Maruku 13

Pakanaswala pelaela ku akamudane ku daane ki Twaumase

(Matai 24.1-2; Luka 21.5-6)

1Sa twalai ki daane ki Twaumase mulatadre ku Yesu, ku tangea ku situini amia kai iniane, “Sinsi, drela, kikai adravane kai lrenege, ala matisamaliane turamuru kai tatudaanane!”

2Ku Yesu la iya kai, “Kunumi siavava numi kikai lamatiasamali ka tatudaanane? Kai lalrenege kikai lri kiburuku patuelre, kadrwa ku navaevanga ku lrenege ku lrika sakamiyana ka raedrane.”

Amatikurwane si hakegai

(Matai 24.3-14; Luka 21.7-19)

3Ku Yesu yakai lregelrege Ulrive, si nene papucucubungu ki daane ki Twaumase. Ku Pitiru, Yakubu, Yuhani si Anederiu la kibubuli kivaga iniane, 4“Ala pelaela naiane, lri ngimia lwigane kilakikai? Kikai patuelre lu lri ngimianga lri ikai ku manemane ku sasakaladhane?”

5Ku Yesu la pelaela liniane iya kai, “Kunumi dradreela, madha kilrilrilrigili ki umawmase. 6Lri takaalra ku umawmase ku lri draedrangelre sinagane ku naganeli, si iya kai, ‘Amaniaku ku Kirisitu’ iya, lai ngwalai kwini si pamamama ki takaalra ku umawmase. 7Madha ngwalalai ku kilalra numi ku makarururuburu ku adeethe si adaaili si kathathiburu. Kilakikai yai lri tara ka angimiane; ai kikai kaika sapelaelane ka wadarurunga kudra alikaiyane ku vai. 8Ku taingeane ka minzuku lri makakaruburu ki maelane ka minzuku; ku taingeane ka kuni lai lri kikaruburu ki maelane ka kuni; ikai kidruanga lai lri ikai ku lingilingi si silravane. Kilakikai ku angimiane lri mararaamau lu pathagili kiangeange ki atulalakane ki tawbaliri.

9“Kunumi dradreela, asi lwiyane ku palrapalra ku lri pwalra numiane, si baai putasaibaibangane; lalri ikai numi ki rarubwane ki swa Yuda kilrumai. Ngwalai nakwane, lri acegecege numi icucubungu ki tararathudu si talialalai, pasikai ki hukuingi akasi. 10Ai kai hukuingi lri tara paswalana pelaela padaruru ki sanaka umawmase. 11Lu pwalra numiane kwini lalasu, si iluku numiane putasaibaibangane yai, madha paswalala kidredredreme kakalikalithi ku aiyane ku vaga, lu utakelanenga kamani kwidra, ku tapelaelane ki Twaumase ku manemane, kunumi avavaga ku manemane; asi lwiyane ku avavaga numi kaika vaga numi, Siri ka pangwakai numiane avavaga. 12Lukamaninga kwidra, ku umawmase lri kilangai ki betakane, si palraingi papacai liniane, ku tama lai lri mialri pia kai ki lalalake; ku lalalake lri kiecebe ki marudrawdrange, si palraingi papacai liniane. 13La lri ngwalai nakwane, ku laumawmase lri kalisi numiane. Ai kudra maka kiadili patulrepenge ku umawmase lri tara kipalribulu.”

Maadrau ka amatikurwane

(Matai 24.15-18; Luka 21.20-24)

14“Lri drele numi kudra ‘Matiavalracevace ka lri pakamudu ka lamanemane’ acegecege ikai ki nai kaika aikaiyaneini acegecege” (ku sialrigu tara pulringava ku pacugane kikai ki vaga). Lukamaninga kwidra, ku yakai Yuda, nai mubere kilepenge mulregelrege; 15ku yakai cavalri, madha mulebelebe, la madha mudadaane malra sanaka manemanenga; 16ku yakai umawma, la mialri madha mubalribalriu malra ku sapakabelengane ku laimai. 17Ki kwini lavai, ku tawbaliri si pathuthuthwana ki lrulai ka tina lri kwalri! 18Kunumi kitubia ki Twaumase ku kaika angimiane kilakikai ikai ki kalakecelrane. 19Asi lwiyane kwini la amatikurwane ka vai yai twalai ku tabekacane kawmasane ki Twaumase pakeela kaikameane kadrwana ku miyaiya, lubibilrili lai kai lri ikainga. 20Alaiyasi ku Tamatama la aru tuedrekane kwini ki amatikurwane ka lavai, kadrwa ku umawmase ku lri dulru panianiake. Ai, lri ngwalai kudra ki nipilriane ka lakawkawluini, kwi lasu twaedrekanenga kwini lavai.

