Mathayo 13

Ngech jachuoyo

(Mariko 4.1-9; Luka 8.4-8)

1Chieng’ onogo, Yesu nowuok e ot, mi odhi obet piny e dhonam, kapuonjo ji. 2#Luka 5.1-3.Oganda mane ochokore molwore ne duong’ ahinya, omiyo nodonjo e yie, mobetie, ka ji to ochung’ gi oko e dhowath. 3Noloso kodgi gi ngeche kuom weche mang’eny.

Nowachonigi niya, “Ng’at moro ne odhi chuoyo, 4kendo kane oyudo ochuoyo, kodhi moko nolwar e wang’yo, mi winy obiro mochamo. 5To kodhi moko nolwar kama otimo lwanda, ma lowo operoree, mi ne gitwi piyo, nikech lowo ne ok tut. 6Bang’e chieng’ nowuok, mowang’o cham mapod tindogo, kendo kaka tiendgi ne ok nyal donjo matut, ne gitwo piyopiyo. 7Kodhi moko to ne olwar e kind kudho, kendo kudhogo nodongo, mothung’ogi. 8To kodhi moko nolwar e lowo maber, omiyo ne ginyak. Moko nonyago kodhi mia achiel, to moko piero auchiel, to moko piero adek.” 9Eka Yesu notieko kawacho niya, “Ng’at man gi it mar winjo, to mondo owinji.”

Gimomiyo Yesu puonjo gi ngeche

(Mariko 4.10-12; Luka 8.9-10)

10Jopuonjre Yesu nodhi ire, mopenje ni, “Ere gima omiyo iwuoyo ni ji gi ngeche?” 11Yesu nodwokogi niya, “Un osemiu ng’eyo weche mopondo mag Loch Polo; ji mamoko to ok omi, 12#Math 25.29; Mar 4.25; Luka 8.18; 19.26.nimar ng’at man-go ema nomedi, bi bed gi gik mang’eny moloyo. To ng’at maongego noma kata mana matin ma en-go. 13Awuoyonigi gi ngeche nikech girango gik moko, to ok gine, bende giwinjo wach, to ok donjnigi, kata ng’eyo tiende bende ok ging’e. 14#Isa 6.9, 10.Kamano gima ne Isaya okoro koro timore kuomgi. Nokoro niya,

‘Winjo to unuwinji,

to wach ok nodonjnu ngang’ kendo neno to ununen,

to ok unung’e tiend wach,

15nimar chuny ogandani osedoko mapek,

kendo gisedino itgi,

bende giseumo wang’gi.

To ka da ni ok kamano,

to dikoro gineno,

kendo dikoro itgi winjo wach,

bende dikoro wach donjonigi,

mi gilokre, giduog ira, kendo achanggi.’

16 # Luka 10.23, 24. “To un, un johawi, nikech wengeu neno, kendo itu winjo wach. 17Adier awachonu ni jonabi mang’eny nogombo neno gik ma koro unenogi, to ne ok ginyal neno, bende ne gigombo winjo gik ma uwinjogi, to ne ok ginyal winjo.”

Tiend ngech jachuoyo

(Mathayo 4.13-20; Luka 8.11-15)

18“To un, chikuru itu mondo uwinj tiend ngech jachuoyo. 19Ng’at mawinjo wach Loch Nyasaye, to ok donjne, chalo gi kodhi mane olwar e wang’yo. Ng’ama Rach biro, kendo maye gima ochwo e chunye. 20To kodhi mane olwar e lwanda, kama lowo operoree, e jalo ma winjo wach, to yiego piyopiyo gi mor. 21To wachno ok moki e chunye, omiyo ok odag aming’a kendo ka chandruok kata sand moro obiro nikech wachno, to opodho piyopiyo nono. 22Kodhi mane olwar e kind kudho, to e ng’at mawinjo wach to paro mag piny gi ber mar mwandu thung’o wachno, mi ok nyag gimoro. 23To kodhi mane ochwo e lowo maber e ng’at ma winjo wach, kendo donjone. Onyak maber, mana ka kodhi ma moko nyak mia achiel, to moko piero auchiel, kendo moko piero adek.”

Ngech ogolo mochwo e kind cham

24Yesu nogoyonigi ngero machielo niya, “Loch Polo chalo gi ng’at mane ochwoyo kodhi mabeyo e puothe. 25To otieno, kane ji nindo, jasike nobiro mochwoyo ogolo e kind cham. 26Kuom mano, kane cham odongo kendo omoyo, to ogolo bende ne nie kindgi. 27Jotich wuon puodho nodhi ire, mopenje niya, ‘Jaduong’, donge kodhi mabeyo lilo ema nichwoyo e puothi? Ka kamano, to ogologi oa kure?’ 28En to nodwokogi niya, ‘Jasigu moro ema otimo kamano!’ Eka jotichne nochako openje ni, ‘Idwaro ni mondo wadhi wapudhgi oko koso?’ 29To nodwokogi ni, ‘Ooyo, kik utim kamano, dipo ka upudho cham kaachiel gi ogolo. 30Wegiuru aweya gidongi giduto, nyaka ndalo keyo chopi, eka ananyis jokeyo ni mondo gikwong gipudh ogolo, gitue wiye wiye mondo giwang’ e mach. Bang’e gika cham, giol e decha.’ ”

Ngech koth karadali

(Mariko 4.30-32; Luka 13.18-19)

31Yesu nochako ogoyonigi ngero moro niya, “Loch Polo chalo gi koth karadali mane ng’ato okawo mopidho e puothe. 32En kodhi matinie moloyo kodhi mamoko duto, to ka osedongo to odoko yath maduong’ie moloyo yien duto, kendo winy biro mi gedi e bedene.”

