Rapar mar Chik 5

Chike Apar

(Wuok 20.1-17)

1Musa noluongo jo-Israel duto mowachonigi niya, “Un jo-Israel winjuru chike kod buche ma awacho kuwinjo kawuononi. Puonjreuru, kendo uritgi maber. 2Ruoth Nyasaye ma Nyasachwa notimo kodwa singruok Horeb. 3Ne ok otimo singruok gi kwerewa, to mana kodwa, waduto ma wan ka, ma pod wangima. 4Ruoth Nyasaye noloso kodu wang’ gi wang’ gie mach, ewi godno. 5Chutho an nachung’ e kindu gi Ruoth Nyasaye e sechego, mondo eka akownu weche Ruoth Nyasaye nikech nuluoro mach, mi ne ok uidho godno.

“Ruoth Nyasaye nowacho niya,

6“ ‘An e Ruoth Nyasaye ma Nyasachu ma nogolou e piny Misri kuma ne ubedoe wasumbini.

7“ ‘Kik ubed gi Nyasaye moro mak mana an.

8 # T.Lawi 26.1; R.Chik 4.15-18; 27.15. “ ‘Kik ulos kido moro mopa kata gima chalo gi gimoro manie polo malo kata manie piny mwalo kata mana manie pi mae bwo piny. 9#Wuok 34.6, 7; Kwan 14.18; R.Chik 7.9, 10.Kik ukulrunigi, kata lamogi kik ulamgi, nikech an Ruoth Nyasaye ma Nyasachu an Nyasaye ma janyiego. Akumo nyithind joma ochaya nikech richo jonywolgi nyaka tieng’ mar adek gi mar ang’wen, 10to tienge gana gi gana mohera kendo momako chikena, ahero gi hera mosiko.

11 # T.Lawi 19.12. “ ‘Kik uluong nying Ruoth Nyasaye ma Nyasachu kayiem nono, nimar anakum ng’ato ka ng’ato mokonyore gi nyinga e yo ma ok kare.

12 # Wuok 16.23-30; 31.12-14. “ ‘Rituru chieng’ Sabato kendo uwale ni Ruoth Nyasaye, kaka Ruoth Nyasaye ma Nyasachu nochikou. 13#Wuok 23.12; 31.15; 34.21; 35.2; T.Lawi 23.3.Nyaka uti tijeu duto kuom ndalo auchiel, 14to chieng’ mar abiriyo en chieng’ yueyo mowal ni Ruoth Nyasaye ma Nyasachu. Chieng’no un, kaachiel gi yawuotu kod nyiu, kata wasumbu machwo gi mamon, kata ruethu kata kenjeu kata dhou, kata mana jodak manie miechu kik ti tich moro. Mano en ni mondo wasumbu machwo gi mamon oyue kaka un bende uyueyo. 15Paruru malong’o ni un uwegi ne un wasumbni e piny Misri, to Ruoth Nyasaye ma Nyasachu nogolou kuno gi teko mathoth kod bat morie. Mano emomiyo Ruoth Nyasaye ma Nyasachu nochikou ni mondo urit Sabato.

16 # R.Chik 27.16; Math 15.4; 19.19; Mar 7.10; 10.19; Luka 18.20; Efes 6.2; Efes 6.3. “ ‘Luor wuoru gi meru kaka Ruoth Nyasaye ma Nyasachu nochikou, eka mondo udag aming’a, kendo udhi maber e piny ma Ruoth Nyasaye ma Nyasachu biro miyou.

17 # Chak 9.6; T.Lawi 24.17; Math 5.21; 19.18; Mar 10.19; Luka 18.20; Rumi 13.9; Jak 2.11. “ ‘Kik ineki.

18 # T.Lawi 20.10; Math 5.27; 19.18; Mar 10.19; Luka 18.20; Rumi 13.9; Jak 2.11. “ ‘Kik iterri.

19 # T.Lawi 19.11; Math 19.18; Mar 10.19; Luka 18.20; Rumi 13.9. “ ‘Kik ikwal.

20 # Wuok 23.1; Math 19.18; Mar 10.19; Luka 18.20. “ ‘Kik ihang ni ng’ato wach.

21 # Rumi 7.7; 13.9. “ ‘Kik igomb chi ng’ato kata od ng’ato kata puoth ng’ato kata misumba ng’ato kata dher ng’ato kata kanj ng’ato, kata gimoro amora mar ng’ato.’

Luoro omako jo-Israel

(Wuok 20.18-21)

22 # Hib 12.18, 19. “Ruoth Nyasaye nomiyou chikego ka uchokoru uduto e got. Noloso gi dwol maduong’ gie mach ei rumbi kod ong’weng’o mopoto, eka noweyo wuoyo. Bang’e nondiko chikego e kite ariyo mopamore, momiya. 23Kane uwinjo dwol ka wuok e mudho, to got wang’, jotend dhoutu gi jodongu nobiro ira, 24mowachona niya, ‘Ne! Ruoth Nyasaye ma Nyasachwa osenyisowa duong’ne maler gi tekone, kendo wasewinjo dwonde kawuok ei mach. Omiyo koro wang’eyo ni kara Nyasaye nyalo wuoyo gi dhano, mi dhano chak bed abeda mangima. 25To kata kamano, kik wawit ngimawa, nimar mach malich cha nyalo mana wang’owa, mi tiekwa. Kwachako wawinjo dwond Ruoth Nyasaye ma Nyasachwa kendo, to wabiro tho, 26nikech onge ng’at moro amora mosewinjo dwond Nyasaye mangima kawuok e mach, kaka wasewinjo, to pod ngima. 27In ema inyalo sudo machiegni mondo iwinj weche duto ma Ruoth Nyasaye ma Nyasachwa dhi wacho. Bang’e iduog iwachnwa gigo duto mowachoni, eka wanawinjgi, kendo wanamakgi.’

28“Ruoth Nyasaye nowinjo gima nuwachona, mokona niya, ‘Asewinjo gima ji owachoni. Gin kare. 29Da ber ka gisiko gi chuny moluora kendo morito chikena duto, eka mondo gin gi nyikwagi gidag maber nyaka chieng’. 30Dhiyo kendo iwachnigi mondo gidog e hembegi, 31to in dong’ koda ka mondo ahulni chike gi buche ma nyaka ipuonjgi girit e piny ma amiyogi mondo gidagie.’

32“Ruoth Nyasaye ma Nyasachu osemiyou chikegi, omiyo ritgiuru maber. 33Luwuru yo ma Ruoth Nyasaye ma Nyasachu osechikou, mak ubaro koracham kata korachwich. Bang’e eka unubed maber kendo unudag aming’a e piny ma udhi kawo.

Currently Selected:

Rapar mar Chik 5: DHO15

Highlight

Copy

Compare