Luka 1

Sapathagilane ka vaga

1Mabelenge ka Thiwpilu:

Yakainga ku laumawmase ku kiapuawngane ki apapacasane si tuhungu, pelaelaela ku la ngiamianga ikai mitane ku laawngane. 2Ku tapelaelane lini laka singikai kwidra ki wadrelenga sakapathagilane patakamacamaca ku tangimiane kilakikai, si kudra tapelaelane kwidra ki napasalraelrenga kai ki matiakiragai ka vaga. 3Kikai patuelre singiapathagilinga naku ngutatiki drele tupudriadringai, lakamani ku kidremedremeli nau singikai ku tamasakaikaiyane papia muswane pelaela, 4ku pacugane lani thingale amiaku muswane kwini kibulrubulrusu ku vaga ala ka patengatengane.

Wayugingi ku akitulalakane ki tarapabanau ka Yuhani

5Ku Hirudi ka talialalai sa icengecenge magagemegeme ki swa Yuda, yakai ku tangea ku barakalai, ka sia Zakaria, ka papapalra ki Abiya ka barakalai; ku labaibaini sia Ilrisabethe, mialri ka mwabaibalrithi ki tai Arungu. 6Lu drele ku Twaumase, mararamau kwini tadrusa ka taramadringelrese ku takaumawmasane, ka kiapapawlringalringau pangimia ku padradrekase si kakwakudhane ki Tamatama patuelre. 7Laka kadrwa ku lalake lini, asi lwiyane ku Ilrisabethe kai maka twalalake, laka tarudrawdrangenga mararamau.

8Yakai saka minakavalane, ku Zakaria la icengecenge ka awnganeini, ikai cucubungu ki Twaumase kipuawngane ku awngane ki barakalai. 9Singikai ku tapiapiane ki barakalai ku takuzibikane lini, kai lasu amani ku lri mudaane ki daane ki Tamatama si patarumara ku sapasangulrelremane ka apwi. 10Kai lasu sapatarumaramara ku sapasangulrelremane, ku mapapangale la ilatadre inulrinulri. 11Ala kirimu, ikai ku sasiakawlu ki Tamatama utaluvaivai acegecege ikai tali vanale ki tapatarumaramarane; 12ku Zakaria sadrele, la kathathiburu si mukuludru. 13Ai kwidra sasiakawlu belenge amia kai iniane, “Zakaria, madha mukuludru! Ku Twaumase kialalranga ku inulrisu; ku labaibaisu ka Ilrisabethe lri pasikai muswane tulalake ku sawvalai, lri sunaganesu iniane pasi Yuhani. 14Lri kiraragaisu; si lai takaalra ku umawmase ku ngwalai ki takitulalakaneini si kiraragai. 15Lu drele ku Tamatama, kwi lasu lrika saniange ka umawmase. Sanaka baava, lri kai maka ungulu; ikai ki barange ki tinaini#1.15 “ikai ki barange ki tinaini” ku wahunyake madu iya kai “kwi lasu sakitulalake”., kiasuetenga ki Siri. 16Lrika amanini ku lri sangiluku ki takaalra ki swa Iseraylri pasiwlriwlri mwa ki Tamatama ka Twaumase lini. 17Lrika amani ku aswala ki Tamatama, ka makeecenge si sapukwane, mia ki yuginsia ka Ilria. Lrika amani ku twapela pakakadalru ki marudrawdrange si lalalake, si pasiwlriwlri ki wabaebaebalre ka umawmase, si pangukakai ki kadalranane ki madringelrese si malrigili; lri paralubu ki umawmase pakidredresenge ki Tamatama.”

18La iya kai ku Zakaria ki sasiakawlu belenge, “Lri satalwaku ki manemane si thingale ki kikai? Kai tarudrawdrangenga naku; la mialri ka tarudrawdrangenga ka labaibaili.”

19Ku sasiakawlu belenge la iya kai, “Amaniaku ku acegecege icucubungu ki Twaumase ka sia Gaberaile; kiasikawlaku pelaela muswane, kai matiakiragai ka vaga. 20Ai, ngwalai kwi kaika takasalrwanesu kai tapelaelaneli, sakaiyana kela ku angimiane kwini lavaga, lri kamenenesu, pakela ku lungimianga ku vai ku kiketeketeli ala lri dulrusu avavaga.”

21Kikwidra, la mukalavalava ku mapapangale ki Zakaria, si kaithingale lukamanemane ku kawlaini idaane ki daane ki Twaumase. 22Ala samulatadrenga, kai maka kawariva liniane, kai mapapangale ala thingale, kai lasu sa idaane ki daane ki Twaumase ala ka wadrele ku maburusi. Kai lasu kai maka avavaga, la pangua pakilriwnga ku alrima pathingale ku tangimiamiane.

