanga akamuha. Neryo omo myatsi yosĩ Nyamuhanga apipawe busana na Yesu Kristo. Olukengerwa nʼobũtokĩ ni biwe kera na kera. Amina.

Eriagalwa busana nʼeribya Mukristo

12Abanze, simusweke busana nʼerirengwako erĩkalĩre erĩkabahĩkako nga ni kindu kyʼehandi busana nenyũ. 13Nĩkwa mutseme kusangwa mukasangira amalĩge wa Kristo. Neryo omugulu olukengerwa luwe lwasyabĩsũlwa, imwatoka eritsema nʼeritsanga. 14Mwamatsumwa kusangwa mukakwama Kristo, muli nʼomũyĩsa, kusangwa Omũlĩmũ wʼolukengerwa, wʼOmũlĩmũ wa Nyamuhanga ĩkere nenyũ. 15Nĩkwa Sihabye mundu omo katĩkatĩ kenyũ oyukagalawa ngʼomwĩtĩ, kutse ngʼomũrahĩ, kutse ngʼomũkolĩ wʼebibi, kutse oyũkayĩhĩra omo myatsi ya bene. 16Nĩkwa omundu amagalwa kusangwa ni Mukristo, sĩakwe esĩsonĩ, nĩkwa apipe Nyamuhanga busana nʼeribya Mukristo.

17Kusangwa omugulu wʼeritswera abandu ba Nyamuhanga abĩrĩhĩka. Neryo eritswera eryo lyamatsũka ũkwʼĩtwe, endũlĩ yʼabandu abatetsomana Engulu Yowene ya Nyamuhanga yasyabya yiti kwehĩ? 18Ngoko Amasako akabũga ati,

Lyamakala busana nʼomundu utunganene erĩlamĩbwa,

Oyutekenga Nyamuhanga, nʼomukolanabi, basyabya bati kwehĩ?

19Neryo abakagalawa busana nʼerisonda lya Nyamuhanga, bahĩre emitima yabo omo byala byʼOmũhangĩkĩ oyuteregula, babye bakakola ekitunganene.

Currently Selected:

1 Petero 4: KB80

Highlight

Copy

Compare