Matai 27
27
Ku Yesu kiasatedre pwa ki Pilatu
(Maruku 15.1; Luka 23.1-2; Yuhani 18.28-32)
1Sakamialrealre, ku lamarudrange ki barakalai si laciwru ki swa Yuda makanaelre madrekadrekase, ku apapacadhane ki Yesu. 2Kwini lalasu la malra kerenge ki Yesu, si alra iluku, baai ki sutuke ki swa Ruma ka Pilatu.
Tapacadhane ki Yuda
(Nisikawlane 1.18-19)
3Kudra kialangai ki Yesu ka Yuda wadrele sa kitupasalrivanenga ku Yesu, la ngitatasiwlriwlri, la malra kwini matulrulu ka gingi ka paisu si katwase baai sawlri ki marudrange ki barakalai si laciwru, 4la iya kai, “Pasalrivaku, kialangadhaku ku niake ki kadrwa ku pasalrivane!” Kwini lalasu la tubalre iya kai, “Ngiakakamaningasu kwini, manemane ku akicapilaneana nai?”
5Ku Yuda la cilri kwini paisu pwa ki daane ki Twaumase, si katwase kidrangi ngithathere.
6Ku marudrange ki barakalai la malra siludu kwini paisu, si iya kai, “Kikai yai balrithane ki erai ka paisu, kai mamamua ki kakudhane lu pwane pwadringi ki lrulrui ki tapatarumaramarane ka langiane.” 7Ku tamadrekadrekasane, kwini lalasu la mapalrailraingi alra kwini paisu si langai ku taluvaale ku kadaengane ki taratudilrudilrungu, si tutadralredralrekane ki badhabadha. 8Ngwalai kikai, pakeelanga kaikameane ku laumawmase “Erai ka umawma” amiamiana kwini ki kadaengane.
9Ku tangilribatane kikai ngiamianga ku nataiyane kai ki yuginsia ka Yerimia iya kai, “Kwini lalasu wamalra ku matulrulu ka gingi ka paisu, ka palraingi ki swa Iseraylri pasikai iniane baai ku salangadhane, la langai ku kadaengane ki taratudilrudilrungu; 10kikai yai nisingikaiyane ku drekase ki Tamatama.”
Yacucubungu ki Pilatu kisaibange
(Maruku 15.2-5; Luka 23.3-5; Yuhani 18.33-38)
11Ku Yesu acegecege ikai cucubungu ki sutuke ki swa Ruma, ku sutuke ki swa Ruma la kivaga iniane iya kai, “Talialalaisu ki swa Yuda?”
Ku Yesu la tubalre iya kai, “Kikai yai amanisu ka amia.” 12Ku takukuswane ki lamarudrange ki barakalai si laciwru, kwini lasu kadruua ku tatubalreane.
13La iya kai ku Pilatu iniane, “Kaisu kialalra kai takukuswane muswane ki lalasu kai taikalraane?”
14Ku Yesu laka sakamiya kai tubalre ku naniakuvalanenga; ku Pilatu la kasamali turamuru.
Kiapathavungu kipapacai
(Maruku 15.6-15; Luka 23.13-25; Yuhani 18.39–19.16)
15Luka Takilragavane ka lrisi, ku sutuke ki swa Ruma singiakai ku tapiapiane pasikai ki mapapangale pulatadre ku tangea ku kiaemenge ka urikai lini. 16Sakamani kwidra, la icengecenge ikai ku tangea ku kiamatikaikai ka kiaemenge ka sia [Yesu] Barabase. 17Lakamani, ku mapapangale sa yelrelre, ku Pilatu kiavaga liniane iya kai, “Ani pasikai naiane pulatadre ki aneane amia numi nakwane? [Yesu] Barabase? Amani kudra kiapasi Yesu Kirisitu?” 18Ku Pilatu wathingale ala ka pathalrane kwini ki lalasu ala ka amani ku alra lini ki Yesu si baai iniane.
19Ku Pilatu sa saibaibange, ku taelrelreini siakawlu ki umawmase si pelaela iniane iya kai, “Kwini ngwakai ki kadrwa ku pasalrivane, madha kicaicapili, asi lwiyane ku maungu kiapakwalriaku ngukai iniane ikai ki sipili.”
20Ku marudrange ki barakalai si laciwru la pangiracuku ki mapapangale, kwini lalasu la kitubi ki Pilatu ku amuelebane pulatadre ki Barabase, si la papacai kamani ki Yesu. 21Ai ku sutuke ki swa Ruma kiavaga liniane iya kai, “Kikai ki tadrusa ani pulatadre ki aneane amia numi nakwane?”
