Maruku 12

Pathalrilriku patharukai ki manganga ka kiasalru ku umawma

(Matai 21.33-46; Luka 20.9-19)

1Ku Yesu la arakaainga ku pathalrilriku bulru liniane, si iya kai, “Yakai ku tangea ku umawmase ku twa umawma ku taluvale tubabudwane, la pangithalringulu ravadre, ikai babudwane adringi la lruku ku taluvaale ku tapepeane tubava, si tudaane ku vaeva ku tadrangalrungalrwane, ala pakisalru kwini babudwane ki tarakawaungu, si katwase mubabadhane kivavange. 2Sadarurunga ki kalakibudwane, la sikawlu ki tangea ka sasiakawlu pamwa kwini ki kiasalru ki umawma malra ku naika amalrane ku drulruini ku paisu. 3Kwini kiasalru ki umawma la alra ruthuku kwini ki sasiakawlu, si lrumai iniane, la pasiwlri papaliwnawnai iniane. 4Kwini piumawmane la sikawlunga ku tangea ka sasiakawlu pamwa, kwini lalasu la lrumai pakadula ki awlruini, si tusinalrelreme iniane. 5Kwini piumawmane la peelanga sikawlu ki tangea ka sasiakawluini mwa, kwini lalasu la papacai iniane. Kwini lalasu la tuthadaalrane piyana kudra tapangimiane lini kwini ki sanaka nisikawlane ka umawmase, yakai ku kialrumai, yakai ku kiapapacai. 6Kwini piumawmane laka kathaanenga ku kathalraini ka lalake ku asikawlaneini. Sakabibiilrilinga la sikawlu iniane pamwa kikawriva kwini ki tarakawaungu, lu kidremedreme amia kai, ‘Kwini lalasu lri tara musaakene ki lalakeli.’ 7Ai kwini tarakawaungu la madrekadrekase iya kai, ‘Kikai umawmase amani ku lri mucungulu ki tawki kikai umawma, bwala, tapapacai iniane, kikai lrika aucungulaneini lani ka mitaanenga!’ 8Kwini lalasu la ruthuku kwini ki lalake, si papacai iniane, la cilri kwini kinawmasane pulatadre ki babudwane.”

9Lakamani ku Yesu la kivaga, “Luka miyaiyakai, kwini tawki ki babudwane lai lri pangitumane? Kwini lasu lri tara keela papacai kilakikai latarakawaungu, si malra kwini babudwane pakisalru ki palrapalra. 10Kai numi sialrigwana kikai pinacasane ikai ki Sisiu?

Kwidra cilri ki taratudadaane ka lrenege,

amaaninga ku tinukuciacingaalranenga ka karwalai.

11Kikai yai pia ki Tamatama,

ka matiasamalilringa lu dreleta!”

12Asi lwiyane kwini lataramasasangililuku ki swa Yuda wathingale ku matikai ki Yesu kwini pathalrilriku aka sakaelaelane liniane, la kisanu pwalra iniane. Ai kwini lalasu mwakuludru ki mapapangale, lakamani ku katwasenga lini kidaili iniane.

Patharukai ki wakazilu baai ki tinuhika ki swa Ruma

(Matai 22.15-22; Luka 20.19-26)

13Yakai ku la swa Palrisai si la swa Hiruditu ka kiasikawlu kela kikawriva ki Yesu, pakai ku lrika apatwaladhane ki vagaini si malra ku atakaiyane tulilisi iniane. 14Kwini lalasu la iya kai iniane, “Sinsi, wathingale nai amanisu ku twakapatengatengane ka umawmase; kaisu wathengete ku takidremedremane ki umawmase, kaisu wadrele ku takaumawmasaneini, tara pangiamiasu ku vaga ki Twaumase si bulru ki umawmase. Ala pelaela naiane, lu kazilwane baai ki tinuhika ki swa Ruma kaika wabaebalrenga ki hulriceta? Lri kazilu nai? Kai nai lri kazilu?”

