Maruku 11
11
Masasialrigu mudaane Yerusalrime
(Matai 21.1-11; Luka 19.28-40; Yuhani 12.12-19)
1Ku Yesu si lasituini sa katwase si padeethenga Yerusalrime, si darurunga Ulrive ka lregelrege ki Bithepagi si Bithani ka cekele. Ku Yesu la sikawlu ki tadrusa ka situ katwase aswalaala, 2la pelaela liniane iya kai, “Lu katwasa mwa kavai cucubungu ka cekele. Sana mucekele numi, lri dreele numi ku vaeva ku lrulai ka ruba ka kaina kiangurigi ka nipakerengane ikai kwini. Kunumi malranga mukerenge iniane, si iluku mwa kikai. 3Alaiyasi ikai ku kiavaga numiane, ‘Anu piya kikai iya?’ Kunumi pelaelaanga iniane iya kai, ‘Lri arakai iniane ku Tamatama#11.3 “ku Tamatama” ku wahunyake madu iya kai “tawkini”., lri padaalru lai sawlri satedre kai ki lrulai ka ruba.’ ”
4Kwini lalasu samwanga, la drele ku yathili kadadalranane ka nipakerengane ku vaeva ka lrulai ka ruba ikai latadre. Kwi lalasu saicengecenge mukerekerenge kwini ki calrisi, 5kudra la acegecege ikai kwini ku umawmase la kivaga liniane, “Anu mukerekerenge kwini ki lrulai ka ruba?”
6Kwini lalasu la singikai ku tapelaelane ki Yesu tubalre, kwini laumawmase la palraingi liniane pailuku kwini ki lrulai ka ruba. 7Kwi lalasu la iluku kwini ki lrulai ka ruba mwa ki Yesu, la malra ku laimai lini si sapa pikai ki drelreke ki ruba, ku Yesu ala mubelenge. 8Yakai ku tapangale ku laumawmase ku arakai ku laimai lini sapa pikadadalranane, la ikai ku laumawmase ku wamalra pasingi ubulane calrigi ku laricingi ki angatu si sapa pikadadalranane. 9Ku aswalalala ku mabibibilrili ku laumawmase la tawtawtau iya kai, “Drengedrengera ki Twaumase! Ku Twaumase ani baai ku akaesadhane kwidra ki wakela pangukai ki nagane ki Tamatama! 10Ku Twaumase ani baai ku akaesadhane kwidra ki lri kela mwa ki kuni ki cucungulaneta ka Davidi! Ku sadrengedrengerane ku akilrigwane ani papia ki Abebeelengenga ka Twaumase!”
11Ku Yesu sadarurunga Yerusalrime, la katwase mwa ki daane ki Twaumase, si dredrele palraelre. Sakadradrimitinga, la katwase taruelre ki ta 12 ka situini si katwase kwini ki cekele mwa ka Bithani.
Wapusu ki Icizike ka angatu
(Matai 21.18-19)
12Sakakaiyane, kwi lalasu la twalai Bithani siwlri mucekele; sa ikai kadadalranane, la kasilrawnga ku Yesu. 13La drele cucubungu yadethe ku vaeva ka icizike ka angatu, la karibecele ku vasau, la katwase mwa, nau murimadru iya. Sa mwanga mucucubungu, laka kathane ku vasau, asi lwiyane kaika kalapumadrwane ki icizike. 14Ku Yesu la cucubungu kwini ki angatu kawriva iya kai, “Twalai kaikameane, lri kadrwanga ku umawmase ku wakane ku madrusu!”
Ku lasituini la makitu kilalra kwini taiyaneini.
Ku Yesu wabula ku daane ki Twaumase
(Matai 21.12-17; Luka 19.45-48; Yuhani 2.13-22)
15Kwini lalasu sakelanga Yerusalrime, ku Yesu sa udaane ki daane ki Twaumase, la pakatwase kwidra ki wasiwbawbai ikai ki daane ki Twaumase ka laumawmase. La kadrulu ku cukui ki takibalribalrithane ki paisu si taetale ki tarakilangalangai ku tavagu, 16la kai palraingi anika aneaneanenga, ku siamece ku lamanemane si masasawlri ikai kwini ki kalatadrane ki daane ki Twaumase. 17La bulru liniane iya kai, “Ikai ki Sisiu wapacase ku vaga ki Twaumase iya kai, ‘Kai daaneli lrika tainulrinulriane ki sanaka umawmase’, kunumi la maalralringa numi tudaane ki saadre!”