23Sa palikai ku takipuawngananeini ikai ki daane ki Twaumase, kai Zakaria la katwase mutavanane. 24La kai tarathainu, kwini labaibaini ka Ilrisabethe la ngimia katawbaliri, si taralrima ka dramare kai mulatalatadre. 25Kwini alisu la iya kai, “Ku Tamatama marasiakai nakwane, mwalra ku kaininuli icucubungu ki mapapangale.”

Peaelaela pakanaswala ku akitulalakane ki Yesu

26Sa taraenemenga ka dramare ku takatawbalirane ki Ilrisabethe, ku Twaumase siakawlu ki sasiakawlu belenge ka Gaberaile pamwa tali Galrilri ki vaeva ka cekele ka sia Nazarethe, 27lri pelaela ku vaga ki tangea ka tawvailekete ka sia Malria; kikai tawvailekete kiatusiasilanganenga ki tai Davidi ka sia Yusepe. 28Ku sasiakawlu ki Twaumase mwa cucubungu iniane, iya kai, “Ani ikai ku sulivatane muswane! Kiasubulrubulrusu, ku Tamatama ani tapalra muswane!”

29Ku Malria ngwalai kwini vaga ki sasiakawlu, la kathathiburu turamuru si kai kaliapai ku kidremedremeini, la apapelaelaela kidremedremedreme ku pacugane kwini ki vaga. 30Ku sasiakawlu belenge la iya kai iniane, “Malria, madha mukuludru, asi lwiyane ku Twaumase swabulrubulru muswane. 31Lri katawbalirisu si tulalake ku vaeva ku sawvalai, sunagananga pasi Yesu. 32Lri kamani ku sanianiangenga ku takaumawmasaneini, la lri kipasudalepe ka Lalake ki Abebeelengenga ka Twaumase. Ku Tamatama ka Twaumase lri paacegecege iniane si pawcungulu ku taetalane ki cucungulaneini ka talialalai ka Davidi. 33Lrika palralrawthu atalialalai ki tai Yakubu, ku lrika pukuini atalialalai kadrwa ku apalikaiyane pakela lumamilringi!”

34Ku Malria la iya kai ki sasiakawlu belenge, “Kunaku tawvaileketeana naku ka kaina marudrange, watumane si ikai ku ngimiyaiya kwini?”

35Ku sasiakawlu belenge la tubalre iya kai, “Ku Siri lri mulebe mwa ki kinawmasanesu; ku puku ki Abebeelengenga ka Twaumase lri lakebe muswane. Lakamani, kwini lri kitulalake ka saniange ka daini Lalake ki Twaumase lri kiiya. 36Drela ki retesanesu ka Ilrisabethe, unu tarudrawdrangenga, kai lri maka tulalakenga la iya iniane ku palrapalra, ai kikai taraenemenga ka dramare ku takatawbaliraneini. 37Asi lwiyane ikai ki Twaumase, kadrwa ku navaevanga ku kaika amakadulrwaneini tumane.”

38Ku Malria la iya kai, “Sasiakawlaku ki Tamatama; aningimia kai vagasu ikai ki kinawmasaneli.” Ala katwase ku sasiakawlu belenge kidaili iniane.

Ku Malria walrikape ki Ilrisabethe

39La kai tarathainu, ku Malria la katwase, kiraririimu papia tali lregelrege, sa darurunga kwidra ki taluvaale ka cekele Yuda. 40La mudaane ki daane ki tai Zakaria, si kikawriva ki Ilrisabethe. 41Ku Ilrisabethe sa kilalra ku vaga ki Malria, kudra yabarangane ku lalake la itituku ngivelevele. Ku Ilrisabethe la kisuete ki Siri, 42si tawtau akwadrau iya kai, “Kusu ikai ki laababai makisubulrubulrubuulrungasu; kwini yabarangane muswane kwini lalake maiyalri kisubulrubulru! 43Kusu ka tina ki Tamatamali kai kelasu lrikape nakwane, manemane si sudalepaku? 44Sa kilalraku ku lingau ki sakikawrivanesu, kai yabarangane nakwane kai lalake la itituku ki sakiararagai. 45Ku masalru ku takiyaneini ki Tamatama, ka lri tara ngimia kwini ababai lri kaesai turamuru!”

Sadrengedrengerane ki Tamatama ka senai ki Malria

46Amia kai ku Malria:

Kai kidremedremeli wadrengedrengere ku takasanianganane ki Tamatama;

47kai abakeli kiararagai ki Takipalribulribulaneli ka Twaumase;

48asi lwiyane ku Twaumase ngwalringalringau ki makukulrungu ka sasiakawluini ka ababai.

Twalai kaikameane, sanaka umawmase ala kiasubulrubuulru lri iyaiyanga nakwane,

49asi lwiyane kai sapupukwanenga ka Twaumase pasiakai nakwane pangimia kudra maadrau ka awngane.

Ku naganeini sanianiyangenga;

50papia kwidra ki mwasakene iniane ka umawmase wabaai ku thalradhane,

pakela lumamilringi.

