民數記 27
27
西羅非哈个妹仔
1 西羅非哈該兜妹仔係瑪拉、挪阿、曷拉、密迦㧯得撒。西羅非哈个阿爸係希弗；希弗个阿爸係基列；基列个阿爸係瑪吉；瑪吉个阿爸係瑪拿西；瑪拿西个阿爸係約瑟。 2西羅非哈个五個妹仔到上主个聖帳篷門口，企在摩西㧯祭司以利亞撒，還有各領袖㧯全會眾面前，對佢等講： 3「𠊎等个阿爸死在曠野，無孻仔。佢無㧯悖逆上主个可拉共黨。佢係因為自家个罪死个。 4敢講因為𠊎等个阿爸無孻仔，就愛對以色列中將佢个名除掉，係麼？求你等俾𠊎等在阿爸个親屬中有好分產業。」
5 摩西向上主講姖等个案件。 6上主對佢講： 7「西羅非哈該兜妹仔所要求个係著个。你一定愛對姖等阿爸个親屬中將產業分給姖等，俾姖等承接阿爸个產業。 8你愛㧯以色列人講，若係有人死掉，總係無孻仔，就愛將佢个產業俾佢个妹仔承接。 9若係佢無妹仔，就俾佢个兄弟承接； 10若係佢無兄弟，就俾阿伯、阿叔承接。 11若係佢連阿伯、阿叔也無，就愛俾佢親族中最親个親人，來承接佢个產業。這愛成做以色列人个法律。𠊎係上主；𠊎恁樣吩咐你。」
約書亞受揀選做摩西个繼承人
(申命記 31:1-8)
12上主對摩西講：「你愛上這亞巴琳山，遠遠看𠊎賜給以色列人个土地。 13你看過以後，就會轉到若祖宗該位，像若哥亞倫共樣。 14因為你兩儕在尋个曠野違背𠊎个命令。當全會眾在米利巴怪怨𠊎个時，你無在佢等面前尊𠊎為聖。」 (米利巴係尋个曠野加低斯个泉水。)
15 摩西祈禱講： 16「主上帝啊，你係所有生命个源頭。求你指派一儕做全會眾个領袖， 17能在佢等面前來出入，也會帶領佢等相㓾，使你个子民毋會像無牧人个羊群。」
18上主對摩西講：「嫩个孻仔約書亞係有聖靈个人；你愛按手在佢頭那頂。 19你愛喊佢企在祭司以利亞撒㧯全會眾頭前宣告佢係你个繼承人。 20你愛將你个權力分給佢，使以色列全會眾順服佢。 21佢愛企在祭司以利亞撒个面前；以利亞撒愛用烏陵 #27:21 「烏陵」：看出埃及記 28:30 。來判斷𠊎个旨意。恁樣，約書亞㧯以色列全會眾愛遵守以利亞撒个命令來出入。」 22摩西就遵照上主个命令去做。佢喊約書亞企在祭司以利亞撒㧯全會眾面前， 23照上主个命令，按手在約書亞頭那頂，宣告佢係自家个繼承人。
Currently Selected:
民數記 27: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
