Taasipane 23
23
1Ku Balame la iya kai ki Balake, “Kusu pasikaiyaili darepe ku taipitwane ku tapatarumaramarane, si baai nakwane ku pitu ku sawvalai ka lwange si pitu ku balase ka kiu.”
2La pangimia ku Balake: Kwini lasu si Balame la ikai ki vaeva ki tapatarumaramarane patarumara ku vaeva ku sawvalai ka lwange si vaeva ku kiu. 3Ku Balame la iya kai ki Balake, “Acegecega ikai thili ki patarumarasu ka Lama ka lrisi; nau mwa drele lulri kikawriva nakwane ku Tamatama. Ku cunuini nakwane luka manemane, lri tara pelaelaku muswane.” Ku Balame la tarungeangea mwa kalididu lregelrege. 4Ku Twaumase wadrele ki Balame; la iya kai ku Balame, “Maka wadarepengaku tu pitu ka tapatarumaramarane, ki vavaeva ki tapatarumaramarane la patarumara paka vaeva ku sawvalai ka lwange si vaeva ka balase ka kiu.”
5Ku Tamatamala pelaela ki Balame ku akawrivaneini, ala pamwa iniane kavai ki Balake, si malra pelaela ku vaga ki Tamatama. 6Ku Balame la siwlri, la drele ki Balake si kwini ki lakiacapili ki swa Muabe acegeecegeana ikai thili ki Lama ka lrisi.
7Ku Balame la yugingi:
Ku talialalai ki Muabe ka Balake wasangiluku nakwane mulatadre Siwlria,
la sangiluku nakwane twalai talrawane ki lalregelrege.
Amia kai: Bwala, pasikaiyaili pusu ki Yakubu;
bwala, pasikaiyaili pusu kaelaela ki swa Iseraylri.
8Ku Twaumase lu kai pusu, lri tumanaku maka pusu?
Ku kaika pusu ki yabelenge ka Tamatama, anaku maka pusu?
9Twaladhaku alrisapesape drele liniane;
Twaladhaku ki lrelrelrege drele liniane.
Kwini lalasu amani ku mwakalrivili ka vaeva ka kuni;
Kwini lalasu makisubulrubulrubulru ki drumane ka kuni.
10Ku mwabaibalrithi ki Yakubu mia ki thuvugu ku pangalane lini;
Ku pangalane ki mwabaibalrithi ki Iseraylri kaika amaka asiasipane.
Anau mia ki kawkawlu ki Twaumase ku tapanianiakaneli makalautu;
nau ka paramia ki madringelrese ka umawmase kasulivalivate katwase kawmasane.
11Ku Balake la iya kai ki Balame, “Manemane kai piasu kai nakwane? Ani kela kai si pusu ki badhali amiaku, la subulrubulrulringasu liniane.”
12Ku Balame la iya kai, “Kathane ku kawriva iya nakwane ki Tamatama ku akawrivaneli.”
Saka kingipusale yugingi ki Balame
13Ku Balake la kawriva ki Balame, “Tupalraili mwa ki talidrumane ka kadaengane, twalai kwini lri drelesu ku drumane ku swa Iseraylri sikathane. La ikaiya kwini pasikai nakwane pusu liniane.” 14La iluku ki Balame mwa kwini angangade Zupime ka yalregelrege ka Pisega, la ikai kwini darepe tu pitu ku tapatarumaramarane, ikai kwini ki la tapatarumaramarane paka vavaeva patarumara ku sawvalai ka lwange si vaeva ku balase ku kiu.
15Ku Balame la kawriva ki Balake, “Acegecega ithili ki Lama ka lrisi, nau mwa kavai kidrele ki Twaumase.”
16Ku Tamatama sa drele ki Balame, peaelaela ku lrika saiyaiyaini, ala pasiwlri iniane mwa kavai ki Balake, la pelaela iniane kwini vaga ki Twaumase. 17La siwlri ku Balame, la drele ku Balake si latarasangililuku ki swa Muabe la acegecegeana ikai thili ki Lama ka lrisi. Ku Balake la kivaga iniane luka tumana amia ku Tamatama, 18ku Balame la kawriva kikai lebe kai yugingi:
Abwala, ka lalake ki Zipure ka Balake;
Abwala kilalra kai aiyaneli.
19Ku Twaumase makaela ki umawmase, kai lri tavuvulrucu kawriva;
Kai ka paramia ki langumawmase, kai lri tupela ku takidremedremaneini.
Ku palraingingaini ku vaga, lri tara pangimia;
Sana avavaga, ngiamia ku awngane.
20Kia sikawlaku subulrubulru;
Ku apatarumarane ki Twaumase, kainaku lri maka balre.
21Wathingalenga naaku ku lrika angimiane ki swa Iseraylri,
kadrwa ku amulisiane, kadrwa ku akwalriane;
ku Tamatama ka Twaumase lini watapalra liniane;
kwini lalasu twa abelenge ki Tamatama tutalialalai lini.
22Ku Twaumase wasangiluku liniane katwase Izipiti;
Mia ki yaubulane ka lwange pasikai liniane kikaruburu.
23Sanaka lrisi kadrwa kulri dulru tulisi ki Yakubu;
kadrwa ku lri dulru tulrisi kabebetethe ki swa Iseraylri.
Kaiasasane, ku laumawmase lri mapelaelaela ki swa Iseraylri, iya kai,
“Drela, ku Twaumase pangiamia ka matiasamali ka awngane!”
24Ku swa Iseraylri mia ki tina ka raiyungu;
mia ki garagarange ka sawvalai ka raiyungu;
Kai wathamukulu ki nipanane,
Kai waungulu ku erai ki nipapacadhane, kai lri pagulra.
25Ku Balake la kawriva ki Balame, “Kwini kaisu wapusu ki swa Iseraylri, ai nai kaisu ka swabulrubulru liniane!”
26Ku Balame la tubalre, “Kainaku ka peaelaelanga muswane, lri tara singikaiyaku ku takawrivane ki Tamatama si pangimia iya?”
Saka kingitulrulu yugingi ki Balame
27Ku Balake amia kai, “Tupalraili, lri ilukaku muswane mwa ki talidrumane ki kadaengane. Ku Twaumase alau lri pikai kavai si pasikaisu nakwane pusu liniane.” 28La iluku ki Balame mwa kwini tamasiasirarane ka calragulragu ka lregelrege Piure. 29Ku Balame la kawriva, “Pikaiya kai pasikai nakwane darepe ku pitu ka tapatarumaramarane, si iluku ku pitu ku sawvalai ka lwange si pitu ku balase ku kiu.” 30Ku Balake la pangimia, ikai kwini ki la tapatarumaramarane si patarumara ku vaeva ku sawvalai ka lwange si vaeva ku balase ku kiu.
Currently Selected:
Taasipane 23: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