51Wasege ku sapukwane ka tabalanganeini,

si mwalra kudra kidredredreme patuelre ki ngiakamiane ka umawmase.

52Wamalra kwidra ki sapukwane ka talialalai twalai ki taetalaneini lrudrulu pulebe;

la alra parwabelenge ki alelebe ka umawmase.

53Wamalra kwidra ki mwabaisi ka umawmase pakane pakabucuku ku malimeme ka akaneane,

kwidra ki maesaesaesai ka umawmase la pamaliwnawnai pakatwase.

54-55Kwini lasu pangiamia ku kiketeketeini ki cucungulaneta,

paralubu ki sasiakawluini ka Iseraylri.

Makalithi ki Aberahame si kathalrai iniane,

si padaruru ki mwabaibalrithi ka lagagane, pakeela lumamilringi!

56Ku Malria la ikai ki tai Ilrisabethe taratulru ka dramare, ala mutavanane.

Takitulalakane ki tarapabanau ka Yuhani

57Ku Ilrisabethe kudra atulalakaneini ka vai wadarurunga, la tulalake ku vaeva ka sawvalai. 58Ku pasiagiagisi si retesaneini sa kilalranga ku baai ki Tamatama iniane ku maadrau ka takikakurwane, twapapalra iniane kiraragai makanaelre.

59Sangilribatenga ku nimakapitulane ka vai ku takitulalakane kwini ki lalake, kwini lalasu la kela gelregelre tulrisi iniane, si kidremedreme ku arakai ku nagane ki tamaini pasi Zakaria iniane. 60Ai kwini tinaini amia kai, “Ini! Lri pasi Yuhanita.”

61Ku laretesane la iya kai iniane, “Kudra ki laretetesanesu yai, kadrwa ku sia nagane ku miyaiya kai ku nagane.” 62Kwini lalasu la papia ki tamaini pangwapakilriu ara alrima kivaga, lri pasi aneaneta kai ki lalake iya.

63Kai Zakaria la pamalra ku vaeva ku tapacapacasane ka baali, la pacase pibelenge iya kai, “Ku naganeini sia Yuhani.” La makitu kasamali makanaelre. 64Twalai kwini, kai Zakaria ala dulrunga kawriva, kai lasu la avavaga drengedrengere ki Twaumase. 65Ku lapasiagiagisi la kasamali turamuru. Kikai matiakiragai la mapelaelaela pasalraelre tali Yuda ki ngwalralregelrege; 66kudra kialalra ku laumawmase la makitu kidremedremedreme, “Kikai lalake lai lrika ngitwatumane ku takaumawmasaneini?” Asi lwiyane athingalane ka yakai ku puku ki Tamatama tapalra iniane.

Yugingi ki Zakaria

67Ku tama ki Yuhani ka Zakaria kiasuete ki Siri, la pelaelaela ku vaga ki Twaumase iya kai:

68Ala tadrengedrengere ki Tamatama ka Twaumase ki swa Iseraylri!

Siaraparapale ki laumawmaseini, si pangukerenganenga liniane.

69Patwalai ki daane ki Davidi ka sasiakawluini,

pasiakai mitane pacegecege ku tangea ka wadulru ki manemanenga ka Takipalribulribulane.

70Twalai kunadruma, pangwakainga ki layuginsia pelaela:

71Kwi lasu lri palribulu mitane pakidaili ki badhata,

lalri kalrabuthuta ku puku ki sanaka magirimurimucu mitane ka umawmase.

72Lri papia ki cucungulaneta baai ku kalithane,

si pulringalringau ku sanianiangenga ka samakaketeketane.

73-75Palraingi ki cucungulaneta ka Aberahame,

si kiketekete ku pacegecege ku samakaketeketane ku apalribulane mitane pakidaili ki badhata,

si kikai tapanianianiakaneta ikawmasane,

lri dulrungata masasigarangane icucubungu iniane,

arakai ku bulane si mulecegane pasikaikai iniane.

76Lalakeli,

lri kipakamanisu ku lrika yuginsia ki Abebeelengenga ka Twaumase.

Lrika amanisu ku aswalala kudra ki lrika Tamatama, pasikai iniane padulru ku kadalranane;

77lri pelaelasu ki mapapangaleini:

Ngwalai ku takipacepane ku pasalrivane lini,

kwini lalasu lri tarumara ku akipalribulane.

78Kai Twaumaseta mathalrai kasulrapele;

la alra kwidra thelare ki sapalribulane paledra mitane,

79la patwalai subelebelenge paledra

kwidra ki sanaka panianianiake itailebe ki alalingu ki apacadhane ka umawmase,

si arake naiane dadavace ikai ki masulivate ka kadalranane.

80La adiadili kadradrau kwini lalake, karakace ku kinawmasane si kidremedreme. La ikaikai ubulane kwini lasu, pakeela kudra takirimwaneini utaluvaivai adrelane ikai ki swa Iseraylri.

Currently Selected:

Luka 1: NDV

Highlight

Copy

Compare