Kwini lalasu la tubalre iya kai, “Barabase!”
22Ku Pilatu la kivaga liniane iya kai, “Lai pangitumanaku ki sia Yesu Kirisitu?”
Kwini lalasu la karaleale iya kai, “Alra iniane kedrekedre pwa ki ziwzika!”
23Ku Pilatu la kivaga iya kai, “Kai lasu manemane ku piaini ku ngialisiane?”
Kwini lalasu laka akwadradrau karaleale iya kai, “Alra iniane pakedrekedre pwa ki ziwzika!”
24Sadrele ku Pilatu, la thingale adravane kawrivana kadruanga ku vai, lri aru pangiracukulringa ku akalrithavulane, la malra ku acilai si icucubungu ki mapapangale tawlrima, si iya kai, “Ku pawaludru ku erai kai ki umawmase, ku pasalrivane kai yakai nakwane, kunumi ngikakamanianga siamece!”
25Ku mapapangale la masiasilange iya kai, “Ku balrithane kai ki erai kai ki umawmase nai kamaaninga si lamwabaibalrithi naiane ka siamece!”
26Ku piratu la mukerenge ki Barabase si baai liniane, la drekase lrumai ki Yesu, ala baai ki umawmase si katwase pakedrekedre pwa ki ziwzika.
Ku kwapingi twamwamulrace ki Yesu
(Maruku 15.16-20; Yuhani 19.2-3)
27Ku lakwapingi ki Pilatu la iluku ki Yesu pudaane ki daane ki sutuke; la irubu ngithalringulu iniane makanaelre. 28Kwini lalasu la mwalra ku laimai ki Yesu, si pasilaimai iniane ku duduli ka palimemelre, 29La tutawpu ku cecenekane ka angatu si pasitawpu iniane, la malra ku vaeva ku uvai si pikai ki vanaleini paecenge, ala pidruru icucubungu iniane si tumeamelrace iniane, la iya kai, “Talialalai ki swa Yuda banzai!” 30Kwini lalasu la sungalruthu iniane, la alra ku uvai si lrumai ki awlruini. 31Kwini lalasu samaka tusinalrelremenga, la mwalra kwini silaimaini ka palimemelre, si sawlri pasilaimai ku laimaini, ala iluku iniane katwase pakedrekedre pwa ki ziwzika.
Ku Yesu kiakedrekedre pwa ki ziwzika
(Maruku 15.21-32; Luka 23.26-43; Yuhani 19.17-27)
32Kwini lalasu sa mulatadrenga, kiapadradresenge ku tangea ka swa Kurini ka sia Simune, la vutha paangeale iniane ku ziwzika ki Yesu. 33Kwini lalasu la kela kudra ki kadaengane, ka sia Gulugutha, ku pacugane “Awlru ka lrelrelrege” amia. 34Kwini lalasu la malra ku nipaibwane ku mapalili ka pagu ka bava si baai paungulu ki Yesu; la palalava ku Yesu, ai kai mwabangalre ungulu.
35Lakamani, kwini lalasu alra ki Yesu kedrekedre pibelenge ki ziwzika, la kuzibiki mavalavala ku laimaini; 36ala ikai kwini nene drangalru iniane. 37Kwini lalasu la pikai taibelenge ki awlruini ku nipacasane ku baali, ku pacase kwini ki baali amia kai, “Talialalai ki swa Yuda ka Yesu.” 38Kwini lalasu la malra ku tadrusa ku pasalriu si pakarededele kedrekedre pibelenge ki ziwzika, yavanale ku tangea, yaviri ku tangea.
39Ku ngwakai kwini lribate ku laumawmase twasinalrelreme ki Yesu, si veteevete ku awlru 40si iya kai, “Kusu ka kiasanu buruku ku daane ki Twaumase, si lai maka tutulrulu tupela tudaane! Luka Lalakesu ki Twaumase, ngipapalribula, la twalai ki ziwzika mulebe!”
41Ku lamarudrange ki barakalai, si latarabulrubulru ki Sisiu, si laciwru la kathadaalrane ulralrakai iniane, si iya kai, 42“Kai lasu palribulunga ki umawmase, la kai maka ngipapalribulu! Kai lasu kaika talialalai ki swa Iseraylri? Alaiyasi maka twalai ki ziwzika ulebe kaiasasane, kuta la takasalru iniane! 43Kai lasu satalu ki Twaumase, Lalakaku ki Twaumase la ngiaiya; mathariri, ala tadredreele ki Twaumase lu lri kela palribulu iniane lutumane!”
44Adravane kudra pasalriu si karedele kikedrekedre mialri tusinalrelreme iniane.
