Maruku 9

1Ku Yesu la kawrivanga liniane, “Nau pudriadriingai pelaela numiane, ku acegecege ikai kai ku umawmase, yakai kai lu kaiyana pacai lri dreleana ku puku ki Twaumase lu mailuku ku puku mutaluvayvai.”

Akabalrithi ku tangimiamiane

(Matai 17.1-13; Luka 9.28-36)

2Sa makanemelenga ka vai, ku Yesu wailuku ki Pitiru, Yakubu, si Yuhani, pangwa kibubuuli mwa kwidra ki abelenge ka vaeva ka lregelrege. Ikai cucubungu liniane, ku Yesu la akabalrithi ku tangimiamianeini, 3ku laimaini mialri akabalrithi kapuli si ledra; kai kawmasane kadrwa ku umawmase ku lri dulru pangimia ku takaparamiane ku takapuliane. 4Kwini tatulru ka lasitu ala kiriimu drele ki Ilria si Musi kikawrivariva ki Yesu. 5Ku Pitiru la iya kai ki Yesu, “Sinsi, kai taikaiyaneta kikai mathariri turamuru! Ala nai tudaane tutulru ku balrawbau, anika muswane ku vaeva, anika Musiane ku vaeva, anika Ilriane ku vaeva.” 6Kai Pitiru si drumane ka laumawmase makitwa mukuludru makanaelre, si la kai thingale ku aiyane lini avavaga.

7La ikai ku vaeva ku ememe ku wakabungu liniane. Ala kiriimu, ikai ku twalai ki ememe ku lingau ku amia kai, “Kikai kathalraili ka Lalakeli, kunumi kilalra si pasalaladha iniane!” 8Kwi lalasu la kisaswarau masiasirare, laka kadrwa ku drele lini ku drumane ku umawmase, kathane ku Yesu ka yakai taelre liniane.

9Kwi lalasu sa mulrawlrawdrunga ki lregelrege, ku Yesu la pelaela liniane, “Kai Lalake ki Umawmase sakaiyana siela panianiake twalai ki wapacai, maadha pelaelaela ki naneaneanenga ku tadrelane numi.”

10Kai lalasu kialalra paluludu ku takawrivane ki Yesu, la takumapelaelaela iya kai, “Kwini twalai ki wapacai si sielane manemane ku pacugane?” 11Kai lalasu la kivagana ki Yesu, “Ani iya kai ku latarabulrubulru ki Sisiu lri tara aswala ku Ilria kela?”

12La tubalre ku Yesu, “Ku Ilria patengane ka amani ku lri aswala kela padulru sanaka manemane; ai, ikai ki Sisiu ani iya kikai ku Lalake ki Umawmase lri tara tarumara ku akipakwalriane si kikalrase kicilri? 13Nau pelaela numiane, ku Ilria wakelanga, ai kwi lalasu ala ngilralraingi ku nau pia iya lini iniane, mararamau ku tamatikaiyane ki Sisiu iniane ku vaga.”

Pawadringai ki kiaikai ki aidridringane ka vavalake

(Matai 17.14-21; Luka 9.37-43)

14Kwi lalasu sa siwlri mwa ki drumane ka lasitu, la drele ku takaalra ku umawmase ku ngiathalringulu liniane, la ikai ku latarabulrubulru ki Sisiu icengecenge madradrikidrikisi ku vaga ki lasitu ki Yesu. 15Kwi lamapapangale sadrele ki Yesu la makitu kasamali ngituluku; si katwase lailai kidredresenge iniane makanaelre. 16Ku Yesu la kivaga ki lasituini, “Manemane kai madradrikidrikisi numi ku vaga liniane?”

17Ikai ki laumawmase la ikai ku tangea ku amia kai, “Sinsi, wailukaku ki lalakeli si kela drele muswane; asi lwiyane kiaikai ki menemenene ka aidridringane, la kai dulru kawriva. 18Sana kela kwini aidridringane tusinalrelreme iniane, la patubakebake iniane pudaedae, la tulrawlrawlrapucu ku ngudwini, si pararitaitaiti ku valisi, tukulusane ku kinawmasane. Kiatubinga naku ki lasitusu ku apakatwasane ki aidridringane, ai kwi lalasu kai maka watumane.”

