Taasipane 35
35
Nidrulrane ki swa Lrivi ka lacekele
1Ku Tamatama yakai dratane Muabe kwini babiabila kadravane Yuredange ka balrealreanane Yeriku kawriva ki Musi, 2“Kusu cuna ki swa Iseraylri, malra patwalai kwini ki cungulu lini, si vala ki swa Lrivi ku taipiane ku cekele si tapagwagwane lini. 3Kikai lacekele lrika swa Lriviane, lani ikaikai kwini; kwini ubulane abaadhane liniane tutalapwane ki lwange lini si lanilapulapwane. 4Kwini tapagwagwane twalai ki alradre ki cekele ngithalringulu papia latadre ki 450 mituru ku swadravane, 5tukabicelrakane ki cekele, ki sathili tara ka 900 mituru ka sikake kadaengane. 6Lri baai numi ki swa Lrivi ku talunemele ku Tamwane kipalakebe ka cekele, kudra kai waranau papacai ki umawmase lani dulru mwa kwini kipalakebe. Ku drumane, lai lri baai numi liniane ku talu 42 ku cekele. 7Paelre kudra ngiathalringulu ki cekele ku ubulane, talu 48 ka cekele. 8Kwini lazuku lri singikai ku tasuthainwane ku kadaengane lini si vala baai ki swa Lrivi.”
Tamwane kipalakebe ka cekele
(Tapelane Drekase 19.1-13; Yesua 20.1-9)
9Ku Tamatama wadrekase ki Musi 10pelaela ki swa Iseraylri, “Lu talubalre numi kadravane Yuredange si mudaanenga Kanange, 11tara pilria ku Tamwane kipalakebe ka cekele ki pasalriu, lani kamani ku tamwane kwidra ki kaika waranau papacai ki umawmase mubere. 12Si kibalai kwidra ki laretesaneini kulri kela bilri iniane. Ku tangea ku umawmase la kikukusu ka papacai ki umawmase, alaiyasi kaika nipangukaiyaneana ki mapapangale saibange kaika nipalraingane ku papacai pathavungu. 13Kunumi pilria ku talueneme ku cekele, 14ku talutulrulu pikaiya tali talrawane kadravane Yuredange, ku talutulrulu pikaiya Kanange. 15Kikai lacekele abaadhane ki swa Iseraylri si lri padawdalru si lri kawlai ikaikai ka lasingibadhane ka Tamwane kipalakebe ka cekele, sanaka aneanenga ku kaika waranau papacai ki umawmase lri dulru mubere mwa kwini ki cekele.
16-18“Ai, lwiyasi ikai ku umawmase la arakai ku sakikaruburane papacai ki umawmase, kai susu ku arakai ku adreme, lrenege si angatu, amani ku papacainga ki umawmase, la lri tara kipapacai. 19Kwini padethaneana ka retesaneini lri ngikakamani papacai kwini ki pasalriu ka umawmase; kwini lasu sana kidringai kwini ki papacai, lri pwa papacai iniane.
20“Lwiyasi ikai ku umawmase ku magirimucu ki umawmase, la pwa drumulru iniane si ngwadreke pacai, si ku arakai ku lamanemane si papacai iniane, 21ku arakai ku alrima papacai iniane, kwini umawmase pasalriunga, lri tara kipapacai. Kwini padethaneana ka retesaneini lri ngikakamani papacai kwini ki pasalriu; sana kidringai kwini ki papacai, lri malra papacai iniane.
22“Ai, alaiyasi ku umawmase la kaika waranau papacai ka kadrwa ku tamauramianeini kwini ki umawmase, adravane ka wadrumulru, ka wadukulru papacai, 23ka kaika wadrele la dukulru ku lrenege si kaika waranau papacai ki umawmase, kwini umawmase la kaika makakabadhaini, 24luka miyaiya kikai, ku mapapangale lri palakebe kwini ki kaika waranau si papacai ki druma, kaika nipalraingane ku taswakai kwini ki lri kela bilri iniane kwidra retesane kwini ki kiapapacai. 25Ku mapapangale lri palribulu kwini ki kaika waranau papacai pakidaili ki laretesane ki wapacai, si malra iniane sateatedre pwa kwidra ki Tamwane kipalakebe ka cekele. Kwini lasu lri ikaikai kwini, pakela lu pacainga kwini yacengecenge ka abebeelengenga ki barakalai. 26Ai, kwini papacai alaiyasi la katwase mulatadre kwini ki Tamwane kipalakebe ka cekele, 27kwini laretesane ki wapacai ala kidringai iniane, lri pwa papacai iniane, lalri kai kitupasalrivane. 28Kwini kaika waranau la papacai ki druma lri tara ka taikaiyane kwini ki Tamwane kipalakebe ka cekele, adradrau lu paacainga kwini abebeelengenga ki barakalai ala lri maka mutavanane. 29Kunumi si la mwabaibalrithi numi adravane ikai inininunga lri makitu pasusu kai ki tinukakudhanane.
30“Lwiyasi la kikukusu ka pasalriu papacai, lri tara ikai ku tadrusa papubebelenge ku wasiwmi iniane, ala lri dulru papacai pathavungu; luka tangeangeea ku wasiwmi kai lri maka dulru tupasalrivane papacai. 31Kwidra papacai ki umawmase lri tara thavungu ku niakeini, kai lri maka arakai ku paisu thavungu si mubere ki akipathavungane. 32Lwiyasi ikai ku umawmase ku mwabere mudaane ki Tamwane kipalakebe ka cekele, kaidu wamalramalra ku sakitawbalrithane langai ku paisu, si palraingi pautavanane iniane lu kaiyana pacai ku abebeelengenga ki barakalai. 33Lwiyasi la palraingi iniane pangimia kikai, amaninga ku wakudrulru ki taikaiyane numi ka kadaengane. Kwini papacai ki umawmase amani ku wakudrulru ki kadaengane; amani kwini papacai ka wathavungu ku niakeini, kadrwa ku drumane ku apangimiane si maka dulru pakabula kwini ki tapikaiyane papacai. 34Kunumi madha pakakudrulru kwini ki taikaiyane numi ka kadaengane; asi lwiyane Tamatamaku, yakai taelre ki swa Iseraylri.”
Currently Selected:
Taasipane 35: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
