Mathayo 12

Wach Sabato

(Mariko 2.23-28; Luka 6.1-5)

1 # R.Chik 23.25. Chieng’ Sabato moro e kindego, kane Yesu wuotho e puothe mag ngano, jopuonjrene nodenyo, omiyo ne gichako jako wi ngano mondo gicham. 2To kane jo-Farisai oneno kamano, ne giwacho ni Yesu niya, “Neye kaka jopuonjreni timo gima Chik okwero ni kik tim chieng’ Sabato!” 3#1 Sam 21.1-6.To Yesu nodwokogi kapenjogi niya, “Pok usomo gima ne Daudi otimo chieng’ mane kech kaye, kaachiel gi joge? 4#T.Lawi 24.9.Donge ne odhi e Od Nyasaye mi ochamo makati miketo e nyim Nyasaye, ma Chikwa okwero ni en kata joge kik cham, to mak mana jodolo kende? 5#Kwan 28.9, 10.Koso pok usomo e Chik Musa ni chieng’ Sabato jodolo tiyo e Hekalu, ka ketho chik Sabato, to kata kamano gionge bura? 6Koro anyisou ni nitie gimoro kaeri man gi duong’ moloyo Hekalu. 7#Math 9.13; Hos 6.6.Muma wacho ni, ‘Ok adwar mondo ji otimna misango, to adwaro mana ni mondo gibed mang’won.’ Dine bed ni uwinjo tiend wachno, to da ok ung’ado bura ni joma ok oketho, 8nikech Wuod Dhano en ruodh Sabato bende.”

Yesu ochango ng’at ma lwete otal

(Mariko 3.1-6; Luka 6.6-11)

9Kane Yesu oa kanyo, nodhi e od lemo moro, 10moyudoe ng’at ma lwete otal. To jomoko ne ni kanyo mane dwaro donjo ni Yesu kuom ketho Chik, omiyo ne gipenje niya, “Bende Chikwa oyie mondo ochang ng’ato chieng’ Sabato?” 11#Luka 14.5.Yesu to nodwokogi kapenjogi niya, “Ka ng’ato kuomu ni gi rombo achiel, mi onyumore e bur chieng’ Sabato, donge doywaye mogole oko? 12Koro dhano to oloyo rombo nyadidi! Mano nyiso ni Chikwa oyienwa timo gima ber chieng’ Sabato.” 13Eka nowacho ni ng’at ma lwete otalno niya, “Rie lweti!” Ng’atno norieyo lwete, mi lwete odoko mangima mana kaka komachielo. 14To jo-Farisai nowuok, modhi ochano kaka digineg Yesu.

Yesu owacho ni en e jatich mane Nyasaye oyiero

15Yesu nong’eyo gima ne gidwaro timo, omiyo noa e gweng’no. Ji ma thoth noluwe, kendo nochangogi duto, 16to nokwerogi matek ni kik ginyis ng’ato wachne. 17Nokwerogi kamano mondo gima ne Isaya janabi okoro otimre. Nyasaye nosemiyo Isaya owacho niya,

18 # Isa 42.1-4. “Neuru, ma e jatichna ma aseyiero.

En ng’at ma ahero, kendo ma chunya morgo.

Anaket Roho mara kuome,

kendo enonyis ogendini duto adierana.

19Ok nokogi, kata nduru ok nogo,

dwonde bende ok nowinji e wang’yore.

20Kata mana odundu motore ok enotur,

mi owit ka gima nono,

kendo ok nosim kata mana taya maliel marachrach,

nyaka chop okel bura makare kuonde duto.

21Kuom mano, ogendini duto noket geno margi kuome.”

Ji owacho ni Yesu tiyo gi teko mar Beelzebul

(Mariko 3.20-30; Luka 11.14-23)

22Ji moko nokelo ni Yesu ng’ato ma jachien oloko muofu kendo momo. Yesu nochange mi koro ne onyalo wuoyo kendo neno. 23Ji duto nowuoro, kapenjore niya, “Bende ng’atni dibed wuod Daudi adier?” 24#Math 9.34; 10.25.To jo-Farisai ka ne owinjo kamano, ne giwacho ni, “Jali golo jochiende mana nikech Beelzebul ruodh jochiende ema omiye teko mar timo kamano.” 25Yesu nong’eyo gima giparo, omiyo nowachonigi niya, “Piny moro amora ma joge opogore e kindgi giwegi ok nyal betie. Bende dala kata ot ma joge opogore ok nyal chung’. 26Kuom mano, ka Satan ema golo Satan wadgi, to mano nyiso ni opogore kende owuon. Koro ere kaka lochne dichung’? 27To bende, ka uwacho ni agolo jochiende gi teko mar Beelzebul, kara jou to yudo teko mar gologi kanye? Omiyo, ka mano e gima uwacho, to jougo ema biro ng’eng’ou! 28To ka agolo jochiende gi teko mar Roho mar Nyasaye, to kara ng’euru ni Loch Nyasaye osechopo kuomu.

