Mathayo 27

Oter Yesu e nyim Pilato

(Mariko 15.1; Luka 23.1-2; Johana 18.28-32)

1Kane piny oru gokinyi mang’ich, jodong oganda nopimo wach kaka digineg Yesu. 2Eka ne gitueye mi gigole kanyo, gitere ir Pilato, ruoth mane jo-Rumi oketo.

Tho mar Judas

(Tich Joote 1.18-19)

3 # Joote 1.18, 19. Kane Judas, jandhok Yesu oneno ni oseng’ad ni Yesu buch tho, chunye nodoko malit ahinya, nodwoko siling’ piero adek kande ni jodolo madongo kod jodong oganda, 4kowachonigi niya, “Asetimo richo kuom ndhogo remo ma onge ketho.” To ne gidwoke ni, “Mano obadho mana in! Ok en wachwa.” 5Kane Judas owinjo kamano, nowito pesago e Hekalu, modhi odere. 6Jodolo madongo nokawo pesago, kawacho e kindgi niya, “Chik ok oyie mondo oket pesagi kar keno mar Hekalu, nikech gin pesa remo.” 7Omiyo ne gipimo wach, mi ging’iewo puoth jachue agulni gi pesago mondo obed kama inyalo yikoe joma welo. 8Mano emomiyo puodhono iluongo ni Puoth Remo nyaka chil kawuono.

9 # Zek 11.12, 13. Kamano gima ne Jeremia janabi okoro notimore. Nosekoro niya, “Ne gikawo siling’ piero adek, ma en nengo mar ng’at mane jo-Israel moko ogoyo nengone, 10mi ging’iewo puoth jachue agulni, kaka ne Ruoth Nyasaye ochika.”

Pilato oyalo Yesu

(Mariko 15.2-5; Luka 23.3-5; Johana 18.33-38)

11Yesu koro noter e nyim ruoth Pilato, mi ruoth nopenje niya, “In e ruodh jo-Yahudi koso?” Yesu to nodwoke ni, “In ema isewacho kamano.” 12To kane jodolo madongo gi jodong oganda ochung’ donjone, to ne ok odwoko gimoro. 13Eka Pilato nowachone niya, “Donge iwinjo weche madongo ma jogi donjonigogi?” 14To Yesu ne ok odwoko kata wach achiel, omiyo ruoth nowuoro ahinya.

Ong’ad ni Yesu buch tho

(Mariko 15.6-15; Luka 23.13-25; Johana 18.39—19.16)

15To higa ka higa e Sap Pasaka, ruoth ne gonyo ng’at achiel ma ji okwaye kuom joma otue. 16To ndalogo noyudo nitie ng’at motue marahuma, ma nyinge Yesu Baraba. 17Omiyo kane ji osechokore kanyakla, Pilato nopenjogi niya, “Ng’ano mudwaro mondo agonynu, Yesu Baraba, koso Yesu miluongo ni Mesia?” 18Nowacho kamano nikech nong’eyo maber ni gitero Yesu ire mana nikech nyiego.

19Kane oyudo obet e kom ng’ado bura, chiege noorone wach niya, “Kik imul wach ng’at makareno, nikech wachne nende ochanda ahinya e lek gotieno.” 20To noyudo jodolo madongo gi jodong oganda osesemo ji mondo okwa Pilato ogonynigi mana Baraba, to Yesu mondo onegi. 21Emomiyo kane ruoth openjogi ng’at mane gidwaro mondo ogonynigi kuom ji ariyogo, to ne gidwoke ni, “Gonynwa Baraba!” 22Eka Pilato nopenjogi ni, “To ka kamano, to atim ang’o gi Yesu miluongo ni Mesia?” Giduto ne gidwoke niya, “Gure e msalaba!” 23To nochako openjogi ni, “Ere gima rach mosetimo, momiyo onego ogure?” To ne gimedo kok moloyo, ka giwacho ni, “Gure!” 24#R.Chik 21.6-9.Kane Pilato oneno ni ok ginyal yie kode, kendo tulo ema dwaro wuok, nokawo pi, mologo e nyim ji, kowacho niya, “An aonge bura kuom remb ng’atni. Mano en wachu!” 25To ji duto nodwoko niya, “Rembe mondo obed e wiwa, kendo e wi nyithindwa.” 26Eka Pilato nogonyonigi Baraba, kendo kane osegolo chik mochwad Yesu malit, nochiwe mondo ogure e msalaba.

Askeche ocharo Yesu

(Mariko 15.16-20; Johana 19.2-3)

27Bang’e askeche ruoth nokawo Yesu, motero e laru mar od ruoth, mi gichoko askeche duto, molwore. 28Ne gilonyo lepe, mi girwakone kandhu makwar. 29Bende ne giloso osimbo mar kudho mi gisidhone e wiye. Eka ne giketo luth e lwete korachwich, ka gichare, kendo giwachone niya, “Ruodh jo-Yahudi mondo odag aming’a!” 30Ne ging’udho kuome olawo, kendo ne gikawo ludh cha, mi gichwadogo wiye. 31Kane gisetieko chare kamano, ne gilonyo kandhu oko kuome, mi girwakone lepe owuon. Eka ne gitere oko mondo gigure e msalaba.

