Ilawi 20
20
Enkitalaata te nkaraki engolon e nkong'u
1Nejoki Olaitoriani Musa, 2“Tiaaki iltung'ana le Israel ore pooki tung'ani loo ltung'ana le Israel aashu o le lelo omon ooidurrakita aamany atua Israel, oishooyo nabo oo nkera enyena aaisho Molek neari metua; ore iltung'ana lena kop near ninye too soito. 3Nanu kewan oibelekenyakino aipirakinore ilo tung'ani naiwuang'ie nanu ninye tiatua iltung'ana lenyena, enkaraki naishooyie nabo oo nkera enyena aisho Molek, nepik enkaji ai entioto neisarkionie enkarna ai sinyati. 4Naa teneisudoo iltung'ana leina kop ilo tung'ani ina kata eishooyo nabo oo nkera enyena aisho Molek, neany ear ninye metua, 5naibelekenyakino nanu aarare ilo tung'ani naarare olmarei lenye, naitayu nanu ninche aiwuang'ie tiatua iltung'ana lenye, ninye o lelo pooki oosujita ninye te nkiborra oo nkonyek e sujata e Molek.
6“Teneibelekenyakino oltung'ani ltung'ana oirorie iloiriruani o lasakutok, aiborrie onyek te ninche, naibelekenyakino nanu ilo tung'ani aarare naitayu nanu ninye aiwuang'ie tiatua iltung'ana lenye. 7Entisinya naa ate niakuku sinyat, amu ara nanu Olaitoriani Enkai inyi. 8Embung'a nkiguanat aainei, niasiasa ninche, Ara nanu Olaitoriani oitisiny intae. 9#Ena 21.17; Mat 15.4; Mk 7.10 Amu ore pooki ng'ae odek menye aashu ng'otonye neari metua; etedia ninye menye aashu ng'otonye, neaku ore osarge lenye shumata ninye etii.
10 #
Ena 20.14; Ilaw 18.20; Enkig 5.18 “Teneloloito oltung'ani te nkitok o lelatia enye, ore pokira olee o enkitok natololoitare neari metuata. 11#Ilaw 18.8; Enkig 22.30, 27.20 Ore ilo tung'ani oboitare te loloito enkitok e papaai lenye netaboluo nkilani e papaai lenye, ore ninche pokira are neari metuata, ore osarge lenye neaku shumata ninche etii. 12#Ilaw 18.15 Ore olee oboitare enkitok o layioni lenye, neari pokira are metuata; etaasa ninche embae busus, ore osarge lenye neaku shumata ninche. 13#Ilaw 18.22 Teneboitare olee olikae lee anaa enkitok, ore ninche pokira netaasa olminong, naa keari ninche metuata, ore osarge lenye neaku shumata ninche. 14#Ilaw 18.17; Enkig 27.23 Teneyam oltung'ani entito o ng'otonye tenebo, naa entorroni ina, naa kepejori ninche te nkima, ilo lee o nena kituaak, pee meitoki esuujisho atii atua intae. 15#Ena 22.19; Ilaw 18.23; Enkig 27.21 Teneboitare oltung'ani eng'ues aloloitore, neari ninye metua, ore ina ng'ues neari metua. 16Teneing'oru enkitok eng'ues aboitare te loloito neari ina kitok metua ore ina ng'ues neari ninye metua ore osarge lenye neaku shumata ninche etii.
17 #
Ilaw 18.9; Enkig 27.22 “Teneyam oltung'ani enkanashe enye, ina nang'arie menye, aashu enkanashe nangarie kina, nelo ninye aboitare nedol olee emasipaisho enye nedol entito emasipaisho olee naa embae e sulare ina, naa keiwuang'ieki ninche te dukuya nkera olorere lenye; etaboluo ninye nkilani enkanashe enye, naa kenap ninye entorroni enye. 18#Ilaw 18.19 Teneboitare olee enkitok eata emuoyian enye, nebolu nkilani enyena, netusula ninye erukunoto enye, neitalioo ninye erukunoto osarge lenye; ore ninche pokira are naa keiwuang'ieki tiatua iltung'ana lenye. 19#Ilaw 18.12-14 Mintalioo ake emasipaisho enkanashe yieyioo lino aashu ene nkanashe papaai lino, amu ore ina naa nkilani itooruo oltung'ani le sotua lo lmarei; naa kenap ninche entorroni enye. 20Teneboitare oltung'ani enkitok olenkapu lenye, naa kenap ninche eng'oki enye, neye eitu etum nkera. 21#Ilaw 18.16 Teneya oltung'ani enkitok olalashe lenye naa embae nemesinya ina netaboluo ninye nkilani olalashe lenye nemetum ninche nkera.
22“Embung'a naa nkitanapat aainei pooki o nkiguanat aainei pooki, niasiasa ninche paa ore ina kop nariku nanu intae entamany nemelopu intae aitayu. 23Nimipuopuo aasujaa olkerreti leilo orere laaraa nanu te dukuya intae, amu etaasa apa ninche kuna baa pooki naibayie nanu ninche. 24Kake atiaaka nanu intae, ‘Ijung'ujung'u intae enkop enye, naa kaisho nanu intae metaa eninyi, ina kop naruko kule o naishi.’ Ara nanu Olaitoriani Enkai inyi, otirishua intae aitung'uaa loreren. 25Enoto naa entirishu eng'ues nasinyari o enemesinyari, o te motonyi nasinyari o enemesinyari, emindurukie naa ate te ng'ues aashu emotonyi aashu tiae toki naikurtutari te nkop, apa natorishie nanu intae nchere mesinyari. 26Entaa intae sinyat te nkaraki nanu; amu ore nanu Olaitoriani naa kara sinyati natirishua intae aitung'uaa iloreren, pee itumutumu aataa ilkulainei.
27“Ore olee aashu enkitok nairorie oltung'ani otua aashu esakutisho neari metua, neari ninche too soito, ore osarge lenye neaku shumata ninche etii.”
Currently Selected:
Ilawi 20: MBS
Highlight
Copy
Compare
Share
Want to have your highlights saved across all your devices? Sign up or sign in
The Bible in Maasai © United Bible Societies, 1991.
