Maruku 15

Yacucubungu ki Pilatu kisaibange

(Matai 27.1-2, 11-14; Luka 23.1-5; Yuhani 18.28-38)

1Sakakaiyane ngulalaakese, kwidra marudrange ki barakalai, si laciwru, latarabulrubulru ki Sisiu, si swa gikai makanaelre, la siracangane madrekadrekase, sakarathudunga ku apangimiane lini, ala malra kerenge ki Yesu si iluku baai ki Pilatu. 2Ku Pilatu la kivaga iniane, “Kusu yai talialalaisu ki swa Yuda?”

Ku Yesu la tubalre, “Kikai yai ngiamia ku taiyanesu.”

3Ku lamarudrange ki barakalai makaalra ku kukusu lini ki Yesu, 4lakamani ku peela ki Pilatu kivaga ki Yesu iya kai, “Drela, kai kukusu lini muswane kai makaalra ka pasalrivane, kaisu lri tubalre?”

5Ku Yesu laka sakamiya kai tubalre ku niakuvalanenga; la kasamali turamuru ku Pilatu.

Kiatupasalrivane ku akipapacadhane

(Matai 27.15-26; Luka 23.13-25; Yuhani 18.39–19.16)

6Sanaka tatulrisilrisiane ki Takilragavane ka lrisi, ku Pilatu tara singiakai ku kitubi ki mapapangale pulatadre ku tangea ku kiaemenge. 7La icengecenge ikai ku tangea ku sia Barabase, taelre kiemenge kudra ki wathurikici ki cekele si papacai ki umawmase. 8Sa irubu ku mapapangale, kiatubi ki Pilatu ku asingikaiyane ki kakwakudhane lu kipuawngane kikai, 9ku Pilatu la kivaga liniane, “Kunumi ani pulatadre kwini ki talialalai ki swa Yuda amia numi nakwane?” 10Ku patengatengane kai Pilatu wathingale, kwini lamarudrange ki barakalai ala ka ngwalai ki pathalrane lini, ala kamani ku iluku lini ki Yesu baai iniane.

11Ai ku lamarudrange ki barakalai patata ki mapapangale ku apulatadrane ki Barabase. 12Ku Pilatu la peelana kivagana ki mapapangale, “Kwini talialalai ki swa Yuda iya numi kwini umawmase, lri pangitumanaku?”

13Kwini lalasu la mariariange iya kai, “Pakedrekedra iniane pwa ki ziwzika!”

14Ku Pilatu la kivaga, “Manemane ku piaini ku ngialisiane?”

Kwini lalasu la aru riariangelringa, “Pakedrekedra iniane pwa ki ziwzika!”

15Ku Pilatu la ngwalai ku akikadalamane ki mapapangale, la pulatadre ki Barabase baai liniane, la drekase si lrumai ki Yesu, ala patarumara ki umawmase katwase kedrekedre pwa ki ziwzika.

Twasinalrelreme ki Yesu ku lakwapingi

(Matai 27.27-31; Yuhani 19.2-3)

16Ku lakwapingi la iluku ki Yesu mukalatadrane ki sutuke, la sarubu kwidra ki lakwapingi makanaelre. 17Kwini lalasu la pasilaimai ki Yesu ku thilalatadhane ka laimai, la arakai ku cecenekane ka angatu tutawpu si pasitawpu iniane, 18ala papia iniane sukubu si iya kai, “Talialalai ki swa Yuda banzai!” 19Kai lalasu la arakai ku uvai lrumai ki awlruini, si sungaluthu iniane, la pidruru sukubu iniane. 20Samaka tusinalrelremenga, la mwalra kwini thilalatadhane ka laimai, la sawlri pasilaimai ku laimaini, ala iluku iniane katwase pakedrekedre pwa ki ziwzika.

Ku Yesu kiapakedrekedre ikai ki ziwzika

(Matai 27.32-44; Luka 23.26-43; Yuhani 19.17-27)

21Sa ikadadalranane, kwini lalasu kiapadradresenge ku tangea ka umawmase, ka sia Simune, ka twalai tali lregelrege ka lri mupairange, kai lalasu la vuutha iniane mwa ubalrithi ki Yesu angeale ku ziwzika (kai Simune swa Kurini, ka tama ki Alikesangeda si Ruhu). 22Kai lalasu la mailuku ki Yesu mwa kudra ki sia Gulugutha, ku pacugane yai “Awlru ka lrelrelrege”. 23Ikai kwini, kwi lalasu la malra kudra bava ka nipaibwane ku sasulravane si pawngulu ki Yesu, ai kai mwabangalre ungulu ku Yesu. 24Lakamani kwini lalasu alra ki Yesu kedrekedre pibelenge ki ziwzika, la kuzibiki, mavalavala ku laimaini. 25Sakamialrealre ka bangate ki tuki, kai lalasu wakedrekedre ki Yesu piziwzika. 26Ku kitupasalrivaneini nipacasane, “Talialalai ki swa Yuda”. 27Yakai ku tadrusa ku sadre ku pinakisilangane ki Yesu pakedrekedre pikai ki ziwzika, ku tangea pia tali vanale, ku tangea pia tali viri iniane.#15.27 Yakai ku sidrumane ka hungu ku wadrima ki mwasaka 28 ka vaga “Ikai ki sidrumane ka nipacasane yakai ku taiyane kai ki Sisiu, ‘Kai lasu kiapataelre ki mapasaisalriu’, ku amia ku vaga ngiamianga.” (Drela ki Luka 22.37.)

