Maruku 8

Wapakane pakabucuku ki ta 4,000 ka umawmase

(Matai 15.32-39)

1La kai tarathainu ku tangilribatane, la ikainga ku takaalra ku laumawmase ku yaelrelre irubu. Laka kadrwa ku kane lini ku namaneemanenga; ku Yesu la dawlu ki lasitu, si iya kai liniane, 2“Makalithaku kai ki laumawmase; asi lwiyane kai lalasu makatulrulunga ku tatupapalrane nakwane, kai asasane la kakadrwa ku akaneane. 3Lwiyasi la pakasilravaku liniane mubalriu, kai lalasu lri tubakebake ikadalranane, asi lwiyane kai lalasu yakai ku singiadaili kainganai.”

4Ku lasituini la kivaga iniane, “Ikai kai ki tadailane ki lacekele, lri muinu nai makakidringai ku amukesane ku akaneane si pakabucuku kai ki takalra ka laumawmase?”

5Ku Yesu la kivaga liniane, “Thaininu ku pikai numi ku pange?”

Kwi lalasu la tubalre, “Pitu”.

6Ku Yesu la cunu panenea ki laumawmase ikai cakena, ala malra kwini pitu ka pange, si kiaseasene ki Twaumase, la apapipithingi si baai ki lasitu, ku lasitu ala apavalavala baai ki mapapangale. 7Kai lalasu la pikaiyana ku lukapia ku tatitiki ka kange; ku Yesu la patarumara kiaseasene, la apavalavala ki situini baai liniane makanaelre. 8-9La kanenga makanaelre, si kabucukunga; ku wakane ikai ku ta 4,000 ku laumawmase. Ku lasitu la sarubu ku lapapithipithingane ka tedrane, la pasuete ki akupitu ki karadrare. Ku Yesu ala pasawvagavagai ki laumawmase, 10la makakaai karedele ki lasitu mubelenge ki varukuru si katwase papia talikai Dalamanutha.

Ku swa Palrisai kiatubi ku pinangu Twaumasane ka puku

(Matai 16.1-4)

11Yakai ku tapiya ku swa Palrisai ku wakela kikawriva ki Yesu, si madradrikisi ku vaga iniane. Kai lalasu kiasanu tulisilisi iniane, la kitubi iniane ku pinangu Twaumasane ka puku, ka sapelaelane ala ka twalai ki Twaumase kudra tapianeini. 12Ku Yesu la daange turamuru, si iya kai, “Kikai zidai kai umawmase ani ngithaanga kitubi ku pinangu Twaumasane ka puku? Nau pudriadriingai pelaela numiane, kikai zidai kai umawmase kai swadalepe drele ku pinangu Twaumasane ka puku!”

13Kwi lasu la katwase liniane si mubelenge ki varukuru talubalre mwa balrealreanane.

Sapawsemakane ki swa Palrisai si Hirudi

(Matai 16.5-12)

14Ku lasitu la karimuru ngukalra iluku ku pange, laka vaeva ku pange ku yakai ki varukuru, kadrwa ku drumane ku akaneane. 15Ku Yesu la pakipapawlringau liniane iya kai, “Wadradreele madu, ngipapalakeba ki sapawsemasemakane ki swa Palrisai si Hirudi.”

16Kai lalasu la kirimu matetetenge mapelaela iya kai, “Kai taiyaneini yai amani sa pakakadrwata ku pange.”

17Ku Yesu wathingale aka manemane ku kidredredreme lini, la kivaga liniane, “Anu mapelaelaela ku kaika tailukane numi ku pange? Kai numi maka pwalringauana, kai maka thingaleana? Ani ngithaanga kakulrungu kwi awlru numi? 18Yakai ku maca numi ai kai maka wadreele, yakai ku calringa numi ai kai maka kialalra? Kai numi ngwalringau 19sa apapipithingaku ku lrima ku pange si baai pakane ki ta 5,000 ku laumawmase? Ku sarubu numi kudra lapapithingane ku tedrane laka akupiana ki karadrare?”

Kai lalasu la tubalre, “Aku 12 ki karadrare.”

20Ku Yesu la kivagana, “Sa apapipithingaku ku pitu ka pange si pakane pakabucuku ki ta 4,000 ka laumawmase, kudra sarubu numi ku lapapithingane ku tedrane laka akupia ki karadrare?”