15Ku Yesu wathingale kwini salrilrigilane lini, la tubalre, “Anu kisanu tulisiliisi nakwane? Malra ku vaeva ku ginka padrele nakwane!”

16Kwini lalasu la baai iniane ku vaeva ka ginka, ku Yesu la kivaga, “Kikai belenge kai nituumawmasane si kai nagane aneanane?”

Kwini lalasu la tubalre, “Tinuhika ki swa Rumane” iya.

17Ku Yesu la kawriva, “Luka miyaiyakai, ku lamanemane ki tinuhika ki swa Ruma abaadhane ki tinuhika, ku lamanemane ki Twaumase baadha ki Twaumase.”

Kwini lalasu sa kilalra kikai lavaga, la kasamali turamuru iniane.

Patharukai ki Siaelane

(Matai 22.23-33; Luka 20.27-40)

18Yakai kwidra la kai kiapawtenga ku patharukai ki siaelane ka la swa Sadukise ka umawmase wakela kikawriva ki Yesu. 19Kwini lalasu amia kai, “Sinsi, ku Musi pasiakai naiane pacase, ‘Alaiyasi ikai ku tangea ku wapacai, laka kadrwa ku lalake, ku agini lri tara maalra sitaelrelre kwini ki sakapacai ka sakadaneini, pakai ku aikaiyane ku lri ucungulu ki takaini.’ 20Kunadruma yakai ku tapitu ku lamatakataka ka lasawvalai, ku takataakanga la karudrange, si pacai, laka kadrwa ku lalake; 21kudra mwasakadrusa la sitaelrelre kwini ki walibakane ka sakadane, la mialri pacai, si kadrwa ku suru ku lalake; ku mwasakatulru laka miyaiya. 22Kwini tapitu ka lamatakataka la sitaelrelrenga makanaelre kwini ki alisu, la makitu pacai makanaelre, la kakadrwa ku suru lini ku lalake makanaelre. Sakabilrilanenga kwini alisu la mialri pacai. 23Lukamiyaiya kikai, ikai ki tasielane ka vai, kwini lalasu lu twalainga ki wapacai sielane, kikai ababai lrika taelrelre ki aneane? Asi lwiyane, kikai tapitu ka lamatakataka marudrangenga mwa iniane makanaelre.”

24Ku Yesu la tubalre liniane, “Pasalriu numi, asi lwiyane? Kai numi pwalringalringau ki Sisiu, la kai numi thingale ku puku ki Twaumase. 25Kwini lalasu lu twalainga ki wapacai si siela panianiake, lri mianga ki sasiakawlu belenge, kai lri karudrangenga kai lri kitharevenga. 26Pangukai ki wapacai si siaelane panianiake, kai numi sialrigwana ku tapacasane ki Musi pangukai kudra kwadaladalai ka cecenekane ka angatu? Ku Twaumase amia kai ki Musi, ‘Amaniaku ku Twaumase ki Aberahame, Twaumase ki Isake, Twaumase ki Yakubu.’ 27Kwini pacugane amia kai, ku Twaumase yai Twaumase ki panianianiake ka umawmase, kaika Twaumase ki wapacai. Kunumi pasalriu numi!”

Madraadrawnga ka padradrekase

(Matai 22.34-40; Luka 10.25-28)

28Yakai ku tangeea ku tarabulrubulru ki Sisiu ku kialalra ku tamadrikidrikidrikisane lini, lu kidremedreme la kathariri ku tatubalreane ki Yesu ki swa Sadukise, la kainganai si kivaga ki Yesu ku taingeane ku mundai, “Ikai ki padradrekase laka mwasakapia ku tinukuciacingaalranenga?”

29Ku Yesu la tubalre, “Ku aswalaalanga yai, ‘Swa Iseraylri, kilalra! Ku Tamatama ka Twaumaseta kathane ka Tamatama. 30Arakaiya patueelre ku takidremedremanesu, ku kaikalithanesu, ku lrigilanesu si pukusu, kilibake ki Tamatama ka Twaumasesu.’ 31Ku mwasakadrusa, ‘Kilibaka ki pasiagisisu, mia lu ngikakilibakesu.’ Kadrwanga ku padradrekase ku makuciacingalre kilakikai.”