29Ku ngwakai kwini lribate ku laumawmase twasinalrelreme ki Yesu, si veteevete ku awlru iya kai, “Henge, kusu ka nau buruku ku daane ki Twaumase, si lai maka tutulrulu tupela tudaane! 30Kaiasasane twaladha ki ziwzika mulebe, la ngipapalribulu!”

31Ku lamarudrange ki barakalai si latarabulrubulru ki Sisiu la mialri ulralrakai iniane, si makitu iya kai, “Kai lasu palribulu ki umawmase, la kai maka ngipapalribulu! 32Kirisitu, ka talialalai ki swa Iseraylri, kaiasasane mulebea twaladha ki ziwzika, lanai dredrele, si la nai kasalru!”

Kudra palraini kikedrekedre ku umawmase la mialri tusinalrelreme iniane.

Tapacadhane ki Yesu

(Matai 27.45-56; Luka 23.44-49; Yuhani 19.28-30)

33Saka mwalringedele, la kadradrimiti kai kawmasane, lri ikai ku ngwatulru ki tuki. 34Saka miawbu ki tulru ki tuki, ku Yesu la akwadrau karaleale, “Ilui, Ilui, lramasapaketani?” Kwini pacugane amia kai, “Twaumaseli, Twaumaseli, asu ciilri nakwane?”

35Kudra yathili acegecege ku laumawmase yakai ku kialalra, la iya kai, “Kilalalra, wadawdawlu ki Ilria!” 36La ikai ku tangea ku matwase mwa lailai, la malra ku nitaburane pwa ki maalriu ka bava ku pelrece si pakerenge pwa ki uvai, la puthili ki ngudui ki Yesu, si iya kai, “Dredrela, tadrele ki Ilria lulri pulebe iniane lutumane!”

37Ku Yesu la akwadrau karaleale ala nguniakane si pacai.

38Kudra nipakelradhane ikai ki daane ki Twaumase ku make, la twalai belenge mulebe kathurilace mawdrusa. 39Kwini acegecege icucubungu ki ziwzika ka abelenge ki kwapingi, la drele ku tangimiane ki Yesu sa karaleale#15.39 Yakai ku sidrumane ka hungu ku kadrwa kikai “karaleale” ka vaga. si pacai, la iya kai, “Kikai umawmase kai, patengatengane ka Lalake ki Twaumase!”

40La ikaiyana ku lalabaibai ku sadaaili dredredrele; ikai kwini yakai ku Magedaleni ka Malria, la ikai ku tina ki agiagi ka Yakubu si Yusepe ka Malria, si Salumi. 41Ku Yesu sa ikai Galrilri kai lalisu twapapalra iniane, si pasikaikai iniane. La ikaiyana ku takaalra ku lalabaibai ka twapapapalra ki Yesu karededele kainganai mu Yerusalrime.

Takidralrekane ki Yesu

(Matai 27.57-61; Luka 23.50-56; Yuhani 19.38-42)

42-43Sakadradrimidrimiti, wakela ku swa Arimatai ka Yusepe; kai lasu kiamusakene ki umawmase ka gingi, ka mwakalavalava ku autaluvaivadhane ku kuni ki Twaumase. Kwini saka tapadulrudulwane ka vai (amani kwidra aswala ki Taisadrasadrane ka vai). Ku Yusepe la pagagarangane katwase kikawriva ki Pilatu, si kitubi iniane ku amalrane ku kinawmasane ki Yesu si katheme. 44Ku Pilatu sa kilalra ala ka wapacainga ku Yesu, la kirimu kasamali. La dawlu kudra ki mabelenge ki kwapingi, si kivaga iniane luka maulainga#15.44 Yakai ku sidrumane ka hungu ku kadrwa kikai “maulainga” ka vaga. ku tapacadhane ki Yesu. 45Sakipelaelanga ki mabelenge ki kwapingi, ku Pilatu wabaai ki Yusepe ku kinawmasane ki Yesu. 46Ku Yusepe walangai ku lalasare ka kaimadhane, la malra pulebe ku kinawmasane ki Yesu, si lripucu ara lalasare ka kaimadhane, la pasutelrai pikai ki vaeva ka tinutadralredralrekane pikai ki alrisapesape, la balrutai ku vaeva ka lrenege, si celrepe ki lrawlrawdru ki tadralredralrekane. 47Ku Magedaleni ka Malria si tina ki Yusepe ka Malria yakai ki tapikaiyane pasutelrai ki Yesu drangalrungalru.

Currently Selected:

Maruku 15: NDV

Highlight

Copy

Compare