29“To bende, onge ng’ama nyalo turo od ng’at maratego, mi kaw mwandune, mak mana ka okwongo otueyo ng’at marategono, eka doyak ode.

30 # Mar 9.40. “Ng’at ma ok odokna, to mon koda, kendo ng’at mo ok konya choko romba, to keyo romba akeya. 31Mano emomiyo awachonu ni, richo duto mag ji nowenigi kaachiel gi ayany duto magiyanyogo Nyasaye, to ayany ma ng’ato oyanyogo Roho to ok nowene. 32#Luka 12.10.Ng’at mowacho wach moro marach kuom Wuod Dhano, to owene, to ng’at mowuoyo marach kuom Roho Maler ok nowene e pinyni kata e piny mabiro.

Ngech yath kod olembe

(Luka 6.43-45)

33 # Math 7.20; Luka 6.44. “Ka ng’ato dwaro olemo mabeyo, to nyaka obed gi yath maber. To ka en gi yath marach to oyudo mana olemo maricho, nikech yath ing’eyo mana gi olemo monyago. 34#Math 3.7; 23.33; Luka 3.7; Math 15.18; Luka 6.45.Un nyithi thuondegi! Ere kaka weche muwacho dibed mabeyo, to un uwegi un joricho? Chutho gik mopong’o chuny dhano ema wuok e dhoge. 35Ng’at maber golo gik mabeyo kuom mwandu mabeyo mokano e chunye. To ng’at marach to golo mana gik maricho kuom mwandune maricho.

36“Awachonu ni, Chieng’ Bura, ng’ato ka ng’ato nodwok wach kuom weche manono duto mosewacho. 37Weche mawuok e dhogi ema nomi ilo bura, kata ema nomi bura loyi.”

Jodong jo-Yahudi okwayo Yesu mondo otimnigi hono

(Mariko 8.11-12; Luka 11.29-32)

38 # Math 16.1; Mar 8.11; Luka 11.16. Jopuonj Chik moko kod jo-Farisai moko nowacho ni Yesu niya, “Japuonj, wadwaro mondo itimnwa hono manyiso ni in gi teko moa kuom Nyasaye.” 39#Math 16.4; Mar 8.12.Yesu nodwokogi ni, “Tieng’ marach kendo maweyo Nyasayeni kwayo mondo otimnigi ranyisi, to onge ranyisi ma notimnigi mak mana ranyisi mar janabi Jona. 40#Jona 1.17.Kaka Jona nobet ei rech mang’ongo kuom ndalo adek, odiechieng’ gotieno, e kaka Wuod Dhano bende nobed ei lowo kuom ndalo adek, odiechieng’ gotieno. 41#Jona 3.5.To Chieng’ Bura, jo-Nineve nochung’ mi donjnu, nikech kane Jona olandonigi Wach Nyasaye, to ne gilokore mi giweyo richogi, to awachonu ni koro nitie gimoro kaeri man gi duong’ moloyo Jona. 42#1 Ruo 10.1-10; 2 W.Nda 9.1-12.Chieng’ Bura, Ruoth madhako mar piny milambo nochung’, kendo nodonjnu nikech ne oa kuma bor ahinya mondo obi owinj rieko Solomon. To awachonu ni koro nitie gimoro kaeri man gi duong’ moloyo Solomon.

Kaka jachien marach duogo e chuny dhano

(Luka 11.24-26)

43“Ka jachien marach osewuok kuom ng’ato, to owuotho kuonde motwo ma pi ongee, kodwaro kar yueyo, to ok oyudi. 44Bang’e owacho niya, ‘We adog e oda, kuma ne aaye.’ Kuom mano odok, to oyudo ka ot ni nono, kendo oywe, mi olos maber. 45Eka owuok odhi oomo jochiende mamoko abiriyo maricho moloye, kendo gidonjo mi gidag e odno. Kamano achien ngima ng’atno doko marach moloyo kaka ne en chon. Mano bende e kaka notimre ni tieng’ marachni.

Owete Yesu gi min mare

(Mariko 3.31-35; Luka 8.19-21)

46Kane Yesu pod wuoyo gi ji, min mare gi owetene nobiro, mochung’ gi oko, kadwaro wuoyo kode. 47Eka ng’at moro nowacho ni Yesu niya, “Meru dwaro loso kodi.” 48To Yesu nodwoke ni, “Mama en ng’a? Koso owetena to ng’a gini?” 49Bang’ mano nosiemo jopuonjrene gi lwete, kowacho niya, “Neuru, magi e mama kod owetena, 50nimar ng’ato ang’ata matimo gima Wuora mae polo dwaro e owadwa, gi nyamera, kod mama.”

Currently Selected:

Mathayo 12: DHO15

Highlight

Compare

Copy