Tapelane Drekase 1
1
Sapathagilane ka vaga
1Kikai nipacasane amani ku lavaga ki Musi. Ku swa Iseraylri sa ikai calragulragu kwini tali talrawane kadravane Yuredange, yakabicelrakane kwini cekele ka Parange si Tupele, Labange, Hazeruthe si Dizahabe, ngudadethe ka kadravane Yuredange ka Supe, kawariva ku Musi liniane kikai lavaga. 2(Twalai lregelrege Hurebe ngukakai lregelrege tali Idume daruru Kadise Barania lri 11 ku kadalranane.) 3Saka taramasupatele ka caili si aswalaalanga ki vai ki saka 11 ki dramare ku takatwasane lini ka Izipiti, ku Musi wamalra kwini sanaka drekase ki Tamatama iniane ku vaga pelaela ki swa Iseraylri. 4Kikwini, kwidra sia tangadrane ki cekele kavai Hesebunge ka Sihunge ka talialalai ki Amuri si sia tangadrane ki cekele Asetaruthe, Ideri ka Uge ka talialalai ki Basane kia pamalebenga#1.4 “kwidra sia tangadrane ki cekele kavai Hesebunge ka Sihunge ka talialalai ki Amuri si sia tangadrane ki cekele Asetaruthe, Ideri ka Uge ka talialalai ki Basane kia pamalebenga” ku pacase ki Hiburu yai “kwi lasu pamakinga ki Hesebunge ...” Kikai “lasu” niyane “Twaumase” lri dulru madu iya, lai lri dulru madu “Musi” iya.. 5Ku Musi yakai kwini balrealreanane ka kadravane Yuredange ka Muabe papia ki mapapangale ki swa Iseraylri ngutatiki swacenge ku tukakudhane ki Tamatama.
Amia kai, 6“Sa ikaiyanata lregelrege Hurebe, ku Tamatama ka Twaumaseta kawariva mitane, ‘Maulainga numi turamuru ku taikaiyane numi ikai kai lregelrege. 7Kaiasasane musubura kikai tasuladhane numi, la aru cucubungu talula. Lri mudaane numi kwini lregelrege ki swa Amuri si ngwadadeethe ka cekele kavai valrwalru Yuredange, talebeane ka kadaengane, ngwalralregelrege, talikai tali lrawdru si ngwababiabila ki laveke Miditerania, ku iya kwini, kunumi mudaana Kanange, Lebanungu si twalai kwini arwakai daruru kavai talikai kadaengane ka kadravane Yuparati. 8Kikai lakadaengane amaniaku ka Tamatama ku pwakawnu ka abaadhane ki cucungulane numi ka Aberahame, Isake, Yakubu si lamwabaibalrithi liniane ka kadaengane. Lri mudaane numi, si maalranga kikai lakadaengane.’ ”
Ku Musi siakawlu ki tarasaibaibange
(Takatwasane Izipiti 18.13-27)
9Ku Musi kawariva ki mapapangale, “Sa ikaiyanata lregelrege Hurebe, peaelaelangaku numiane, ‘Kainaku lri maka muringeangea angeale kikai akicapilane asangilukane numiane. 10Ku Tamatama ka Twaumase numi arwa patapangalenga kai umawmase numi, mia ki tariau belenge ku pangalane. 11Ku Tamatama ka Twaumase ki cucungulane numi ani singikai ku tapuvaganeini si arwa padrimana ku lrika umawmase numi si aruka silrialribateana ki tatathane, lanu ngiradhekane. 12Ai lri makatumanaku tangeangea siamece kikai laawngane numi, arathungu marasikaikai ki kaika tamakathaitharirane numi? 13Kunumi pilria patwalai ki zuku numi kwidra lamalrigili, sapukwane, yakainga ku takilringavaneini; lri sudralrwaku liniane ka amani ku wadrangalru numiane.’ 14Kunumi napalraingi numi pangimia kikai. 15Lakamani, siakawlungaku ki lazuku pilri kwidra ki malrigili, yakainga ku kilringauini ka umawmase kela arathungu numiane; yakai ku lri arathungu ki takudrulu, yakai ku lri arathungu ki taidai, yakai ku lri arathungu ki tamalrimale, yakai ku arathungu ki tamangeale. La patwalaiyana naku ki lazuku pilriana ku drumane ku kiacapili ki awngane.
