1 Petero 2
2
Erĩbwe eriwite engebe, nʼekihanda kĩbũyĩrĩre
1Neryo mũyĩlũsaye kwʼebibi byosĩ, nʼeribiha lyosĩ, nʼerĩyĩtendererya, nʼeritsura, nʼerirega abandi ryosĩ. 2Mubye ngʼesyomekeke, imukasonda kutsibu amasabũ agowene busana nʼomutima, imwatoka eriusuka busana nʼerilama. 3Ngoko kĩsakĩre kiti, Mwabĩrĩgerya oko bubuya bwʼomukama.
4Neryo mwase oko Mukama oyuli erĩbwe eriwite engebe, eryaganawa nʼabandu, nĩkwa eryayisogawa na Nyamuhanga, ngʼerĩbwe eryʼobũgũlĩ bunene. 5Mwase ngʼamabwe awawite engebe, mũhĩmbawe mo hekalũ yʼekĩrĩmũ, mubye abahererĩ babũyĩrĩre, abakaherera esyohongo syʼekĩrĩmũ busana na Yesu Kristo, esĩkatsemesaya Nyamuhanga. 6Kusangwa Amasako akabũga ati,
Lebaya ngahĩmba eSĩonĩ, erĩbwe nayisoga,
Erĩbwe ryʼenũnga, eryʼobũgũlĩ bunene,
Nʼoyũkamwĩkĩrĩraya sĩendĩsyakwa esĩsonĩ.
7Erĩbwe erĩ, nĩ ryʼobũgũlĩ bunene busana nenyũ abakĩkĩrĩraya. Nĩkwa busana nʼabatĩkĩrĩraya, ati,
Erĩbwe eryo bahĩmbĩ babana nga ni buyira,
Lyabiribya erĩbwe erĩkatũngananaya enũnga yʼenyũmba.
8Kandi Amasako ati,
Nĩ rĩbwe lyʼerĩtwĩkalya abandu,
Nĩ rĩbwe lyʼerĩtoya abandu.
Bakatwĩkala kusangwa mobatĩkĩrĩrya ekĩnywa; kandi lyabya erisonda lya Nyamuhanga.
9Nĩkwa ĩnywe muli kihanda ekyayisogawa, abahererĩ bʼobwami, ekihanda kĩbũyĩrĩre, abandu ba Nyamuhanga, imwatoka erĩkangya emĩbĩrĩ mibuya ya Nyamuhanga, oyo wababirikira erĩlũa omo mwĩrĩmya nʼeriingira omo kyakakala kiwe kyʼeriswekera. 10Kusangwa Simwabya bandu, nĩkwa lino muli bandu ba Nyamuhanga; mwabya isimwetabana eriganyira lya Nyamuhanga, nĩkwa lino mwabiribana eriganyira liwe.
Abagombe ba Nyamuhanga
11Abanze betu, ngabalemba-lemba ngʼababunga nʼabagendĩ, mugane erikwama esyongumbu syʼomubiri esikalwa nʼomutima. 12Muyire emigendere mibuya omo katĩkatĩ kʼEbihanda, neryo nomo bangabatsuma ngʼabakola-nabi, nĩkwa omugulu bakalangira emĩbĩrĩ yenyũ mibuya, ibapipa Nyamuhanga oko kiro kyʼeritswerwa.
13Mowe abatabalĩ ba muna-kihugo busana nʼOmukama, kutse ni mwami oyuwite ehamũlĩ yosĩ, 14kutse abatabalĩ bakulu buwe abakatumawa erisuyira abakola-nabi nʼeripipa abakakola ndeke. 15Kusangwa erisonda lya Nyamuhanga liti omwʼikola ndeke mũsĩnge ebĩnywa bitya-bitya byʼabandu bakĩrũ. 16Mukole ngʼabandu bʼobwĩranda nĩkwa Simuyire obwĩranda bwenyũ ngʼekindu kyʼerĩbĩsa ekibi, mubye bakobe ba Nyamuhanga. 17Mũsĩkaye abandu bosĩ. Mwanze abalĩkyetu Abakristo, mukenge Nyamuhanga, kandi mũsĩkaye omwami.
Eriagalwa lya Kristo
18Abagombe, mubye mũkowa abakama benyũ nʼerikengabo ndeke, butsira abakama babuya nʼabʼomutima molo basa, nĩkwa abakama bakalĩre. 19Omundu akasĩmawa na Nyamuhanga amayĩyĩnĩa omo bulĩge ate ko lubanza, kusangwa akakola erisonda lya Nyamuhanga. 20Nĩkwa endũndĩ ni yahi mwamayĩyĩnĩa omugulu bakabahũnza busana nʼebibi mukakola kwehĩ? Nĩkwa mwamakola ndeke, neryo mũkayĩyĩnĩa omugulu mukagalawa, Nyamuhanga asyabatsumula busana nʼekyo. 21Kusangwa Nyamuhanga ababirikira busana nʼomwatsi oyũ. Kusangwa Kristo nibya mwagalwa busana nenyũ, neryo mwabasĩgĩra olugobe olo mwangakwama. 22Ngoko kĩsakĩre kiti, Mwatakola ekibi, kutse amatebo mwatabanika omo mĩnywa yiwe. 23Kandi omugulu atsumawa, mwataswatsumabo, omugulu agalawa mwatũbahya, nĩkwa mwayĩhĩra omo byala byʼoyukatswera ebitunganene, ye Nyamuhanga. 24Kristo ĩyowene-wene mwaheka ebibi byetu omo mubiri wuwe oko musalaba, itwatoka erihola oko bibi, nʼeribyaho busana nʼekitunganene; kusangwa mwalamĩbawa omo mĩbĩbũ yiwe. 25Kusangwa mwabya ngʼesyombũlĩ esyatala, nĩkwa lino mwabirisuba oko Mũlĩsya nʼomũteya wʼemitima yenyũ.
Currently Selected:
1 Petero 2: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
