Rapar mar Chik 6

Chik maduong’ moloyo

1“Koro magi e chike kod buche mane Ruoth Nyasaye ma Nyasachu ochika mondo apuonju uriti e piny mubiro donjoe kendo kawo mondo obed maru. 2E ngimau duto un kaachiel gi nyikwau nyaka uluor Ruoth Nyasaye ma Nyasachu, kendo urit buchene gi chikene ma amiyou kawuono. Bang’e eka unudag maber aming’a. 3Omiyo un jo-Israel winjuru kendo rituru chikego mondo udag maber kendo unya e piny maber kendo momewno, mana kaka Ruoth Nyasaye ma Nyasach kwereu nosingorenu.

4 # Mar 12.29. “Winjuru un jo-Israel. Ruoth Nyasaye e Nyasachwa, en e Ruoth Nyasaye, kendo en kende e Nyasaye. 5#Math 22.37; Mar 12.30; Luka 10.27.Heruru Ruoth Nyasaye ma Nyasachu gi chunyu duto, gi parou duto, kendo gi tekou duto. 6#R.Chik 11.18-20.Chike ma amiyou kawuonogi, kanuru e chunyu, 7kendo puonjgiuru nyithindu. Bende twaguru kuomgi e mier, kata kuwuotho e yo, kata kudhi nindo, kata kuchiew gokinyi. 8Tuegiuru ka ranyisi e lwetu, kendo mien-giuru e lend wang’u ka kido, 9bende ndikgiuru e sirni mag dhoutu kendo kuom rangeyeu.

Osiem jo-Israel ni kik gitamre mako chik

10 # Chak 12.7; Chak 26.3; Chak 28.13. “Ruoth Nyasaye ma Nyasachu nokelu e piny mane osesingore ni kwereu ma Ibrahim gi Isaka kod Jakobo ni nomiu. En piny man gi mier mang’eny madongo miwuoro, mane ok ugero, 11kod udi mopong’ gi kit gik moko duto mabeyo ma un ne ok uketoe. En gi sokni mokuny e lwanda ma un ne ok ukunyo, kod puothe mag olemb mzabibu kod mag zeituni mane ok upidho. Kusechiemo, muyieng, 12to kik wiu wil gi Ruoth Nyasaye mane ogolou e piny Misri, kuma ne ubedoe wasumbni. 13#Math 4.10; Luka 4.8.Luoruru Ruoth Nyasaye ma Nyasachu, kendo utine. Ka ukuong’oru to nyaka ukuong’ru mana gi nyinge. 14Kik uluw nyiseche mag ogendini mokiewo kodu, 15nikech kuluwogi, to Ruoth Nyasaye modak e dieru biro kecho kodu ahinya mi dotieku e wang’ piny, nimar Ruoth Nyasaye ma Nyasachu en Nyasaye ma janyiego.

16 # Math 4.7; Luka 4.12; Wuok 17.1-7. “Kik utem Ruoth Nyasaye ma Nyasachu, kaka nuteme ka un Masa. 17Nyaka urit malong’o chike Ruoth Nyasaye ma Nyasachu, kaachiel gi wechene kod buchene moko mane omiyou. 18Timuru gik makare kendo mabeyo e nyim Ruoth Nyasaye, mondo udag maber mi udonj kendo ukaw opiny maber mane osesingore kokuong’ore ni kwereu 19Obiro riembonu wasiku duto mondo owenu thuolo, kaka nosingore.

20“To e ndalo mabiro ka yawuotu nopenju ni, ‘Weche gi buche kod chike mane Ruoth Nyasaye omiyou, tiendgi ang’o?’ 21To nudwokgi niya, ‘Ne wan wasumb Farao e piny Misri, to Ruoth Nyasaye nogolowa kuno gi teko maduong’.’ 22Kendo nosando piny Misri gi Farao kod joge duto, kokelonigi masiche madongo gi ranyisi kod honni, kaka ne waneno. 23Nogolowa kuno mondo oterwa e piny mane osesingore ni kwerewa ni nomiwa. 24Ruoth Nyasaye nochikowa ni mondo warit chikegi duto, kendo ni mondo waluore. Eka dwadag maber ndalo duto, kendo domed ritowa. 25Ka warito chikegi duto e nyim Ruoth Nyasaye ma Nyasachwa, to obiro kwanowa ka joma kare.”

Currently Selected:

Rapar mar Chik 6: DHO15

Highlight

Copy

Compare