16“Ikai kwini, peaelaelaku ki latarasaibaibange, ‘Marasikaikaiya ki takukusukuswane lini. Adravane ka ngwakai ki sakacekele numi ku takukusukuswane, ku ngwakai ki yakaikai numiane ka singibadhane, kunumi tara arakaiya ku aparamaramavane saibange. 17Kunumi pudriadringadha madha ngipapakaesaesai sikathane, adravane ka aneane, madha thithili ngulritudrane, makitu paramaramava liniane. Madha mukuludru ki aneanenga, asi lwiyane ngiatalikaikai numi ki Twaumase saibange. Alaiyasi ikai ku pakakucingalre numi ku laawngane, kai matumane iluku mwakai nakwane, nau kamaninga ka marasiakai.’ 18Ikai kwini, la malra kwidra apangimiane ku drumane ku laawngane pelaela liniane.”
Palrilriu ki umawmase mwa Kanange
(Taasipane 13.1-33)
19“Pasusu nai ku tadrekasane ki Tamatama nai, katwase lregelrege ka Hurebe, ngukaikai kwini ki matiaukuludru ka calragulragu, papia kwini lalregelrege ki swa Amuri. Sa daruru nai Kadise Barania, 20nakawarivaku numiane, ‘Kikai, wadarurunga numi kai ki lregelrege ki swa Amuri, kwini amani ku Tamatama ka Twaumaseta, ka wabaai mitane ka kadaengane. 21Drela, kikai kadaengane yacucubungunga numiane. Kunumi pasusua ku tadrekasane ki Tamatama ka Twaumase ki cucungulaneta la mwa drikisi, madha kalrilriki, madha mukuludru.’
22“Ai wakela numi kikawriva si pelaela ku kidremedreme numi iya kai, ‘Lri paswalana nai pamwa ku walrilriu kavai kadaengane, lu kelanga lai pelaela ku lrika angukakaiyane ku kadalranane si amwane drikisi ku cekele.’
23“Mathariri la iyaku ku pangiamia kikai, lakamani ku patwalai ki lazuku pilri ku tangea ku umawmase, ta 12 makanaelre. 24Kwini lalasu la mwa lregelrege, daruru kavai vaalru Isekule. 25Kwini lalasu la kela iluku ku lamadru ki angatu, la pelaela iya kai, ku Tamatama ka Twaumaseta kwini abaadhane mitane ka kadaengane mathariri ka karawmane ka kadaengane.
26“Ai, wabaebalre numi ki padradrekase ki Tamatama ka Twaumase numi, kai mubangalre mudaane kavai kadaengane. 27La ikai numi ki balrawbau kalisilisi kawrivariva iya kai, ‘Magirimucu ku Tamatama naiane! Ku sangiluku mitane katwase Izipiti pakai ku amalrane mitane baai ki swa Amuri, kwini lalasu lai pakamudu mitane. 28Manemane ku tatara mudaane aiyaneta? Kwini tapelaelane ki lawalrilriu arwa pakakiucu mitane. Kwini lalasu amia kai, kwini swa kai kwini ku laumawmase tagagarange ka tangicaecaeme ku tacebeane; ku mapapangale yadringi ki makecenge ka cekele, ku alradre ki cekele laka taabebelenge. Kwini lalasu la dreleana kwini ki tadradradrau ka swa Anake!’