Kwi lalasu la tubalre, “Akupitu ki karadrare.”

21Lakamani ku Yesu kivaga liniane, “Lu ngimia kwini, la kai numi maka pulringalringawana?”

Pawadringai ki mamukici ka swa Bithesaida

22Kwini lalasu sa kainganai mwa kai Bithesaida, yakai ku umawmase ku wailuku ku tangea ku mukimukici mwa cucubungu ki Yesu, si kitubi ku asulrapane iniane. 23Ku Yesu la arake ki alrima ki mukimukici, si iluku pulrilringulu la paswala sungalrai pikai ki macaini, ala ansu ki kinawmasaneini, si kivaga iniane, “Maka wadrelesu ki lamanemane?”

24Kai lasu la paswabelenge drele, si iya kai, “Wadrelaku ki umawmase, mia ki vavaeva ka angatu ka masasawlriwlri dadadavace.”

25Ku Yesu la puanga ki maca ki lasu kudra alrimaini. Kwini mukimukici la pangicaeme drele, kudra tadrelaneini la kitulrepengenga kathariri si pudriadringainga drele patuelre. 26Ku Yesu la pawtavanane iniane, si pelaela iniane iya kai, “Madha mucekecekelenga.”

Ku Pitiru wathingale ki Yesu ala ka Kirisitu

(Matai 16.13-20; Luka 9.18-21)

27Ku Yesu si lasituini matwase papia kwidra ki la ngwadadethe Kaisaria Pilripi ka lacekele. Sa ikadalranane, la kivaga liniane iya kai, “Kai laumawmase aneane amiamia nakwane?”

28Kwi lalasu la tubalre, “Yakai ku tarapabanau ka Yuhani amia; yakai ku Ilria amia; la ikai ku tangea ikai ki layuginsia amia.”

29Ku Yesu la kivaaganga liniane, “Kunumi aneane amia numi nakwane?”

Ku Pitiru la tubalre, “Kusu Kirisitusu.”

30Lakamani, ku Yesu wacunu liniane madha pelaelaela sanaka aneaneaneanenga kikai takaumawmasaneli.

Pakanaswala kawriva ku akwalriane si apacadhaneini

(Matai 16.21-28; Luka 9.22-27)

31Ku Yesu la pathagili bulru ki lasituini iya kai, “Kai Lalake ki Umawmase lri tara kipadradreesenge ku makalra ku akipakwalriane, lri kikalrase ki laciwru, ki lamarudrange ki labarakalai si latarabulrubulru ki Sisiu, lai lri kipapacai, ai luka samakatulrulu lai sielane panianiake.” 32Kwi lasu la pudriadringai pelaela kikai miyaiya kai. Ku Pitiru la alra bilibili ki Yesu puthili, nau ruthuku iniane iya. 33La ngibangulu ku Yesu, si drele ki lasituini, la kaelaela ki Pitiru iya kai, “Satange, lu katwasa! Kwini takidremedremanesu kaika takidremedremane ki Twaumase, kidremedreme ki umawmase.”

34Lakamani, ku Yesu la sarubu pucucubungu iniane ki laumawmase si lasituini, si pelaela liniane, “Alaiyasi ikai ku nau tupapalra amia nakwane, lri ngicacilri si angeale ku ziwzikaini la kainganai tupapalra nakwane. 35Asi lwiyane kudra kiasanu ngipapalribulu ku niakeini, lri sakaciilrilringa ku niake; kudra pasiakai nakwane si pasikai ki hukuingi cilri ku niakeini, lri maalralringa ku niake. 36Ku tangea ku umawmase adravane malra kai kawmasane, lalri tusabalrithane ku niakeini, manemane ku amuesadhane? 37Kwini lasu lri maka dulrwana malra ku manemane si balrithi ki niakeini? 38Ikai kikai ki wacapange sudringai pasudringai ka sialribate ngilisiane ka zidai, lu ikai ku umawmase ku ngwalai nakwane si vagali la tainu, ku Lalake ki Umawmase ikai kudra ki lrigu ki Tamaini, si kudra ki twapapalra iniane kudra sasiakawluini belenge, lu karededelenga kainganai, lri mialri tainu iniane.”

Currently Selected:

Maruku 8: NDV

Highlight

Copy

Compare