Tapacadhane ki Yesu
(Maruku 15.33-41; Luka 23.44-49; Yuhani 19.28-30)
45Saka mwalringedele, la kadradrimiti kai kawmasane, lri ikai ku ngwatulru ki tuki. 46Samaka ulringedele lrika tulru ki tuki, ku Yesu la karaleale iya kai, “Ilri, Ilri, lramasapaketani?” Ku pacugane amia kai, “Twaumaseli, Twaumaseli, asu ciilri nakwane?”
47Kudra yathili acegecege ku laumawmase, yakai ku kialalra, la iya kai, “Wadawdawlu ki Ilria!” 48Ikai kwini la ikai ku tangea ku makakaai katwase lailai, malra ku vaeva ku pelrece, la taburu pwa ki maalriu ka bava, ala kerenge pikai ki uvai, si lri paungulu iniane.
49Kudra drumane ku umawmase la iya kai, “Idrengerana, tadredreleana lulri kela ku Ilria palribulu iniane lutumane!”
50Ku Yesu la peelanga akwadrau karaleale, si ala nguniakanenga.
51Kikai kwidra, kudra nipakelradhane ikai ki daane ki Twaumase ku make, la twalai belenge mulebe kathurilace mawdrusa. La lingilingi kai kadaengane, aegacane ku alrisapesape si ngutukadre. 52Ku tadralredralrekane la nguelebane ku talingilingane, takaalra ku lawapacainga ku mwalecege ku sinzia ku siaelane panianiake. 53Kwini lalasu la katwase tadralredralrekane, sa sielanga ku Yesu si la mucekele; Ikai kwini takaalra ku umawmase ku wadrele liniane.
54Ku wakadrekadrenge ki Yesu ku kiacapili ki kwapingi si lakwapingi la drele ku talingilingane si tangimiane patueelre, la makitu mukuludru turamuru, si iya kai, “Kai lasu patengatengane ka Lalake ki Twaumase!”
55Ikai kwini yakaiana ku lalabaibai ku yadaili dredredrele, kwini lalisu twalai Galrilri ka twapapapalra pasikaikai ki Yesu. 56Ikai liniane Yakai ku Magedaleni ka Malria, laka tina ki Yakubu si Yusepe ka Malria, si tina ki tadrusa ka lalake ki Zibidi.
Takidralrekane ki Yesu
(Maruku 15.42-47; Luka 23.50-56; Yuhani 19.38-42)
57Sa kadradrimidrimiti, yakai ku tangea ku satacekecekelanane ka swa Arimatai kaiyanganai; kai lasu sia Yusepe, ka mialri ka situ ki Yesu. 58Kwini lasu matwase kikawriva ki Pilatu, si kitubi ku alrane dralreke ku kinawmasane ki Yesu; ku Pilatu la sikawlu pamalra ku kinawmasane ki Yesu si baai iniane. 59Ku Yusepe la malra kwini kinawmasane si katwase, la arakai ku mabula ku kaimadhane ka makalrilau pasimai iniane. 60Si pasutelrai pikai ki balriuini; kikai balriu tawkamanimani ku talrukwane tubalriu. Kwini lasu la malrana balrutai ku maadrau ku lrenege, si celrepe ki lrawlrawdru ki balriu, ala katwase. 61Ku Magedaleni ka Malria si tangea ka Malria la nene cubungu ki balriu, ikai kwini drangalrungalru.
Ku wakadrenge ki balriu
62Sakakaiyane, amani ku bibilrilinga ku tapadulrudulrwane ka vai, ku marudrange ki barakalai si swa Palrisai maredele katwase kikawriva ki Pilatu, si iya kai, 63“Mabelenge, pwalringauana nai kudra taratavuvuvulrucu sa italuvaivaiyana naamia kai, ‘Ki samakatulrulu lri sielaku panianiake.’ 64Lakamani, kusu apadrekadrekasa ku apudriadringadhane kadrenge ki balriu, pakeela ki samakatulrulu, kwidra la situini lani kai dulru kupa si iluku iniane, lai katwase pelaela ki laumawmase iya kai, ‘Kwini lasu twalai ki wapacai sielane panianiake.’ Ku miyaiya kai ku tatavuvulrucane lrika parawramuru ki siaswalane ku angilisianane!”
65Ku Pilatu la iya kai liniane, “Kunumi lu iluka ku lri kadrenge, la pakeela ku tadulrwane numi, pudriadringai kadrenge ki balriu!”
66Ala katwase kwini lalasu, padakipi ku pinuhangeane pikai ki lrenege, si celrepe ki lrawlrawdru ki balriu, la suru ku wakadrenge si pakadrenge.
Currently Selected:
Matai 27: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
