Maruku 16

Siaela ku Yesu

(Matai 28.1-8; Luka 24.1-12; Yuhani 20.1-10)

1Sangilribatenga ki Taisadrasadrane ka vai, kwidra Magedaleni ka Malria, si tina ki Yakubu ka Malria, si Salumi walangai ku sangwalreme ka lawlau, lri mwa padelreme kudra ki kinawmasane ki Yesu. 2Saka niciwbi sakamialrealre, salrau ku vai, kwini lalisu matwase papia tadralredralrekane.

3-4Sa ikadalranane kai lalisu takwakidredredreme, “Aneanaini ku lri paralubu mitane balrutai ku yakai lrawlrawdru ki takidralrekane ku lrenege?” (Asi lwiyane kwini lrenege maadrau.) Ai kai lalisu sa paswabelenge drele, kudra lrenege ngiabalrutainga. 5Kai lalisu la mwadringi ki balriu, la drele ku tangeea ku yacengecenge ku wanene itali vanale, ka silaimaimai ku lrawlrapungu ku maeelrenge ka laimai; kai lalisu la ngituluku kasamali turamuru.

6Kwini yacengecenge la kawriva, “Madha kasamali! Wathingalaku numiane ka wasilasilape numi kudra kiakedrekedre piziwzika ka swa Nazarethe ka Yesu. Kwini lasu kai yakainga kai, kwi lasu siaelanga panianiake! Drela, kikai natapikaiyane iniane. 7Kunumi lu kirimwa katwase mwa pelaela ki lasituini, inilringa ki Pitiru, iya kai, ‘Kwi lasu lri aswala numiane daruru mwa ka Galrilri, ikai kwini, lri drele numi iniane, mia kudra taiyaneini numiane ku paswalala.’ ”

8Kwini lalisu masamali la mukuludru, la makakaai katwase ki balriu, mia ki ngiapalapalai katwase. Laka kadrwa ku pelaela lini ku naaneanenga, asi lwiyane kai lalisu mwakuludru.

Yakai ku lasidrumane ku hungu ku paelre kikai tali lebe ka tapacasane

Ku Yesu adrelane ki Magedaleni ka Malria

(Matai 28.9-10; Yuhani 20.11-18)

[9Sakamialrealre ki niciwbi, sa sielanga ku Yesu, paswala adrelane ki Magedaleni ka Malria (ku Yesu napatwalai ki kinawmasaneini pakatwase ku tapitu ku aidridringane.) 10Kwini alisu matwase pelaela kudra ki twapapapalra ki Yesu; kwini lalasu yacengecenge tubitubi. 11Kai lalasu kialalra kudra tapelaelane pangukai ku tasielane ki Yesu si tadrelane ki Malria iniane, ai kai kiapawtenga.

Adrelane ki tadrusa ka situ

(Luka 24.13-35)

12Kikai sangilribatenga, ku Yesu adrelane arakai ku maelane ku tapangimiane papia ki tadrusa ka situ ka yacengecenge katwatwase papia ki tikiane ka cekele. 13Kikai tadrusa la siwlri si pelaela ki drumane ka lasitu, kwi lalasu la kasakamia kai kipawtenga.

Adrelane kudra ki ta 11 ka lasitu

(Matai 28.16-20; Luka 24.36-49; Yuhani 20.19-23; Nisikawlane 1.6-8)

14Ku bibiilrilinga, ku Yesu adrelane kudra ki yacengecenge kanekane ka ta 11 ka situ. La kaelaela liniane; asi lwiyane kai lalasu kai masalrwana, la kakeelrathe si kai kasalru ku tapelaelane kwidra ki wadrelenga iniane sa sielanga. 15Kwi lasu la iya kai liniane, “Kunumi lri katwase numi mwa kawmasane salraelre, si pelaela kai hukuingi ki sanaka umawmase. 16Sanaka kiapawtenga si kipabanau, lri tara kipalribulu; ku kai kiapawtenga, lri kitupasalrivane. 17Ku masalrunga ku umawmase yakai ku adulrwane pia kilakikai pinangu Twaumasane ka puku: Kwi lalasu lri dulru pangukai ku naganeli si pakatwase ki aidridringane, lri dulru kawriva ku bavane ka vaga ki ngwakai ki Ri, 18lri ecenge ki sulrau, lu ungulu ku yakai ku duku lri kai katumane, sana ansu pikai ki kinawmasane ki macaeme, lri udringai.”

Kiapusubelebelenge ku Yesu

(Luka 24.50-53; Nisikawlane 1.9-11)

19Ku Tamatama ka Yesu samaka kawrivanga kilakikai vaga, kiapusubelebelenge, si nene ikai vanale ki Twaumase. 20Ku lasitu la katwase, mwa kidruanga pelaelaela ku hukuingi; ku Tamatama la taelre liniane kawaungu, la pangukai ki pinangu Twaumasane ka puku, akasi ku pelaelaela lini ku vaga ka patengane.]

Yakaiyana ku drumane ku lasidrumane ku hungu ku paelre kikai tapacasane

[Kudra lalabaibai la katwase kikawriva ki Pitiru si latalragilragini, pelaela liniane ku takilalrane lini patueelre. Sangilribatenga kikai, ku Yesu la ngikakamani sikawlu ki lasituini, twalai talrawane pekela talriwgane, pelaelaela kwini tinusaniangane, ka kai lri kamudu, ka atarumarane ki umawmase ku palralrawthu ka akipalribulane ka vaga.]

Currently Selected:

Maruku 16: NDV

Highlight

Copy

Compare