Eklesiastes 5

Rach mar rikni gi kuong’ruok

1Bed motang’ ka idhi e od Nyasaye, nimar dhiyo kuno mondo ipuonjri, ber moloyo chiwo misango ka ng’at mofuwo ma ok ong’eyo gima ber gi gima rach. 2Par maber ka pok iwuoyo, kendo kik irikni ka isingori ni Nyasaye. Nyasaye nie polo, to in inie piny, omiyo kik iwuo mathoth moloyo kaka owinjore.

3Ka in gi parruok mathoth, to ibiro bedo gi lek maricho. Kamano bende ka wecheni ng’eny, to inyalo wacho gima ofuwo. 4#Zab 66.13, 14.Kuom mano, ka isingori ni ibiro chiwo ni Nyasaye gimoro, to tim kamano piyo, nikech Nyasaye ok mor gi ng’at mofuwo. Adier, tim gima isingori ni ibiro timo. 5Ber ka ok isingori moloyo singori, to ok itimo. 6Kik iwe wecheni iwuon teri e richo, nono to idhi e nyim jadolo mar Nyasaye, kiywagori ni iseketho, nikech kitimo kamano to imiyo Nyasaye kecho kodi, kendo obiro ketho gik ma luchi osemiyi.

7Kata ka lek medore, kendo weche manono bedo mathoth, to pod onego iluor aluora Nyasaye.

Ngima en gima nono

8Ka ineno ka piny moro sando joge modhier, ka timonigi marach, kendo tuonogi gik monego giyudi, to kik ibuogi, nimar jatelo ka jatelo nigi ng’at moloye gi duong’, kendo giduto bende gin gi joma dongonigi. 9Piny ma ruodhe ohero tich lowo ema dhi nyime maber.

10Ka ihero pesa, to pesa ok noromi ngang’, bende ka igombo bedo jamwandu, to mwandu miyudo ok noromi, nikech mano en mana gima nono. 11Kaka mwanduni medore, e kaka joma ipidho bende medore. Ohala miyudo en mana ng’eyo ni in jamoko. 12Jachan pile nindo mamit, kata obedo ni ochamo gima tin kata mang’eny. Gik mang’eny ma jamoko nigo to miyo oparore, ma ok onyal nindo.

13Gima lich ma aseneno e pinyni en ni ji kano pesa mondo chieng’ moro okonygi, 14to achien giwito pesago te e gimoro maonge gi tich. Bang’e gidong’ nono maonge gima ginyalo weyoni nyithindgi. 15#Ayub 1.21; Zab 49.17; 1 Timo 6.7.Waweyo pinyni gi lwetwa nono, mana kaka ne wabiroe. Kata obedo ni wasetiyo matek, mwayudo mwandu, to onge gimoro amora mwaago. 16Mano gima lit ahinya. Wadhi mana kaka ne wabiro. Ere gima wayudo kuom tich manono mwachandorego? 17Wadak e mudho, ka chunywa lit kendo ka waluor, bende ka wakecho kendo ka watuo.

18Kuom mano, asefwenyo ni gima ber ma dhano nyalo timo en mana chiemo gi metho kod chamo mwandu moseyudo kuom kinde matin ma Nyasaye omiye mondo odaggo e piny ka. Mano e gima Nyasaye oseketo ni dhano. 19Ka Nyasaye oguedho ng’ato gi mwandu, kendo omiye dak maber, ma oweyone kinde mondo ocham gigo, to onego obed mamor ka ochamogi. Mano bende en gima Nyasaye ema ochiwo. 20Kaka Nyasaye oseyiene mondo obed mamor kamano, ok obi thagore koparo ni ngima chwok.

Currently Selected:

Eklesiastes 5: DHO15

Highlight

Compare

Copy