29“Ai nau pelaela numiane, ‘Madha mukulukuludru liniane. 30Ku Tamatama ka Twaumase numi lri sangiluku numiane, si pasikai numiane kikaruburu, mia sakanadruma. Wadrele numi iniane sa ikai Izipiti, 31si calragulragu ku tapasikaiyaneini numiane sanaka maneemane. Wasangiluku ku tadadavacane numi la kasulivalivate darurunga kikai, mia ki kwidra ki tatama ka wasangiluku ki lalakeini.’ 32Ai, adravane tumanaiyaku kawriva, ai sakamiana numi kai mubangalre sudralru ki Tamatama ka Twaumase numi. 33Adravane ka ngimiyaiya kikai, kikai Tamatama thadaalrane ka tasacucubungane numiane, pasikai numiane silape ku lrika tasakaesadhane numi. Luka maungu arakai ku apwi ka ulrudru, lukavaiyane arakai ku ememe ka ulrudru, sangiluku ki tangukakaiyane numi ku kadadalranane.”
Pathavungu ku Tamatama ki swa Iseraylri
(Taasipane 14.20-45)
34“Ku Tamatama kialalra ku takalisiane numi, la kaelaela turamuru, si kiketekete iya kai, 35‘Kunumi ka ngililisianenga ka zidai kai, kadrwa ku naneanenga kulri maka mudaane kwini puvagangali ki cucungulane numi kwini karawmane ka kadaengane; 36Kathane ku lalake ki Yepuni ka Kalebe kalri maka mudaane. Asi lwiyane kwini lasu savaeva ku takidremedremaneini ku twapapalra nakwane; lri baadhaku iniane si lagaganeini kwini sanaka tangukakaiyaneini kwini mathariri ka kadaengane.’ 37Ngwalailringa numiane, ku Tamatama la mialri kaelaela nakwane. La iya kai, ‘Musi, adravane kusu kaisu lri maka mudaane kavai ki kadaengane. 38Ai kwini tara paralubu muswane, ka lalake ki Nunge ka Yesua, lri maka mudaane; lri paralubaku iniane kakecenge. Lri kamani ku wasangiluku ki swa Iseraylri drikisi kavai kadaengane.’
39“La pacungulu ku Tamatama iya kai naiane kawriva, ‘Kwini kai wadulrwana thingale pilri ku pacengecenge si kai pacengecenge ku lavavalake, kwini lri tara kiribici kimalra ki badha iya numi, lri ngibaalrelringa ka amani ku mwa daane kwini ki kadaengane. Kwini lalasu lri drikisi kwini ki kadaengane; lri baadhaku kwini kadaengane liniane. 40Ala kunumi ka laumawmase, lri siwlriwlri numi, si papia ka tali laveke Suize ka calragulragu.’
41“La tubalre numi, ‘Musi! Pasalriu nai ki Tamatama! Kikai lri pasusu nai ku drekase ki Tamatama ka Twaumase nai, si mwa kikaruburu.’ Kunumi ka tangeea la makitu ngirarukudra, padulru ku akikaruburane, lri pakaduaita si maka drikisi kavai lregelrege amia numi.
42“Ai, ku Tamatama kawariva nakwane, ‘Lu mwa pakipapawlringau liniane, madha mwamwa kikaruburu, amani lu kipamalebe ki badha, asi lwiyane kwini kainaku lri tapalra liniane.’ 43La malra ku pelaela liniane ku vaga ki Tamatama pathingale liniane, la kai numi tumanemane, si katwase numi baebalre iniane, la ngikagagarangane katwase mwa kikaruburu papia tali lregelrege. 44Kwini yakai kwini ku umawmase ki Amuri la mia ki latumu kariciu si vunguvungu kidresenge kikaruburu numiane. Kwini lalasu la kikaruburu si kurisi numiane, la saladha padaruru tali lregelrege ka Idume kavai Hurema, la ikai kwini pamalebe numiane. 45Kwini kwidra la tubi numi si kitubi ki Tamatama, ku aparalubane numiane; ai kai mwabangalre kilalra ku takitubiane numi kai twamanemane numiane.
Acaicali ikai calragulragu
46“Yakainga nai Kadise kawlai turamuru.”
Currently Selected:
Tapelane Drekase 1: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
