Taasipane 36
36
Kakudhane lulri karudrange kwini ki lri mucungulu ka ababai
1Ku lalake ki Yusepe ka Manase ka aganeini, ka Gileade ka lalake ki Makire kwini latamatama ki lamaretetese matwase kikawriva ki Musi si drumane ka tarasangililuku, 2si iya kai, “Ku Tamatama nawadrekase numiane arakai ku kuzibiki padrudrulru ki swa Iseraylri ku kadaengane, la mialri drekase numiane si baai kwini cungulu ki retesane nai ka Zelupehade vala ki lalakeini ka labaibai. 3Ai, lwiyasi la kithareve mwa ki drumane ka zuku ki swa Iseraylri, kwini cungulu lini lri papia kwini ki drumane ka zuku. Lu mia kikai, kwidra kuzibiki nai si kidrulru ku kadaengane lri asakivalane. 4Lu kelanga ki Takipangilralraingane ka caili, kwini sanaka nikilangadhane ku cungulu lri makitu sawlri baai kwini ki pimanemanane; kwini cungulu ki Zelupehade lrika palralrawthunga ka cungulu ki tawane lini, kai zuku nai lalri ngibalre ka palralrawthunga kawlrau kwini tali naiane ka cungulu.”
5Ku Musi la malra kwini drekase ki Tamatama pelaela ki swa Iseraylri, iya kai, “Pacengecenge kai taiyane ki zuku ki Manase. 6Lakamani ku cunu ki Tamatama, ku lalake ki Zelupehade lri dulru ngikakamani pilri ku amwane lini karudrange iya, ai lri ikai ki talikai ki zuku ki tama lini pilri. 7Sanaka cungulu ki swa Iseraylri lri tara pasuru pikai ki zuku lini. 8Ikai ki lazuku ki swa Iseraylri, sanaka aneanenga ku mwacungulu ku ababai, lri tara kithareve mwa ki talikai ki zuku lini. Lu mia kikai, ku swa Iseraylri ala lri maka mucungulu ku pawcungulu ki cucungulane lini, 9kwini cungulu lalri kai katwase talula mwa ki talidrumane ka zuku; sanaka zuku lri tara pasuru pikai ki zuku lini ku lacungulu.”
10-11Ala kwini labaibai ka lalake ki Zelupehade ka Mahela, Tireza, Hugela, Mileka si Nua la pasusu kwini vaga ki Musi ka drekase ki Tamatama, si karudrange mwa ki lakadradralra lini ka sawvalai. 12Kwini lalisu makitu yakai kwini ki zuku ki lalake ki Yusepe ka Manase kidringai ku tawvane lini. Kwini lacungulu lini la asuru ikai ki zuku ki tama lini.
13Kikai belenge kai kakudhane ka tinukakudhanane ki Tamatama ka pangwakai ki Musi si pawsuru ki swa Iseraylri, sa ikai kavai dratane Muabe ka babiabila kadravane Yuredange ka balrealreanane Yeriku.
Currently Selected:
Taasipane 36: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
