Matai 28

Siaela panianiake ku Yesu

(Maruku 16.1-10; Luka 24.1-12; Yuhani 20.1-10)

1Sangilribatenga ku Taisadrasadrane ka vai, sakalialiare ki niciwbi, ku Magedaleni ka Malria si tangea ka Malria maredele mwa drele ki tadralredralrekane. 2Ala kirimu pangicaeme lingilingi, ku sasiakawlu belenge ki Tamatama twalai ka belenge mulebe, la malra balrutai kwini ki lrenege, si nene ikai belenge. 3Ku lringawini mia ki lrikace, ku laimaini la mia ki pasabu ku bulane. 4Ku la wakadrekadrenge la ngituluku turamuru si manugiligili, mianga ki wapaacai.

5Kwini sasiakawlu belenge la papia kwini ki labaibai iya kai, “Madha mukulukuludru! Wathingalaku numiane ka wasilasilape numi kudra kiakedrekedre piziwzika ka Yesu. 6Kwini lasu kai yakainga kai! Singiakai ku taiyaneini, kwi lasu siaelanga panianiake. Bwala drela kai natapikaiyane iniane. 7Kunumi lu kirimua katwase mwa pelaela ki lasituini iya kai, ‘Kwi lasu siaelanga panianiake, lri aswala numiane daruru mwa ka Galrilri; ikai kwini, lri drele numi iniane!’ Pulringaava kai taiyaneli numiane kikai la vaga.”

8Kwini lamaliali la kirarimu katwase kwini ki tadralredralrekane, masamali la kiragai turamuru, la katwase lailai pelaela ki lasituini.

9Ala kirimu, ku Yesu adrelane ikadalranane, si iya kai liniane, “Anu kasulivaliivate!” Kwini lalisu la arwacucubungu, si kebere ki drapaleini la sukubu iniane. 10Ku Yesu la iya kai liniane, “Madha kakiwcu, lu pelaela ki laretesaneli, si mwa ka Galrilri iya liniane; ikai kwini, lri drele nakwane.”

Tapelaelane ki wakadrenge

11Sakatwatwaseana ikadalranane kwini lamaliali, kudra wakadrekadrenge ku kwapingi yakai kudra la matwase siwlri mucekele, si pelaela ki marudrange ki barakalai ku tangimiane patueelre. 12Ku marudrange ki barakalai si laciwru samapelaelanga, la malra ku makaalra ku paisu si baai ki lakwapingi. 13La iya kai liniane, “Iyanga kai, sakamaungu wakela ku lasitu ki Yesu, la malra kupa si iluku ku kinawmasaneini saicengecenge nai kasipelrenge iyanga. 14Alaiyasi thingalenga kikai ku sutuke, nai kamaninga ka kawariva, lri kai numi katumane lutuumane.”

15Ku lakwapingi la tarumara kwini paisu, si pia singikai ku taiyane lini. Kikai nipasaravane kai vaga kai pakeelanga kaikameane matiakaikaiyana ikai ki swa Yuda.

Ku Yesu swadralru ku laawngane

(Maruku 16.14-18; Luka 24.36-49; Yuhani 20.19-23; Nisikawlane 1.6-8)

16Ku ta 11 ka situ sakelanga Galrilri, sa mwanga ku tapelaelane ki Yesu mwa kwini iya kudra ki lregelrege. 17Kwini lalasu sadrele ki Yesu, la papia iniane sukubu; ai yakaiyana ku umawmase ku malrilrilrikiana. 18Ku Yesu la dadavace arwadethe liniane, si iya kai liniane, “Ku Twaumase wamalra ku puku kai belenge si kawmasane si baainga nakwane patueelre. 19Lakamani, kunumi lu mwa katwase, si paasitu nakwane ki sanaka kuni sanaka umawmase, si pangukai ku nagane ki Tama, ki Lalake, ki Siri pabanau liniane, 20si bulru liniane ku apaluludane ku baaili numiane sanaka padradrekaseli. Pulringava! Lrika tatapalraaneli numiane, pakeela ku talikaiyane kai kawmasane.”

Currently Selected:

Matai 28: NDV

Highlight

Copy

Compare