21“Alaiyasi ikai ku umawmase ku amia kai numiane, ‘Drela, kai Kirisitu yakai kikai! Kai Kirisitu yakai kavai!’ Madha kipawtengatenga iniane. 22Asi lwiyane kudra kaika patengane ka Kirisitu si kaika patengane ka yuginsia lri mutaluvaivai; kwini lalasu lai lri pia ku matiasamali ka awngane, si pakaelre ku dulru lini lrilrigili ki nipilriane ki Twaumase ka lakawkawlu. 23Kunumi dradreela! Paswalanga naku pelaela numiane patueelre ku lrika angimiane kilakikai.”

Akelane kwidra ki Lalake ki Umawmase

(Matai 24.29-31; Luka 21.25-28)

24“Kwini la amatikurwane ka lavai lu ngilribatenga kwidra, ku vai lri kadradrimiti, ku dramare lai kai ledranga, 25ku tariau lri twalai belenge mucilri, kai subelebelenge ku tangidarepane lai lri ngivelevele. 26Lu kelanga ku vai, ku Lalake ki Umawmase lri adrelane, si kisuete ku puku si lrigu lalri ngukai ki ememe mulebe. 27Kwini lasu lri sikawlu ki sasiakawlu belenge pamwa sanaka ininunga, lri patwalai ki talrawane kai kawmasane pakela ki talriwgane kai kawmasane, si sarubu ku pilrini ka laumawmase.”

Sabulrwane patwalai ki icizike ka angatu

(Matai 24.32-35; Luka 21.29-33)

28“Kunumi patwaladha ki icizike ka angatu kibulru ku sabulrwane. Lu rigarigi si puvasawnga ku ricingi, wathingale numi ala ka padethenga ki kaladralrangedrangane. 29Laka thadaalrane, lu drele numi kikai tangimiyaiyane patuelre lri thingale numi ala ka lri kelanga ku vai#13.29 “lri kelanga ku vai” ku wahunyake madu iya kai “kwini lasu lri kelanga”., yakainga ki lrawlrawdru. 30Kunumi pulringalringava, kai zidai kai ku laumawmase lu kaiyana pacai makanaelre, lri ngimia kikai patueelre. 31Kai subelebelenge kai kawmasane lri kamudu kawlrau, ai kai vagali kai lri kamudu palralrawthu.”

Kudra vai kudra zikange kadrwa ku umawmase ku wathingale

(Matai 24.36-44)

32“Ala kudra akelane ki vai si zikange, kadrwa ku umawmase ku wathingale; adravane ku sasiakawlu belenge kai wathingale, kai Lalake la mialri kai thingale, kathane ku Tama ka wathingale. 33Kunumi kipapawlringava, si kasimeameace, asi lwiyane kai numi wathingale kudra lu lrika amani lwigane ku akelane ku zikange. 34La mia kudra ki tangea ka umawmase ku lri mubabadhane, la baai sudralru ki lasasiakawlu ku tacekecekelane, la pavavala ki tangangea ku awngane, la pelaela ki tarakadrenge ki lrawlrawdru ku adradrelane ki lrawlrawdru. 35Lakamani kwidra, kunumi kasimeameaca kipapawlringalringau, asi lwiyane kainu wathingale lukamani ki inu ku zikange ku akelane ki tawki, alau miawaubu, alau kabiceacelrake, alau kaiyana ka malialiare, alau maka walrawnga. 36Alaiyasi pangitutuluku kela, ani kai drele lu apeceana numi. 37Kikai taiyaneli kawriva numiane la ka mialri ka taiyaneli ki laumawmase: Kunumi kipapawlringava!”

Currently Selected:

Maruku 13: NDV

Highlight

Copy

Compare