Ngech Thowi

(Luka 13.20-21)

33Yesu nochako ogoyonigi ngero machielo niya, “Loch Polo chalo gi thowi mane dhako moro okawo mobagogo mogo atonge adek, mi bang’e ochiek maber.”

Yesu opuonjo ji mana gi ngeche

(Mariko 4.33-34)

34Kane Yesu puonjo ji wechego duto, to nowuoyonigi mana gi ngeche. Adier, ne ok owachnigi gimoro mak mana e yor ngero. 35#Zab 78.2.Mano notimore mondo gima ne janabi owacho otimre. Janabino nowacho ni,

“Anawuo kodgi mana gi ngeche,

ka anyisogi gik mosebet kopondo nyaka ne piny chakre.”

Yesu ohulo tiend ngech ogolo

36Eka Yesu noweyo ji, modonjo e ot. Jopuonjrene ne odhi ire, mokwaye ni mondo oloknigi tiend ngech ogolo mochwo e puodho. 37Yesu nodwokogi niya, “Ng’at mane ochwoyo kodhi mabeyo ne en Wuod Dhano, 38to puodho e piny. Kodhi mabeyo to en joma oyie Loch Polo, to ogolo e joma luwo Satan, 39kendo jasigu mane ochwoyo ogolo e Satan. Keyo to e giko piny, kendo jokeyo e malaika. 40Kaka ichoko ogolo, kendo iwang’o e mach, e kaka nochok ji, mi wang’ chieng’ giko piny. 41Wuod Dhano noor malaikane mondo ochok gik moko duto mamiyo ji ketho, kaachiel gi joma richo, mi ogol oko e pinye, 42kendo owit e mach mager. Kanyo ywagruok gi muodo lak nobedie! 43Bang’ mano, joma kare norieny ka wang’chieng’ e piny Wuon-gi. Ng’at man gi it mar winjo, to mondo owinji!

Ngech mwandu mopandi

44“Loch Polo chalo gi mwandu mane opandi e puodho, mi ng’ato oyudo, mi ochako oyiko kendo. Ng’atno nodoko mamor ahinya, omiyo nodhi oloko gige duto pesa, mi oduogo ong’iewo puodhono.

Ngech kidi ma nengone tek

45“Bende Loch Polo chalo gi jaohala madwaro kite ma nengogi tek, 46to ka osenwang’o moro maberie moloyo moko duto, to odhi oloko gige duto pesa, mondo ong’iewego.

Ngech tol mimakogo rech

47“To bende Loch Polo chalo gi tol mobol e nam, mamako kit rech duto. 48Ka osepong’, to jolupo ywaye oko e dhowath, kendo gibet piny mondo gipog rech. Rech mabeyo giketo e oserni, to maricho giwito oko. 49Mano bende e kaka notim ni ji, chieng’ giko piny. Malaika nowuogi kendo nopog joma richo kuom joma beyo, 50mi witi e mach mager. Kanyo ywagruok gi muodo lak nobedie.”

Rieko machon gi manyien

51Bang’ mago duto, Yesu nopenjo jopuonjrene ni, “Bende wechego duto osedonjonu?” Ne gidwoke ni, “Ee, gisedonjonwa.” 52Eka nomedo wachonigi niya, “Ka kamano, to japuonj Chik mapuonjore wach Loch Polo chalo gi wuon dala magolo mwandun manyien gi machon kar kenone.”

Jo-Nazareth odagi Yesu

(Mariko 6.1-6; Luka 4.16-30)

53Kane Yesu osetieko goyo ngechego, noa kanyo, 54mi odok dalagi. Ne opuonjo e od lemo, mi joma ne owinjo kaka opuonjo nowuoro, mopenjore niya, “Rieko ma kama, kod teko mar timo honnigi jali oyudo kure? 55Donge en e wuod japecho cha? Min mare donge iluongo ni Maria? Koso Jakobo gi Josef gi Simon kod Juda donge gin owetene? 56Donge en e ma nyiminene duto odak kodwa kagi? Koro gigi duto to oyudo kure?” 57#Joh 4.44.Kamano ne gisin kode. Yesu to nowachonigi niya, “Janabi imiyo duong’ kuonde duto, to mak mana jogweng’gi gi joodgi ema ochaye.” 58Ne ok otimo honni mang’eny kuno, nikech jogo ne onge gi yie.

Currently Selected:

Mathayo 13: DHO15

Highlight

Compare

Copy