19Ku Yesu la iya kai liniane, “Kunumi ka zidai kikai ka laumawmase ala kadrwa ku salrwane numi! Lri tarathainwanaku ikai numiane? Lri kiadiliana naku tarathainu numiane? Malra iluka ki vavalake mwa kai nakwane!” 20Kwini lalasu la malra iluku iniane kainganai.

Kwini aidridringane sadreele ki Yesu, la makakaai pangicaeme pangikekele kwini ki vavalake, la tubakebake icakena si ngibalrwalrutai, si tulrawlrawlrapucu ku ngudui. 21La kivaga ku Yesu ki tamaini, “Tarathainunga ku takipucaemananeini?”

Kwini lasu la tubalre, “Singika vavalake ikai. 22Kwini aidridringane sangwakalrale pasanu papacai iniane, si malra iniane pwa ki apwi, lrudrulrudrulu pwa ki acilai. Alaiyasi lri dulrusu pia ku namanemanenga, kiatubi nai muswane kakurua naiane, paralubu naiane!”

23Ku Yesu la iya kai, “Unu, alaiyasi lri dulrusu! Ku yakai ku salrwane ku umawmase, sanaka maneemanenga lri tara ngimiya patuelre!”

24Kwini tama ki vavalake la makakaai akwadrau tawtau, “Masalrwaku, ai kai makakelrete kai salrwaneli, paralubaili!”

25Ku Yesu la drele kwini ki laumawmase sa makitu kainganai lritungu ngithalringulu, la kaelaela kwini ki aidridringane, “Kusu ka celecele ka menemenene ka aidridringane, lri drekasaku muswane katwasa twalai kai ki kinawmasane ki vavalake, madha nguselaelanga mwadringi!”

26Kwini aidridringane la karaleale kingivaale, si la alra pangicaeme pangikekele pangiteretere kwini ki vavalake, ala katwase. Kwini vavalake la mia ki wapaacainga, la makitu iya makanaelre, “Wapacainga kai lasu!” 27Ai ku Yesu la taalrima bilibili iniane, si drakale iniane, kwini lasu la kirimu acegecege.

28Ku Yesu sa mudaane, ku lasitu la kibubuli kivaga iniane, “Anai kai maka dulru pakatwase kwini ki aidridringane?”

29Ku Yesu la iya kai, “Kathaane lu pangu inulriane ka lri dulru pakatwase ki miyaiya kai ka aidridringane, kathane kikai kadrwa ku drumane ku apangimiane.”

Ku Yesu peaeelanga pakanaswala pelaela ku apacadhaneini

(Matai 17.22-23; Luka 9.43-45)

30Kai lalasu la katwase kikwini, si ngukakai Galrilri, ku Yesu la kai apipathingale ki naneaneanenga ku tapapianeini, 31asi lwiyane ku Yesu yacengeecenge bulrubulru ki lasitu. La iya kai, “Ku Lalake ki Umawmase lri kipatarumara pikai ki alrima ki umawmase; kwi lalasu lri papacai iniane, lu makatulrulunga ku tapacadhane, kwi lasu lri siela panianiake.”

32Ai kwi lalasu kai pwalringalringau kikai vaga ku pacugane, la mukuludru kai maka kivaga iniane.

Aneane ku sanianiangenga

(Matai 18.1-5; Luka 9.46-48)

33Kai lalasu la kela Kaperenawme, sa mudaanenga ku Yesu la kivaga ki situini, “Sa ikadalranane numi manemane ku la madrikidrikidrikisi numi?”

