Ilawi 19

Nkitanapat e sinyatisho o supat

1Nejoki Olaitoriani Musa, 2#Ilaw 11.44-45; 1 Pet 1.16 “Tiaaki olturrur pooki loo ltung'ana le Israel, iakuku intae sinyat; amu ore nanu Olaitoriani Enkai inyi naa kara sinyati. 3#Ena 20.8,12; Enkig 5.12,16 Nchoo eyanyit pooki ng'ae te intae ng'otonye o menye, nimbung'ubung'u sabatoni aainei: Ara nanu Olaitoriani Enkai inyi. 4#Ilaw 26.1; Ena 20.23, 34.17; Enkig 27.15 Emimbelekenyakino nkitanyaanyukot aashu intobirakiki ate nkaitin oo ntokitin naasholuno: Ara nanu Olaitoriani Enkai inyi.

5“Tenintarasaa olasar loo nkishorot e seriani aaisho Olaitoriani, entarasai intae pee etumi aatang'amai intae. 6Neinosi ina olong ake nintarasaitie, aashu taisere, ore pooki toki naleku ometaa enkolong e uni nepuoi aapejoo te nkima. 7Teneinosi ninye penyo te nkolong e uni, naa olminong; meitokini aang'amaa, 8ore pooki ng'ae oinos nenap entorroni enye, enkaraki naisarkionie ninye entoki sinyati o Laitoriani; ore ilo tung'ani neiwuang'ieki too ltung'ana lenye.

9 # Ilaw 23.22; Enkig 24.19-22 “Tenisampu enkurma nituturo te nkop ino, nimisampu aitabaiki ineebayie nimishuko alo agilu lelo ng'osil ootung'uayioki. 10Miishu ilng'anayio to sabibu lino, nimisotu lelo ootusulari to sabibu lino. Tung'uai ninche te nkaraki ilaisinak o tenkaraki olomoni. Ara nanu Olaitoriani Enkai ino.

11 # Ena 20.15,16; Enkig 5.19,20 “Mipurrisho, nimiasisho te sunkureisho, nemilej oltung'ani olikae. 12#Ena 20.7; Enkig 5.11; Mat 5.33 Niminosinoso ilmuma te nkarna ai te sunkureisho, pee misarkionienie enkarna e Nkai inyi. Ara nanu Olaitoriani.

13 # Enkig 24.14-15 “Mintorogony o lelatia ino aashu ipur ninye. Mincho olmushaara lo sinka lino eirrag te nkaji ino enkewarie pooki o mekenyu. 14#Enkig 27.18 Midek oltung'ani ming'ani nimipikaki oltung'ani modooni entoki narror, kake turia Enkai ino. Ara nanu Olaitoriani.

15 # Ena 23.6-8; Enkig 16.19 “Mipik enyorrakinoto endung'oto enkiguana, mipik olkep olaisinani nimiureyu ilo kitok, kake te sipata tudung'oki enkiguana olelatia ino. 16Milo iyie idie o idie anaa olaitang'oroni tiatua iltung'ana linono, nimintashe iyie aitang'or enkishui o lelatia ino: Ara nanu Olaitoriani.

17 # Mat 18.15 “Mimbayu olalashe lino tiatua oltau lino kake entoning'oto pee minap ake eng'oki te nkaraki ninye. 18#Mat 5.43, 19.19, 22.39; Mk 12.31; Lk 10.27; Irm 13.9; Ilg 5.14; Yko 2.8 Mintalaku ake elap aashu iata enkiba tiatua oltau tialo ilayiok loo ltung'ana linyi, kake tonyorra olelatia ino anaa kewan ino. Ara nanu Olaitoriani.

19 # Enkig 22.9-11 “Embung'a nkitanapat aainei, miputokiki nkishu inyi iloing'ok loo mpukunot naapaasha, nimiun tiatua enkurma ino mpukunot are oo lanterera niminchop olkila oripa too mpukunot are oo nkarash.

