Taasipane 22
22
Wadawlu ki Balame ku talialalai ki Muabe
1Ku swa Iseraylri la katwasana aru cucubungu ku kadadalranane lini, si ikai dratane Muabe ki tali talrawane kadravane Yuredange, ka balrealreanane Yeriku tutasuladhane.
2Ku Balake ka talialalai ki swa Muabe ka lalake ki Zipure kialalra ku tapangimiane ki swa Amuri ki swa Iseraylri, 3la thingale ku umawmase lini ka mapangale, kwini lasu si mapapangaleini la makitu mukuludru. 4Ku swa Muabe la kawriva ki latarasangililuku ki swa Midiange iya kai, “Kikai laumawmase kai lri tara thainu si amudu kikai lamanemaneta demedeme, mia ki lwange lu kane ki yaubulane ka ubulu.” Talialalai ki Balake 5siakawlu mwa kikawriva ki Balame ka lalake ki Biure; ku Balame yakai ki taikaiyane ki swa Amau, adeethe ki kadravane Yuparati ka Pithure. Kwini kiasikawlu la pelaela iniane ku vaga ki Balake, “Yakai ku taingea ka zuku ka twalai Izipiti, wasarau ikai ki druanga ku mapapangale, lri kela malra ki kadaengane nai. 6Ku umawmase laka tapapangale naiane, lakamani bwala kela naiane, si pasikai naiane pusu liniane. Alau lri dulru nai pamalebe liniane, si pakatwase liniane kai ki kadaengane kai. Wathingalaku, lu subulrubulrusu, lri kaesai ku mapapangale; lu pususu, kwini lalasu lri matikuru.”
7Ku latarasangililuku ki swa Muabe si swa Midiange wailuku ku sakithingathingalane tulrisi si mwa ki Balame, la pelaela ku kidremedreme ki Balake iniane. 8Ku Balame la iya kai liniane, “Kunumi suladha ikai kai, lwiya lri pelaelaku numiane ku taiyane ki Tamatama nakwane.” Ku latarasangililuku ki swa Muabe la asuru sulai ikai ki Balame.
9La kela ku Twaumase mwa ki Balame, kivaga iniane, “Kikai taelre muswane sulai kai laumawmase laneane?”
10La tubalre ku Balame, “Ku talialalai ki Muabe ka Balake siakawlu liniane kela pelaela nakwane, 11kwidra twalai Izipiti mulatadre ku taingea ka zuku, wasarau ikai ki druanga. Ani pasikai nakwane amia pusu liniane, la nai pamalebe liniane, si pakatwase liniane.”
12Ku Twaumase la kawriva ki Balame, “Madha tupalrapalra kai ki laumawmase mwa, la madha pusupusu ki swa Iseraylri, asi lwiyane swabulrubulrwaku liniane.”
13Saka samakapusale ki mialrealre, ku Balame la mwa kikawriva ki sasiakawlu ki Balake, iya kai, “Lu siwlria, ku Tamatama kai palraingi nakwane tupalra numiane.” 14Kwini lalasu la katwase siwlri kikawriva ki Balake, si pelaela liniane ku Balame kai twapalra liniane kainganai iya.
15Ku Balake la sikaaulunga ku mabeebelenge ki siaswalane mwa. 16Kwini lalasu la mwa kikawriva ki Balame, si pelaela iniane ku kidremedreme ki Balake, “Madha ngupakaikai ki manemanenga si kai kainganai! 17Lri tara tuadravaku pakalreva kiaseasene muswane, adravane tumana iyasu lri tara pangimiaku. Bwala pasikaiyaili pusu kai ki laumawmase.”
18Ai ku Balame la iya kai, “Adravane ku Balake malra pakanaelre ku yakai ki daane ki talialalai ku kingi ku gingi si baai nakwane, kainaku lri maka ikai ki tikiyane ka awngane si baebalre ku drekase ki Tamatama ka Twaumaseli. 19Ai kunumi suladha ikai kai, mia kwidra ki siaswalane, la nau thingale lu ikaiyana ku drumane ku vagaini nakwane ki Tamatama.”
20Kwini sakamaungu, ku Twaumase wakela ki Balame, si kawriva iniane, “Lwiyasi kikai laumawmase ka wakela kitubi muswane tupapalra liniane, kipadulrwa si tupalra liniane, ai singikaiya ku vagali pangimia.” 21Saka samakapusale ki mialrealre, ku Balame la suragele ku tangukaiyaneini ki ruba, si tupalra ki tarasangililuku ki Muabe katwase mwa.