32Kwini tarabulrubulru ki Sisiu amia kai ki Yesu, “Sinsi, kwi taiyanesu pacengecengesu! Ngiamia kwi taiyanesu, kathaneini ka Twaumase, kadrwa ku drumane ku Twaumase. 33Kai umawmase lri arakai patueelre ku takidremedremane, ku kaikalithane si ku puku kilibake ki Twaumase, la kilibake ki pasiagiagisi mia lu ngikakilibake. Kikai makuciacingalre kwidra ki yabelenge ki tapatarumaramarane ka Lama ka lrisi si drumane ka sapatarumarane baai ki Twaumase.”

34Ku Yesu wadrele ku tatubalreaneini ka swaete ku lrigilane, la iya kai iniane, “Kaisu wadailinga ki kuni ki Twaumase.”

Twalainga kikai, kadrwanga ku umawmase ku maka wathuru peela kivaga ki Yesu.

Patharukai ki Kirisitu

(Matai 22.41-46; Luka 20.41-44)

35Ku Yesu sa ikai ki daane ki Twaumase bulrubulru ki umawmase la kivaga ku taingeane: “Kai tarabulrubulru ki Sisiu ani dulru iya kai, ku Kirisitu mwabaibalrithi ki Davidi iya? 36Ku Davidi nakiakandu ki Siri si iya kai:

Ku Tamatama amia kai ki Tamatamali:

Nenea ikai ki vanaleli,

la ukalavalava ku lrika apamalebeaneli ki badhasu pikai ki tailebeane ki drapalesu.

37Ku Davidi twa ‘Tamatama’ iniane, ku Kirisitu anika mwabaibalrithi ki Davidi?”

Dradreela telenge ki tarabulrubulru ki Sisiu

(Matai 23.1-36; Luka 20.45-47)

Ku mapapangale madalame kilalra ku bulrubulru ki Yesu. 38Sa bulrubulru liniane ki kwidra, amia kai, “Kipapawlringava telenge ki tarabulrubulru ki Sisiu; kwini lalasu madalame silaimai ku walrapeapele ku laimai si pasiavavava ikai kadalranane cekele, la kadaalame ku akisukubane ki umawmase ikai rarubwane ki swa Yuda, 39la murikai ki rarubwane ki swa Yuda ki swa Yuda ku mwakalrivili ka taetalane, si nikiwsaesakenanenga ku taetalane ki tangiakanekaneanane. 40Kwi lalasu la ravase ku tacekecekelane ki walibakane ka ababai, la pasiavava tuelrelrelrenge inulri. Kwi lalasu lri tara tarumaara ku matiangeange ku sapathavungane!”

Patarumara ki walibakane ka ababai

(Luka 21.1-4)

41Ku Yesu la nene ikai balrealreanane ki tapatarumaramarane ki daane ki Twaumase, dredredrele ki laumawmase lutumane pwadringi ki tapatarumaramarane ka langiane ku paisu. La takaalra ku lasapaiswane ku umawmase ku pwadringi ku paisu; 42sakabilrilanenga la kela ku tangea ku matiakuru ka walibakane ka ababai, la pwadringi ku drusa ka tangupia, lri ikai kau bababa ka paisu. 43Ku Yesu la dawlu ki lasituini makanaelre, la iya kai liniane, “Nau pudriadriingai pelaela numiane, kikai matiakukuru ka walibakane ka ababai ku pwadringini ki tapatarumaramarane ka langiane makakalra turaamuru ki drumane ka laumawmase. 44Kai palrapalra patwalai ki tedratedrane ki tacekecekelane lini si patarumara; ai kai alisu sakwa matikuruunga turamuru, la maalrana patuelre ku sangilalapwaneini pakaelre baai patarumara.”

Currently Selected:

Maruku 12: NDV

Highlight

Copy

Compare