20“Teneboitare olee enkitok nara errindik natisira, likae lee neton eitu elakuni aashu eishoori ae toki, nejurri ina bae, neari ninche metuata, enkaraki naa errindik ina kitok. 21Kake keyau ilo lee enkishoroto o lasar le nkitarruorroto ayaki Olaitoriani, kutukaji eilo ng'obor le ntumo, neyau ninye olmeregesh metaa olasar le nkitarruoroto. 22Neitoki olapolosani aitobir olning'o lo sotua te nkaraki ninye teilo meregesh lo lasar le nkitarruorroto te dukuya Olaitoriani te nkaraki ina ng'oki nataasa ninye; ore ina ng'oki nataasa ninye nepalakini.

23“Tenipuopuo kenya aajing ina kop niunuunu mpukunot pooki oo lkeek te nkaraki endaa, niyiolouu lelo ng'anayio lenye aajo etomitikioki intae ilarin okuni, minosinoso ninche. 24Ore to lari liong'uan nesinyayu ilng'anayio lenye pooki, enkishoroto enkisisa to Laitoriani. 25Kake ore to lari le imiet nindimidimi aainosa ilng'anayio lenye, pee etum aaishoo intae emponaroto sapuk. Ara nanu Olaitoriani Enkai inyi.

26 # Enk 9.4; Ilaw 7.26-27, 17.10-14; Enkig 12.16,23, 15.23, 18.10 “Minosinoso pooki toki natii osarge atua. Emimbonishorere nimisiaishore ntaleng'o. 27#Ilaw 2.5; Enkig 14.1 Emintamanaa endung'oto oo lpapit loo lmowuarak loo lukuny inyi nimibarnibarna mbat oo lmunyo linyi. 28Eming'am iseseni linyi te nkaraki iloo tuata aashu imishiriri ate: Ara nanu Olaitoriani.

29 # Enkig 23.17 “Misarkionie entito ino aisho metaa emulayoi, meiput ake enkop entorroni e nkiborra oo nkonyek neaku enkop enabore esuujisho. 30#Ilaw 26.2 Embung'a sabatoni aainei niyanyititi enkaji ai Sinyati. Ara nanu Olaitoriani.

31 # Enkig 18.11; 1 Sam 28.3; 2 Ilai 23.4; Isa 8.19 “Emipuopuo aaikilikuanishore iltungana ooirorie loiriruani loo lootuata aashu lasakutok. Emipuopuo aaing'oru ninche, aaisarkionie ate te ninche: Ara nanu Olaitoriani Enkai inyi.

32“Tudumunye iyie te dukuya lelo ooibor lukuny, iyanyita oltung'ani moruo naa turia Enkai ino. Ara nanu Olaitoriani.

33 # Ena 22.21; Enkig 24.17-18, 27.19 “Teneidurru oltung'ani omoni alotu amany enkop ino mintaas ninye entorrono. 34Ore ilo omoni likindurraka naa keyooki atiu anaa oinoti tiatua intae, naa tonyorra naa ninye anaa kewan. Amu irara sii apa intae ilomon te nkop e Misiri: Ara nanu Olaitoriani Enkai inyi.

35 # Enkig 25.13-16; Ndung 20.10; Esek 45.10 “Mias entorrono te ndung'oto e nkiguana, te ntemata enkadoro aashu te nkineneng enkiroishi aashu te nkumoi. 36Ng'oru ntemeta nemetii elejare o entemata e nkiroishi nemetii elejare, o soito le nkiroishi leme le lejare efa nairirikino o hini nairirikino. Ara nanu Olaitoriani Enkai ino, oyawua intae aitupuku te nkop e Misiri. 37Embung'a naa nkiguanat aainei pooki o nkitanapat aainei pooki niasiasa ninche. Ara nanu Olaitoriani.”

Currently Selected:

Ilawi 19: MBS

Highlight

Copy

Compare