Ogur Yesu e msalaba

(Mariko 15.21-32; Luka 23.26-43; Johana 19.17-27)

32Kane giwuok oko, ne ginwang’o ja-Kurene moro ma nyinge Simon, mi gichuno mondo oting’ni Yesu msalape. 33Kane gisechopo kama iluongo ni Golgotha, tiende ni ‘Kar Hanga Wich’, 34#Zab 69.21.ne gimiyo Yesu divai moruw gi yath makueyo rem mondo omadhi to kane osebile, notamore madhe. 35#Zab 22.18.Eka ne gigure, mi gipogore lepe gi ombulu. 36Bang’ mano ne gibet piny kanyo ka girite. 37Wach modonjnego, mawacho ni, “JALI E YESU, RUODH JO-YAHUDI”, noket e wi msalaba malo. 38Jomecho moko ariyo bende nogur kode, achiel e bathe korachwich, to machielo e bathe koracham.

39 # Zab 22.7; 109.25. Joma ne kadho kanyo nojaro Yesu, katwenyone umgi, 40#Math 26.61; Joh 2.19.kendo wachone niya, “In mane iwacho ni ibiro muko Hekalu, mi ichak iger bang’ ndalo adek, koro resri ane, ilor ia e msalaba, ka in Wuod Nyasaye adier!” 41Kamano bende e kaka jodolo madongo gi jopuonj Chik kod jodong oganda nochare, kawacho niya, 42“Noreso jomoko, to en koro dak oresre? Donge en ruodh Israel? Koro mondo olor ane oa e msalaba, eka wayie kuome. 43#Zab 22.8.Osebedo ka ogeno kuom Nyasaye mondo orese ane kohero, nikech nowacho ni en Wuod Nyasaye!” 44Jomecho mane ogur kode bende noyanye mana kamano.

Tho mar Yesu

(Mariko 15.33-41; Luka 23.44-49; Johana 19.28-30)

45Piny duto notimo mudho, chakre sa auchiel nyaka sa ochiko, 46#Zab 22.1.kendo kar sa ochikono Yesu nokok matek niya, “Eli, Eli, lama sabakthani?” tiende ni, “Nyasacha, Nyasacha, iweya nang’o?” 47Jomoko mane ochung’ kanyo nowinjo wechego, mowacho niya, “Ng’atni luongo Elija.” 48#Zab 69.21.To ng’at achiel kuomgi noringo piyopiyo, mokawo sipanj, onyumo e kong andwayo. Eka nochwowo sipanjno e dho odundu motero e dho Yesu gi odunduno mondo onyodhi. 49Jomoko to nowacho niya, “Weuru wane ane ka Elija biro biro rese.” 50To Yesu nochako okok matek, eka noweyo chunye owuok, motho.

51 # Wuok 26.31-33. Gikanyono nanga mane ogeng’o Kama Ler mar Hekalu noriedore diere ariyo, chakre malo nyaka piny. Piny noyiengni, kendo lwendni nobarore. 52Liete bende noyawore, kendo jo Nyasaye mang’eny mane osetho nochier. 53Bang’ chier Yesu, jogo nowuok e lietegi, modhi Jerusalem, Dala Maler, mi ji mathoth onenogi kuno.

54Kane jaduong’ lweny kod joma ne konye rito Yesu oneno kaka piny yiengni, kendo kaka gik moko timore, ne gibedo maluor ahinya, mi giwacho niya, “Adier, ng’atni ne en Wuod Nyasaye!”

55 # Luka 8.2, 3. Mon mang’eny bende ne ni kanyo, ka ng’icho gi chien. Ne gisebedo ka giluwo Yesu, ka gitiyone. 56Kuomgi kanyo ne nitie Maria nyar Magdala, gi Maria min Jakobo gi Josef, kod min Yawuot Zebedi.

Yik mar Yesu

(Mariko 15.42-47; Luka 23.50-56; Johana 19.38-42)

57Kane piny ochopo odhiambo, ja-Arimathaya moro ma jamoko ma nyinge Josef nobiro. En bende ne en japuonjre Yesu. 58Nodhi ir Pilato, mokwaye mondo omiye ringre Yesu, mi Pilato nogolo chik mondo omiye. 59Josef nokawe, moboye gi nanga maler, 60eka nokete e bur manyien, mane osekunyo ariwa e kor lwanda. (En bur mane oloso mondo chieng’ moro oyikee, kotho.) Bang’e nong’ielo kidi maduong’ moloro dho bur, mi oa odhi. 61Maria nyar Magdala gi Maria machielo ne ni kanyo, kobet momanyore gi liel.

Askeche rito liel

62To kinyne, mane en chieng’ maluwo bang’ chieng’ Ikruok, tiende ni chieng’ Sabato, jodolo madongo gi jo-Farisai nochokore modhi ir Pilato, mowachone niya, 63#Math 16.21; 17.23; 20.19; Mar 8.31; 9.31; 10.33, 34; Luka 9.22; 18.31-33.“Ruoth, wanyalo paro ni kane jawuondno pod ngima, nowacho ni obiro chier bang’ ndalo adek. 64Kuom mano, gol chik mondo orit liel maber nyaka chop ndalo mar adek, nono to jopuonjrene obiro mokwalo ringre, mi bang’e digiwach ni ji ni, osechier oa kuom joma otho. Kamano wuond machien dibed marach moloyo mokwongo”. 65Pilato nowachonigi niya, “Ee, kawuru askeche, udhi urit liel maber kaka unyalo.” 66Kuom mano ne gidhi, mi girito liel maber. Ne giketo kido kuom kidi mane olorgo dho liel, kendo ne giweyo askeche karito.

Currently Selected:

Mathayo 27: DHO15

Highlight

Compare

Copy