民數記 28
28
平常愛獻个祭
(出埃及記 29:38-46)
1上主命令摩西， 2愛指示以色列人在規定个時間向上帝獻食物，就係佢歡喜个清香火祭。
3以下係一定愛獻給上主个火祭：逐日个燒化祭愛獻兩隻一歲大、無缺點个細羊牯， 4朝晨獻一隻，臨暗仔獻一隻， 5逐隻㧯一公斤幼麵粉攪一公升純橄欖油个素祭共下獻。 6這種平常愛獻个燒化祭第一擺係在西奈山獻个。所獻个係上主所歡喜个清香火祭。 7你愛㧯第一隻羊共下獻祭酒給上主，就係愛將一公升酒洒在祭壇頂。 8臨暗仔獻第二隻羊，也㧯朝晨獻个方法共樣，愛㧯素祭並祭酒共下獻，做清香个火祭，使上主歡喜。
安息日獻个祭
9在安息日，愛獻兩隻一歲大、無缺點个細羊牯，兩公斤幼麵粉攪橄欖油个素祭、㧯祭酒。 10除了平常愛獻个燒化祭㧯祭酒以外，逐擺安息日還愛獻安息日个燒化祭。
初一獻个祭
11逐隻月个初一愛獻燒化祭給上主：兩隻細牛牯，一隻綿羊牯，七隻一歲大个細羊牯，全部愛無缺點个。 12愛用素祭㧯燒化祭共下獻：逐隻牛牯愛配三公斤攪橄欖油个幼麵粉；該隻綿羊牯配兩公斤攪橄欖油个幼麵粉； 13逐隻細羊牯配一公斤攪橄欖油个幼麵粉。愛獻這清香个燒化祭，使上主歡喜。 14也愛用祭酒㧯燒化祭共下獻：逐隻牛牯配兩公升酒；該隻綿羊牯配一公升半酒；逐隻細羊牯配一公升酒。這係逐隻月初一獻燒化祭个條例，一年十二隻月全部恁樣。 15除了平常愛獻个燒化祭㧯祭酒以外，還愛獻一隻山羊牯做贖罪祭給上主。
𨃟過節獻个祭
(利未記 23:5-14)
16正月十四愛舉行紀念上主个𨃟過節。 17對十五開始，連等七日愛有敬拜个聖會；這七日當中，單淨做得食無酵餅。 18你等在聖會个第一日愛聚集敬拜，日常一切个工作都毋好做。 19愛獻燒化祭做清香个火祭，使上主歡喜。愛獻兩隻細牛牯，一隻綿羊牯，七隻一歲大个細羊牯，全部愛無缺點个。 20也愛獻幼麵粉攪橄欖油个素祭：逐隻牛牯配三公斤幼麵粉；該隻綿羊牯配兩公斤幼麵粉； 21逐隻細羊牯配一公斤幼麵粉。 22又愛獻一隻山羊牯做贖罪祭，為人民行潔淨禮。 23除了朝晨平常愛獻个燒化祭以外，還愛獻這兜祭。 24共樣，除了平常愛獻个燒化祭㧯祭酒以外，連等七日，逐日愛獻上主所歡喜个清香火祭。 25第七日愛聚集敬拜，日常一切个工作都毋好做。
七七收割節獻个祭
(利未記 23:15-22)
26你等愛在七七收割節个第一日，將新收成个五榖做素祭獻給上主；你等愛聚集敬拜，日常一切个工作都毋好做。 27你等愛獻清香个燒化祭，使上主歡喜。愛獻兩隻細牛牯，一隻綿羊牯，七隻一歲大个細羊牯，全部愛無缺點个。 28也愛獻幼麵粉攪橄欖油个素祭：逐隻牛牯愛配三公斤幼麵粉；該隻綿羊牯配兩公斤幼麵粉； 29逐隻細羊牯配一公斤幼麵粉。 30又愛獻一隻山羊牯做贖罪祭，為人民行潔淨禮。 31除了這兜祭㧯祭酒以外，平常愛獻个燒化祭㧯素祭照常愛獻；頭牲全部愛無缺點个。
Currently Selected:
民數記 28: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
