Taasipane 24
24
1Kikai ku Balame wathingalenga ku Tamatama ka ani subulrubulru ki swa Iseraylri amia iniane, lakamani kikai kaika pangiamia ki siaswalane katwase kitubi ku lrika angimiane. Kwi lasu ngiabangulu papia calragulragu, 2la drele ki vavaeva ka zuku ki swa Iseraylri makitu tutasuladhane ikai kwini. Ku Ri ki Twaumase amani ka padrekadrekase iniane, 3Kai lasu la kawriva kikai lebe kai yugingi,
vaga ki Balame ka lalake ki Biure,
kwidra wacege si drele#24.3 “kwidra wacege si drele” ku wahunyake madu iya kai “wamemecane ku maca”. ka umawmase amia kai,
4maka kialalra ka tumana amia ku vaga ki Twaumase.
Yakaiyaku ki mia ki sipi lengethe drele,
kwini maburusi ka twalai ki wadulru sanaka manemane.
5Ku balrawbau ki Yakubu ala mathariri turamuru!
Ku tasuladhane ki Iseraylri matiasamali turamuru!
6Mia ki matitilibi ka abare,
mia ki babengelradhane babiabila kadravane,
mia ki lredreke ki alrima ki Tamatama ka aluise ka angatu,
mia ki cedare ka angatu ka yababiabila ki aciacilai.
7Kwini lalasu kiasuete ki lamu;
ku sapaivai lini wasabulu pikai ki mangangerece ka angangade.
Ku talialalai lini masanianiange ki Agage;
ku kuni lini wadaruru arwa swadrau papia kidruanga.
8Ku Twaumase wasangiluku liniane katwase Izipiti,
mia ki yaubulane ka lwange pasikai liniane kikaruburu.
Kwini lalasu wathamukulu ki labadha,
si tatuithi ku culrale ki labadha,
la cacelra ku lraili lini.
9Kikai kuni mia ki sawvalai ka raiyungu ku garangane;
lu kasipelrenge mia ki tina ka raiyungu, kadrwa ku umawmase ku walreme aceace iniane.
Ku swabulrubulru ki swa Iseraylri, lri tara kisubulrubulru;
ku wapusu ki Iseraylri, lri tara matikuru.
10Ku Balake la gemegeme ku alrimaini ki lisianeini, la iya kai ki Balame, “Ku dawluli muswane ani pusu ki badhali amiaku, la kingitulrulusu subulrubulru liniane. 11Lu siwlria! Napalraingingaku pakalreva muswane, ai ku Tamatama ani kai maka malra amia muswane.”
12Ku Balame la tubalre, “Kawarivangaku ki sikawlusu, 13adravane pakaelresu kwini lakingi si gingi ku yakai ki daane ki talialalai baai nakwane, kainaku lri maka ngisasingikai si balre ku drekase ki Tamatama. Kathane ku ani kawriva iya nakwane ki Tamatama ku akawrivaneli.”
Bibiilrilinga ka yugingi ki Balame
14Ku Balame la kawriva ki Balake, “Kikai lri siwlriaku mwa ki lasakacekeleli kavai. Sa kainaku katwaseana, lri pakipapawlringavaku muswane, asu thingale lukabibilrili kai swa Iseraylri lu lrika pangiatumane ki laumawmasesu.” 15Ku Balame la kawriva kikai lebe kai layugingi,
ku sapelaelane ki lalake ki Biure ka Balame,
kwidra maka wacege dredrele ka umawmase amia kai,
16kwi lasu maka kialalra ka tumana amiamia ku Twaumase,
la tarumaraku ku twalai ki Abebeelengenga ku thingalane.
Yakaiyaku ki mia ki tasipiane lengethe drele,
kwidra ki twalai ki wadulru sanaka manemane ka Twaumase ka maburusi.
17Pwadailaku drele kwini ki bilrilane;
wadrelaku ki kuni ki swa Iseraylri.
Yakai ku vaeva ku waleedra ka tariau twalai ki Yakubu mutaluvaivai;
Yakai ku tangea ku talialalai twalai ki swa Iseraylri acegecege.
Lri tatuithi ki latarasangililuku ki swa Muabe,
si paukadrulu demedeme ki umawmase ki swa Sethe.
18Lri pamalebe ki badha ka swa Idume,
la ravase ku kadaengane lini.
Lri parwakai pamalebe ku swa Iseraylri.
19Ku swa Iseraylri lri dradredre liniane,
pwa amudu kwini ki tedrane ka umawmase.
20Sakabilrilane, ku Balame la ikai ki maburusi drele ki swa Amaleke, la kawriva kikai lebe kai yugingi,
Kai swa Amaleke namani ku sapupukwanenga ka kuni,
ai luka bilrilinga lri tara kaamudu.
21Ku Balame yakai ki maburusi drele ki swa Keni, la kawriva kikai lebe kai yugingi,
kwini taikaiyanesu namani ku mapapedrenge,
mia ki nitulisisukane ikai ki tukadrane.
22Ai kunumi ka swa Keni lri kiamudu numi;
ku swa Asiria lri malra ravase numiane.
23Ku Balame la yuginginga,
kwini yasaruburubu ikai tali dradha aneane?#24.23 “kwini yasaruburubu ikai tali dradha aneane?” Ku wahunyake madu iya kai “ala matiatubi! Ku tapiane kikai ki Twaumase, aneane kulri maka udripi?”
24Yakai ku twalai Saipuruse ku taramucekele ngwakai ki varukuru kainganai;
kwini lalasu lri gemegeme ki Asiria si Ibere,
ai kwini lalasu mialri lri tara kiamudu.
25Ala katwase mubalriu ku Balame, ku Balake mialri katwasenga.
Currently Selected:
Taasipane 24: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
