1 Petero 3

Abakalĩ nʼabĩbabo

1Litya nenyũ ĩnywe bakalĩ, mowe abĩba nywe, neryo abatĩowa ekĩnywa kya Nyamuhanga batoke erĩsĩngwa nʼerĩkĩrĩrya busana nʼemigendere yʼabakalĩ babo, isibetabwirwa ekĩnywa nʼekiguma. 2Kusangwa bakalebaya emigendere yenyũ mibuya eyikakenga. 3Nʼobubuya bwenyũ sibubye obwʼeyĩhya, ngʼeriluka esyonzwiri, nʼeriambala emisege yʼesyamagetsi, nʼeriambala emyambalire yowene. 4Nĩkwa obubuya bwenyũ bubye bwʼomutima owali omwisi wʼomundu. Bubye obubuya bwʼekĩrĩmũ ekihehere nʼekyʼobũkũtũ, ekitetsanda. Obubuya obo ni bwʼobũgũlĩ bunene embere sya Nyamuhanga. 5Kusangwa litya kera abakalĩ babũyĩrĩre, abahĩra amaha uku Nyamuhanga, babya bakayĩsũga, nʼerĩowa abĩba wabo. 6Sara naye mwowa Abrahamũ, nʼerimwahula mo mukama. Nenyũ muli bana buwe mwamakola nʼeritendiubaha kindu.

7Nenyũ abĩba wabo nibya, mwĩkale nʼabakalĩ benyũ omo menge, ĩmũnasĩ abakalĩ ko bali bolo. Kandi mũsĩkayebo, kusangwa basyabana haguma nenyũ olũsũnzo lwa Nyamuhanga lwʼengebe, neryo mukole mutya erisaba lyenyũ sĩrĩkakĩrĩbawe.

Amalĩge busana nʼerikola ndeke

8Omo myatsi yosĩ eyĩ tuti, Ĩnywe bosĩ mubye nʼobũlengekanĩa buguma, nʼomutima muguma, mwanzane ngʼabasubeneko, mubye nʼomutima mubuya, kandi mũyĩkehaye. 9Sĩmũtũhũlaye ekibi busana nʼekibi, kutse eritsuma busana nʼeritsuma, nĩkwa kumbe mutsumulebo. Kusangwa Nyamuhanga mwababirikira busana nʼomwatsi oyũ, imwabana eritsumula eryo alaga. 10Ngoko Amasako ati,

Oyo wanzĩre eritsemera engebe, nʼeribana ebiro byowene,

Olulimi luwe lũmbaye erĩbũga ekibi, nʼemĩnywa yiwe yũmbaye eriteba.

11Ahũtatire ekibi, akole ebibuya;

Asonda-sondaye Obuholo, nʼerikwamirirabo.

12Kusangwa ameso wʼOmwami Mukulu akatungerera abatunganene,

Kandi amatwĩ wuwe akowa erisaba lyabo.

Nĩkwa Omwami Mukulu akalola abakola-nabi bʼebitsule.

13Nindi asyabakola nabi mwamabya nʼomũhwa wʼerikola ebibuya kwehĩ? 14Kandi nomo mwangagalwa busana nʼerikola ekitunganene, muli bandu bʼobutseme. Simubahe erĩũbahya lyabo, kandi sĩmũhahũkaye emitima. 15Nĩkwa omo mitima yenyũ mukenge Kristo ngʼomukama wenyũ. Ĩmũnasĩkĩre endambĩ yosĩ erĩsũbĩrya obuli mundu oyũkababũlaya busana nʼamaha ago muli nago. 16Nĩkwa mũmũsũbĩraye bolo-bolo, nʼerimukenga. Kandi mubye nʼobunya-mutima bowene, neryo omugulu bakabanegulira, nʼeritsuma emigendere yenyũ yʼobu Kristo, bĩtawe esĩsonĩ. 17Kusangwa lyowene ndeke imwagalwa busana nʼerikola ebibuya omwʼisonda lya Nyamuhanga, kwilaba erikola nabi. 18Kusangwa Kristo mwahola busana nenyũ engendo nguma nyisa busana nʼebibi. Omundu mutunganene mwahola busana nʼabandu batatunganene, iniatoka erituleta uku Nyamuhanga. Kandi mwĩtwa oko mubiri nĩkwa mwabana engebe omo kĩrĩmũ. 19Kandi mwagenda omo mũlĩmũ, mwayatũlago oko bĩrĩmũ ebiri omo mũlĩkĩ. 20Ebĩrĩmũ ebĩ byabya ĩsĩbĩrĩowa Nyamuhanga, omugulu abya akalindabo omo butaluha oko biro ebyo Noa abya akahĩmba obwato. Nʼomo bwato obo abandu bake, Omunani musa, mobalamĩbwa omo magetsi ayo. 21Omwatsi oyo nĩ kĩsosekanĩo kyʼolũbatĩso busana nʼerilama lyenyũ. Erĩbatĩsya sĩ ʼlũsya lyʼemĩtĩndũ yʼomubiri, nĩkwa ni ʼlaga Nyamuhanga omo bunya-mutima bowene, erĩlamĩbwa busana nʼerĩlũbũka lya Yesu Kristo. 22Yesu Kristo abiriya elubula, kandi ali oko byala byʼamali bya Nyamuhanga; iniabiritabala oko bamalaĩka, nʼabʼehamũlĩ bʼelubula nʼabʼamaka.

Currently Selected:

1 Petero 3: KB80

Highlight

Copy

Compare