Maruku 1

Tadindwane ki tarapabanau ka Yuhani

(Matai 3.1-12; Luka 3.1-18; Yuhani 1.19-28)

1Yesu Kirisitu ka Lalake ki Twaumase#1.1 Yakai ku sidrumane ka hungu kadrwa kikai “ka Lalake ki Twaumase” ka vaga., ku hukuingini ku sapelaelane sapalribulane miyaiya kikai. 2Ku yuginsia ka Isaiya wapacase pikai ki hunguini iya kai:

Ku Twaumase kawariva:

Drela, lri sikawlaku ki sasiakawluli;

lri aswalaala muswane si sudalradalrane ku kadalrananesu.

3Ikai ubulane yakai ku watawtawtau ku umawmase:

Padulrwa ku kadalranane ki Tamatama,

la pudriadringai dringelrese ku angukaiyaneini!

4Ku Yuhani la utaluvaivai ikai calragulragu, pabanabanau ki laumawmase, si pelaelaela#1.4 “Ku Yuhani la utaluvaivai ikai calragulragu, pabanabanau ki laumawmase, si pelaelaela” yakai ku sidrumane ka hungu ku amia kai “Ku tarapabanau ka Yuhani la utaluvaivai ikai calragulragu, si pelaelaela”., “Kunumi ngitatupela, si tarumara kipabanau, ku Twaumase lri pacepe ki pasalrivane numi.” 5Ku laumawmase la twalai kidruanga Yuda si Yerusalrime kela mwa ki Yuhani. Kwi lalasu makitu ngipapelaela ku pasalrivane lini; ku Yuhani la ikai kadravane Yuredange pabanabanau liniane.

6Ku Yuhani la siebele ku ubawbalane ku lrangici ki lrakeda, ku takilrisaisane la silakete ku lrangici; la kanekane ku apapawku si valu. 7Kai lasu peaelaela, “Kwini bibibilrili nakwane kela sanianiange nakwane turamuru, adravane lu pidruraku si mukece iniane kadrwa ku tasudalepaneli. 8Arakaiyaku kai acilai pabanau numiane, ai kwini lasu lri arakai ku Siri pabanau numiane.”

Takipabanavane si takikituthiathingalane ki Yesu

(Matai 3.13–4.11; Luka 3.21-22; 4.1-13)

9La kai tarathainu, la kela ku Yesu twalai Galrilri ka Nazarethe, ku Yuhani la ikai kwini kadravane Yuredange pabanau iniane. 10Ku Yesu sa twalai ki aciacilai ki takipabanavane, la drele sa nguelebane ka subelebelenge, ku Siri la mia ki tavagu mulebe makakai ki kinawmasaneini. 11La twalai belenge ku lingau pulebe iya kai, “Amanisu ku kathalraili ka Lalakeli, madalamaku muswane.”

12Ku Siri la makakaai pakisamula ki Yesu mwa ubulane. 13La ikai kwini maka masupatele ku vai, si kikituthiathingale ki Satange; la taelre ki lawaudriwdripi, ai yakai ku sasiakawlu belenge marasikai iniane.

Wadawlu ki tasupate ka taratukakange ku Yesu

(Matai 4.12-22; Luka 4.14-15; 5.1-11)

14Ku Yuhani sa kiemenge ikai takiememenganenga, ku Yesu la mwa Galrilri, pelaelaela ku hukuingi ki Twaumase. 15La iya kai, “Mwatakelanenga ku vai, lri padalrunga si kela ku kuni ki Twaumase! Kunumi ngitatupela, si kipawtenga ki hukuingi.”

16Ku Yesu la dadadavace tarababiabiabila ki baiyu Galrilri, la drele ku tadrusa ka taratukakange ka Simune si agini ka Anederiu yacengecenge ikai ki baiyu ararai tukakange. 17Ku Yesu la iya kai liniane, “Bwala tupapalraili! Lanu kamaninga ku taratukakange ki umawmase.” 18Kwi lalasu la makakaai cilri ku arai lini, si katwase tupapalranga ki Yesu.

19La katwase kai mukuthainwane ku tadadavacane ki Yesu, la drele ku lalalake ki Zibidi ka Yakubu si agini ka Yuhani, kwi lalasu yabelenge ki varukuru pudriadriadringai ku arai. 20Ku Yesu sadawlu liniane, kwi lalasu la surunga ki tama lini si kudra mwalrawlrawlrau liniane pibelenge ki varukuru, si tupapalranga ki Yesu.

Tangea ka kiaikai ki Aidridringane

(Luka 4.31-37)

21Kwini lalasu la kela cekele Kaperenawme; sa daruru ki Taisadrasadrane ka vai, la mwa rarubwane ki swa Yuda si bulru ki laumawmase. 22Ku kialalra ku tabulrwane ki Yesu ku laumawmase makitwa kasamali turamuru, asi lwiyane ku tabulrwaneini mailuku ku puku, makakaela ki latarabulrubulru ki Sisiu.