Balame si rubaini
22Ku Twaumase kai kiaragai ki Balame tupapalra liniane. Ku Balame la ngukai ki ruba, la tadrusa ku sasiakawluini tupalra iniane ikadalranane, ku sasiakawlu ki Tamatama la ikai kadalranane telenge ki kadalrananeini. 23Ku ruba la drele ku sasiakawlu belenge ecenge ku dramu acegecege ikai kwini, la katwase kwini ki kadalranane, ngibangulu mwa ki angangade. Ku Balame la lrumai ki ruba, anisiulri mwa ki kadalranane iya. 24Ku sasiakawlu belenge la acegecege ikai ki drusa ka budu ki ngwatiiki ka kadalranane, maecebe ki kadalranane ku raedre. 25Ku ruba sadrele ki sasiakawlu belenge, la ngukakai ki taraeraedrane, gisagisi pakadula ku drapale ki Balame, ku Balame ala pelanga lrumai ki ruba. 26Ku sasiakawlu belenge la arwakai cucubungu, si acegecege ikai ki ngwatiiki ka kadalranane, kwini ki maecebe kadrwa ku amaka ngukaiyane lribate. 27Kikai, ku ruba sadrele ki sasiakawlu belenge la gurapangane. Ku Balame la kagirimucu kalisi, si arakai ku ukudru lrumai ki ruba. 28Kikwini, ku Tamatama la pakawriva ki ruba, ku ruba la iya kai ki Balame, “Watumanaku muswane? Asu sangu tulrulu lrumai nakwane?”
29Ku Balame la iya kai ki ruba, “Amani sa ranausu nakwane! Ana ecengaku ku lrabu, nai papacainga naku muswane!”
30La tubalre ku ruba, “Kainaku kamani ku singika lavavalakesu ngukaikai ka ruba? Ku tangilribatanenga paiyanga naku kai marasikai muswane?”
Ku Balame la tubalre, “Ini!”
31Ku Tamatama ala padrele ki Balame ki sasiakawlu belenge sa malra ku dramu si acegecege ikai kwini, ku Balame la guruthungane idaedae. 32Ku sasiakawlu belenge la iya kai iniane, “Asu kirimu sangu tulrulu lrumai ki ruba? Wakelaku telenge ki kadalrananesu, asi lwiyane kaika amaka mwanesu. 33Kwini rubasu wadrele nakwane, la sangu tulrulu katwase mubere, lwiyasi kai katwase mubere, nai papacainga naku muswane, si naika amanini ku waudripi.”
34Ku Balame la iya kai ki sasiakawlu belenge, “Pasalrivaku; kainaku wathingale ala ka amanisu ka watelenge nakwane ikai kadalranane. Lwiyasi kaika amaka mwaneli, nau siwlri mubalriu.”
35Ai ku sasiakawlu belenge la iya kai, “Lu tupalra kikai ki laumawmase! Ai singikaiya ku taiyaneli muswane kawriva.” Ku Balame la katwase tupalra liniane.
Ku Balake kiadredresenge ki Balame
36Ku Balake sa kilalra ka wakela ku Balame, la katwase mwa ka cekele Are kidredresenge iniane; kikai cekele yakai kwini ki pagisane ki Muabe ka babiabila kadravane Arenunge. 37Ku Balake la iya kai iniane, “Satau pakatwasaku ku wamwa dawlu muswane matumane asu kai kela? Lu kidremedremesu kai lri maka pangulwadhane pakalreva nakwane amiasu nakwane?”
38La kawriva ku Balame, “Kikai kainaku ka wakelanga? Kaiasasane, manemane ku adulrwaneli? Kathane ku kawriva iya nakwane ki Twaumase ku aiyaneli.” 39Ku Balame la tupalra ki Balake mwa ka cekele Huzuthe. 40Ku Balake la culu ku lwange kiu, la baai ku beate ki Balame si kwini ki latarasangililuku ka twapalra iniane.
Aswalaalanga ka yugingi ki Balame
41Saka makapusale ki mialrealre, ku Balake la iluku ki Balame mwa ka Bamuthe Baale; patwalai kwini ku Balame la twalai kwini si drele kwidra drumane ka swa Iseraylri.
Currently Selected:
Taasipane 22: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