34Kwi lalasu la kai avavaga makanaelre, asi lwiyane kwi lalasu sa ikadalranane takumadrikidrikidrikisi lukaaneane ku sanianiangenga. 35Ku Yesu la nene, si dawlu kwini ki ta 12 ka situ pucucubungu iniane si iya kai liniane, “Lukaaneane ku nau atamatama amia, lrika amani kudra salrilrilrikudrunga, si lri asasiakawlu ki mapapangale.” 36Samia kwini kwi lasu la silape ku tangea ku vavalake, si pacegecege iniane pikai kabicelrakane liniane, la kebere iniane, si iya kai liniane, 37“Ku pasiakai nakwane si pasudalru ki miyaiya kai ka vavalake, amani ku paswadalru nakwane. Kudra paswadalru nakwane, kaika paswadaalru nakwane sikakathane, mialri ka paswadalru kwidra ki amani ku siakawlu nakwane.”

Wabaebalre si palraingi

(Luka 9.49-50)

38Ku Yuhani la iya kai ki Yesu, “Sinsi, wadrele nai ku umawmase ku pangwakai ku naganesu si pakatwase ki aidridringane, la paisadra nai iniane, asi lwiyane kwini lasu kaika rededelaneta.”

39Ku Yesu la iya kai, “Madha pakaicicilri iniane; asi lwiyane kadrwa ku umawmase ku lri pangukai ki naganeli si pia ku pinangu Twaumasane ka puku, si la makakaai ngibangulu kawriva ku malisi ka vaga kiecebe nakwane. 40Asi lwiyane kudra kai wabaebalre mitane, amaani ku palrainginga mitane. 41Nau pudriadringai pelaela numiane, ka aneaneanenga, kudra ngwalai saka talikai numi ki Kirisitu si la pawngulu numiane ku akuvaeva ki kupu ka acilai, lri tara maalra ku pakalreva.”

Madha kibilibilibili ki pasalrivane

(Matai 18.6-9; Luka 17.1-2)

42Ku Yesu amia kai, “Sanaka aneane ikai ki sinzia la malra ki tangea ka kaika sapatumatumane ka umawmase si pakidaili cilri nakwane, maesaesai arakai ku madrau ka tapasilribulribwane ka lrenege si pakerenge ki lreini, si malra iniane pawrenere ki laveke. 43Alaiyasi papasalriu muswane kwi vaeva ka alrimasu, malra ngetele! Ku thithili ku alrima la malra ku palralrawthu ka niake, mathaithaaririana paraamuru kudra ki malrepenge ku alrima la muswadriadringi si mucilri mwa ki kai maedredrepe ka apwi.#9.43 Yakai ku sidrumane ka hungu ku wadrima ki mwasaka 44 ka vaga “Ikai kwini, kai wapacapacai ku lubalubai, kai maedredrepe ku apwi.” 45Alaiyasi papasalriu muswane kwi vaeva ka drapalesu, malra ngetele! Ku thithili ku drapale la malra ku palralrawthu ka niake, mathaithaaririana paraamuru kudra ki malrepenge ku drapale la kicilri puswadriadringi.#9.45 Yakai ku sidrumane ka hungu ku wadrima ki mwasaka 46 ka vaga “Ikai kwini kai wapacapacai ku lubalubai, kai maedredrepe ku apwi.” 47Alaiyasi papasalriu muswane kwini vaeva ku macasu, malra batwathe mwalra! Ku thithili ku maca la mudaane ki kuni ki Twaumase, mathaithariri turamuru kwini ki malrepenge ku maca ala kicilri puswadriadringi. 48Ikai kwini, yakai ku lubalubai ku kai wapacapacai, kwidra madrareange ku apwi kai maedredrepe.

49“Sanaka umawmase lri kiarakai ku apwi thalethale, mia lu arakai ku timu dawngu. 50Kai timu mathariri, ai kai timu alaiyasi ngwalrane ku tasangutimwane, lri dulrwanata peela pasangutimu? Kunumi pikaiya ku tasangutimwane, la makadawdalru makathaithaithariri.”

Currently Selected:

Maruku 9: NDV

Highlight

Copy

Compare