23Kikai kwidra, ikai ki rarubwane ki swa Yuda yakai ku tangeea ku kiaikai ki aidridringane ku umawmase, kwi lasu la karaleale iya kai, 24“Swa Nazarethe ka Yesu, asu keela vangavangavange naiane? Wakelasu amudu naiane? Wathingalaku ala ka aneanesu; amanisu ku sanianiyangenga ka sasiakawlu ki Twaumase!”

25Ku Yesu la drekase ki aidridringane, “Icelreba, twaladha kai ki kinawmasane ki lasu katwase!”

26Kwini aidridringane la pakilringau paamama kwini ki lasu, la karaleale akwadrau, ala katwasenga kwini ki lasu. 27La makitu kasamali turamuru, si matetetenge iya kai, “Kikai aningimia kikai? Kaika kilalrananata kaika dreleananata ku ngimiyaiya kai! Kwi lasu kirimu ikai ku kingidri dulru drekase kwini ki aidridringane, si kilaalra iniane kwini aidridringane!”

28Lakamani, ku nagane ki Yesu la padaalru si kimapelaela salraelre ki ngwakakai ki swa tali Galrilri.

Wasulrau pawdringai ki lamacaeme ku Yesu

(Matai 8.14-17; Luka 4.38-41)

29Kwini lalasu sa katwasenga rarubwane ki swa Yuda, la mwa ki tai Simune si Anederiu ki daane lini; ku Yakubu si Yuhani la karedele mwa. 30Ku tina ki labaibai ki Simune la icengecenge kacaeme ki culwane, si apece itapeapecane; sakela ku Yesu, kwidra wacekecekeleini la pelaela ki Yesu ku tangimiane kwini caemaneini. 31Ku Yesu la mwa drele kwini ki alisu, la taalrima iniane, si drakale iniane. Kwini culwane ki alisu la ngwalrane, si ngidrakale si pasudalru liniane.

32Saka miauawbu, sa lriwlriwgu ku vai, la kela ku laumawmase maililuku kwidra la makaelaela ku caemane si lakiaikai ki aidridringane mwa ki Yesu; 33makanaelre ku sakatucekelane irubu icucubungu ki lrawlrawdru. 34La pawdringai ku Yesu kwidra ki lamacaeme si pakatwase kwidra ki laaidridringane. Kai palraingi pakawriva ki aidridringane, asi lwiyane ku aidridringane wathingale iniane ala ka aneane.

Yakai Galrilri dindu

(Luka 4.42-44)

35Sakakaiyane ki mialrealre, sa kaina kaliare, la ngidrakale ku Yesu, la mulatadre katwase ki daane, si mwa kwidra ki takakadrwane ki umawmase, la ikai kwini inulrinulri. 36Ku Simune si kwidra palraini la katwase silape iniane, 37sa kidringainga, la iya kai, “Makitwa silasilape nai muswane makanaelre.”

38Ku Yesu la kawriva, “Ila tamwa ki adeethe kikai ku cekele, kunaku mialri ka itara ka amwane kikwini dindu, asi lwiyane kikai ala amanilringa ku kelali ku pacugane.”

39Lakamani, ku Yesu la dadavace salraelre ki swa Galrilri sanaka ceekele, ikai ki lararubwane ki swa Yuda dindindu, si pakatwase ki laaidridringane.

Pawadringai ki maraibiu ka umawmase ku Yesu

(Matai 8.1-4; Luka 5.12-16)

40Yakai ku tangeea ku kiapucaemane ki raibiu kaiyanganai mucucubungu ki Yesu, la pidruru si kitubi iya kikai, “Sana palraingisu, lri dulrusu pakabula nakwane.”

41La tukurwane#1.41 “La tukurwane ku Yesu” yakai ku sidrumane ka hungu ku amia kai “la kagirimucu”. ku Yesu, si taale ku alrima sulrape iniane, la iya kai, “Palraingaku, kusu kabulanga.” 42Ku caemaneini la iyasasane katwase iniane, si kabulanga. 43Ku Yesu la makakaai pakatwase iniane, si pudriadriingai cunu, iya kai, 44“Madha pelaela ki naaneanenga; malradalrua mwa kidrele ki barakalai, lani kamani ka wadrele, ala singikai kudra tukakudhane ki Musi si patarumara ku sapatarumarane, tusapelaelane ki laumawmase ala ka mabulangasu.”

45Ai kikai lasu sa katwasenga, peaelaelalringa ki laumawmase, ku Yesu la kai pathingalenga lu mucekele, la ikaainga lrialringulu ki cekele; ai ku laumawmase sakamiya twalai kidruanga kainganai silape iniane.

Currently Selected:

Maruku 1: NDV

Highlight

Copy

Compare