Mathayo 9
9
Yesu ochango jaathany
(Mariko 2.1-12; Luka 5.17-26)
1Yesu noidho yie, modok loka machielo, mi odhi dalagi. 2Ji moko nokelo ng’at man gi tuo athany ire, koting’o e ng’angu. Kane Yesu oneno yie ma jogo nigo, nowacho ni ng’atno niya, “Bed gi kue! Richoni oweni.”
3To jopuonj Chik moko noparo e chunygi giwegi ni, “Jali yanyo Nyasaye!” 4To Yesu nong’eyo gima giparo, omiyo nowachonigi niya, “Mar ang’o uparo gik maricho kamago e chunyu? 5Ere gima yot kuom weche ariyogo? Wacho ni ‘Richoni oweni’? Koso wacho ni, ‘Chung mondo iwuothi idhi’? 6To koro abiro nyisou adier ni Wuod Dhano nigi teko mar weyo ni ji richo e piny ka.” Eka nowacho ni ng’at matuono niya, “Chung’ ikaw ng’anguni, mondo idog dala.” 7Ng’atno nochung’, modhi dala. 8Kane ji oneno gima otimore, ne giluor, mi gipako Nyasaye kuom miyo dhano teko ma kamano.
Yesu oluongo Mathayo
(Mariko 2.13-17; Luka 5.27-32)
9Yesu noa kanyo, kendo kane oyudo owuotho, noneno jasol osuru moro miluongo ni Mathayo, kobet kar solo osuru. Yesu nowachone ni, “Luwa!” mi Mathayo noa malo, moluwe.
10 #
Luka 15.1, 2. Bang’e, kane Yesu chiemo e od Mathayo, josol osuru mang’eny kod joricho nobiro, mochiemo kode, kaachiel gi jopuonjrene. 11Jo-Farisai moko noneno kamano, mi openjo jopuonjrene ni, “Ere gimomiyo japuonju chiemo gi josol osuru kod joricho?” 12To Yesu nowinjo ka gipenjo kamano, omiyo nowachonigi niya, “Joma ngima ok dwar jathieth, to mak mana joma tuo ema dwaro. 13#Math 12.7; Hos 6.6.Dhiuru mondo upuonjru tiend gima muma wacho ni, ‘Ok adwar mondo ji otimna misango, to adwaro mana ni mondo gibed mang’won.’ Ne ok abiro mondo aluong joma kare, to abiro mana ni mondo aluong joricho.”
Wach tueyo chiemo
(Mariko 2.18-22; Luka 5.33-39)
14Bang’e jopuonjre mag Johana Jabatiso nobiro ir Yesu, mopenje niya, “Ere gima omiyo wan gi jo-Farisai watueyo chiemo pile, to jopuonjreni to ok tim kamano?” 15Yesu nodwokogi niya, “Uparo ni wend kisera nyalo bedo mokuyo, ka wuon kisera pod ni kodgi? Ngang’! Mano ok nyalre! To ndalo biro ma nogolie wuon kisera kuomgi, eka ginitue chiemo.
16“Onge ng’ama nyalo bawo law moti gi rabaw manyien, nikech rabawno dijow lawno, mi med yieche moloyo. 17Bende divai manyien mapok ochiek ok nyal ol e ndede moti, nikech ka otim kamano, to ndede diyiechi, mi kethre, kendo divai pukre. Kuom mano, divai manyien iolo mana e ndede manyien, eka divai gi ndede ok kethre.”
Nyar Jairo kod dhako mane omulo law yesu
(Mariko 5.21-43; Luka 8.40-56)
18Kane pod Yesu wachonigi wechego, jaduong’ od lemo moro nobiro ire, mogoyo chonge piny, kawachone niya, “Nyara oa tho sani, to yie ibi iket lweti kuome, mondo obed mangima.” 19Omiyo Yesu noa malo, moluwe. Jopuonjrene bende nodhi kode.
20To dhako moro mane iye osechuer kuom higni apar gariyo nosudo gi yoka ng’e Yesu, momulo riak lawe, 21kawacho e chunye niya, “Ka amulo kata mana riak lawe kende, to abiro chango.” 22Yesu nolokore, moneno dhakono, mi owachone niya, “Nyara bed gi kue. Yieni ema omiyo ichango.” Kamano dhakono nochango mana gikanyono.
23Kane Yesu ochopo e od jaduong’no noyudo ji ka goyo asili, kendo ywak malit. 24Nowachonigi niya, “Wuoguru uduto! Nyako ok otho, to onindo aninda.” To giduto ne ginyiere anyiera. 25Eka kane osegol ji oko, Yesu nodonjo e ot, kuma nyako nitiere. Ne omako bade, mi ochung’. 26Bang’e humb wachno nolandore e gweng’no duto.
Yesu ochango muofni ariyo
27Yesu noa kanyo, to kane oyudo owuotho odhi, muofni ariyo nochako luwe, ka kok niya, “Wuod Daudi, yie ikechwa!” 28Bang’e kane Yesu odonjo e ot, muofnigo nobiro ire, mi openjogi niya, “Uyie ni an gi teko mar timo gima ukwayono?” Ne gidwoke ni, “Ee, jaduong’, wayie.” 29Eka Yesu nomulo wengegi kawacho niya, “Kaka yieu obet, e kaka mondo otimrenu!” 30Gikanyono wengegi noyawore, to Yesu nokwerogi matek ni kik ginyis ng’ato wachno. 31To kata kamano, kane gia kanyo, ne gidhi gilando humb Yesu e gweng’no duto.
Yesu ochango ng’ama momo
32E kinde mane jogo dhi, jomoko nokelo ng’ato ma jachien oloko momo ir Yesu. 33To ka ne oseriemb jachiendno, ng’atno nochako wuoyo. Ji duto nowuoro, kawacho ni, “Nyaka nene, pok wanenoe gima kama e Israel!” 34#Math 10.25; 12.24; Mar 3.22; Luka 11.15.Jo-Farisai to nowacho niya, “Ruodh jochiende ema miye teko mogologo jochiende.”
Yesu okecho ji
35 #
Math 4.23; Mar 1.39; Luka 4.44. Bang’ mano, Yesu nowuotho e mier madongo gi matindo duto, kapuonjo ji e utgi mag lemo. Nolando Wach Maber mar Loch Nyasaye, kendo nochango tuoche duto mopogore opogore. 36#Kwan 27.17; 1 Ruo 22.17; 2 W.Nda 18.16; Ezek 34.5; Mar 6.34.Kane oneno ji kaka ng’eny, nokechogi, nikech ne gichandore, kendo gidiwo mana ka rombe ma onge jakwath. 37#Luka 10.2.Omiyo nowacho ni jopuonjrene niya, “Cham ochiek mathoth, to jokeyo ema nok. 38Emomiyo kwauru wuon puodho mondo oor jotich odhi okane cham.”
Currently Selected:
Mathayo 9: DHO15
Highlight
Share
Copy
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.