18Ku marudrange ki barakalai si tarabulrubulru ki Sisiu sakilalra kwini vaga, la kidremedreme ku apapacadhane ki Yesu. Ai mwakuludru iniane, asi lwiyane ku lamapapangale wadrengedrengere iniane ku tabulrwaneini.
19Sakamiauawbunga, ku Yesu si lasituini la katwase mulatadre ki cekele.
Patwalai ki icizike ka angatu tarumara ku sabulrwane
(Matai 21.20-22)
20Sakakaiyane ki mialrealre, ku Yesu si situini la ngukainga kwini lribate, la drele kwidra ki icizike ka angatu la patala baalace kavulru pacai. 21Ku Pitiru la ngulringau ku tangilribatane kikai kwidra, la kawriva ki Yesu iya kai, “Sinsi, drela, kikai pususu ka icizike ka angatu mavulru si pacainga.”
22Ku Yesu la tubalre liniane, “Pikaiya ku salrwane ki Twaumase! 23Nau pudriadriingai pelaela numiane, alaiyasi iya numi kai ki lregelrege, ‘Ngidrakala, la katwase mwa ki laveke!’ sana kai kalrikilriki ku kidremedreme, si kasalru lri tara ngimia iya ku taiyane, kikai lri pasikai numiane si ngimiya. 24Lakamani, nau pelaela numiane, lu inulri numi, adravane kitubi numi ku manemanenga, si kipawtenga lri tara malra iya, lri dulru numi tarumara ku kitubi numi. 25Lu idi numi inulrinulri kwidra, paswalana pacepe ku tapasalrivane numiane ki umawmase; lumia kikai, ku Tama numi ka yasubelebelenge lri mialri pacepe ku tapasalrivane numi.”#11.25 Yakai ku sidrumane ka hungu ku wadrima ki mwasaka 26 ka vaga “Lu kai numi pacepe ki umawmase, ku Twaumase ka yabelenge lri kai pacepe ki tapasalrivane numi.” (Drela ki Matai 6.15.)
Kiavaga ku puku ki Yesu
(Matai 21.23-27; Luka 20.1-8)
27Kwini lalasu la kelanga mu Yerusalrime. Ku Yesu sa ikai ki daane ki Twaumase dadadavace kwidra, ku marudrange ki labarakalai, si latarabulrubulru ki Sisiu, si lamarudrange ki cekele la kainganai kikawriva iniane, 28la kivaga iniane, “Kusu yai satalusu ki manemane ka puku si pia kilakikai? Aneane ku wabaai muswane ku puku pia kilakikai?”
29Ku Yesu la tubalre, “Nau paswalana kivaga numiane ku niakuvaalane, alaiyasi tubalre numi nakwane, lri pelaelaku numiane luka satalwaku ki manemane ka puku pia kilakikai. 30Pelaelaili, ku sapabanavane ki Yuhani ku puku yai twalai inu? Twalai ki Twaumase twalai ki umawmase?”
31Kwini lalasu la pathagilinga makitu madrikidrikisi ku vaga, si iya kai, “Lri tumanaiyata tubalre? Alaiyasi iyata kai, ‘Twalai ki Twaumase’ iya, lri iya kai, ‘Ala kikai, lanu kai kipawtenga ki Yuhani?’ 32Ai, lri dulruta ‘Twalai ki umawmase’ iya?” Kwi lalasu mwakuludru ki mapapangale lu lri kiecebe liniane, asi lwiyane kikwini mapapangale makitwa kasalru ki Yuhani ka yuginsia. 33Ala kamani ku tubalre lini ki Yesu iya kai, “Kai nai wathingale.”
Ku Yesu la iya kai liniane, “Lukamiyaiya kai, lri kainaku pelaela numiane luka satalwaku ki puku ki manemane pia kilakikai.”
Currently Selected:
Maruku 11: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
