Matai 26

Nimadrekadrekasane kibubuli ku apapacadhane ki Yesu

(Maruku 14.1-2; Luka 22.1-2; Yuhani 11.45-53)

1Samaka iyanga kikai vaga ku Yesu, amia kai ki lasitu, 2“Wathingale numi, lri makapusalenga lai ka Takilragavane ka lrisi, ku Lalake ki Umawmase lri kikilangai, si kikedrekedre pwa ki ziwzika.”

3Sakamani kwidra, ku marudrange ki barakalai si laciwru ki cekele yarubu ikai ki daane ki abebeelengenga ki barakalai ka Kayapa, 4si taelre madrekadrekase ku akibubuliane pwalra ki Yesu, si papacai iniane. 5Ai kwini lalasu amia kai, “Lri kaita maka pikai ki tatulrisisisiane pia kikai, amani lu pangiracuku ku akathurikicane ki lamapapangale.”

Kiapulawlau ikai Bithani

(Maruku 14.3-9; Yuhani 12.1-8)

6Ku Yesu yakai Bithani ki daane ki Simune ka macaeme karaibiu; 7la ikai ku tangea ku ababai ku wailuku ku vaeva ka mathariri ka didilrungu, nipasueteane ku nitukucingalrane ka sangwalreme ka lawlau. Sa kanekane ku Yesu, kwini ababai la gugu kwini sangwalreme ka lawlau pwa ki awlru ki Yesu. 8Ku lasitu sadrele kikai, la kai kiragai, si la iya kai, “Aningithanga piakai pasawlra? 9Kikai sangwalreme ka lawlau lri dulru kilangai si ngukalra ku paisu la arakai palribulu ki matiakukuru ka umawmase!”

10Ku Yesu la thingale, si iya kai liniane, “Asingithaanga pakwalri kai ki ababai? Kai alisu ki kai tapianeini nakwane taingeane ka mathariri ka awngane. 11Asi lwiyane kai matiakukuru ka umawmase yakai numiane taelre palralrawthu, ai kainaku lrika palralrawthu ikai taelre numiane. 12Kai tagugwane kai sangwalreme ka lawlau pikai ki kinawmasaneli ki alisu padulrudulru ku akidralrekaneli. 13Nau pudriadringai pelaela numiane, kai kiacaebe ki belenge, kikai hukuingi sanaka tadarurane, sanaka umawmase lri pelaelaela kikai tapiane ki alisu, si ngulringalringau iniane.”

Ku Yuda kialangai ki Yesu

(Maruku 14.10-11; Luka 22.3-6)

14Ikai ki ta 12 ka lasitu ki Yesu, yakai ku tangea ka swa Isekaliwte ka sia Yuda, kwini lasu matwase kikawriva ki marudrange ki barakalai, 15si iya kai, “Alaiyasi baadhaku ki Yesu numiane, palraingi numi baai nakwane ku manemane?” Kwini lalasu la malra ku matulrulu ku gingi ka paisu si baai iniane. 16Twalainga kwini, ku Yuda la siasiasilapenga ku akilangadhane ki Yesu.

Maredele ki lasitu mwa tukwaubu ku kwaubu ki Takilragavane ka lrisi

(Maruku 14.12-21; Luka 22.7-14, 21-23; Yuhani 13.21-30)

17Saka aswalaalanga ka vai ki Tamwalrane ku sapawsemakane ka lrisi, ku lasitu kaiyanganai kivaga ki Yesu, “Ani ikai inu amiasu naiane padulru pasikai muswane ku kwaubu ki Takilragavane ka lrisi?”

18Ku Yesu la tubalre, “Kunumi lu mucekela mwa kudra ki tangea ka umawmase, si iya kai iniane, ‘Ku sinsi amia kai: Ku vaili mabeabeanga; lri taelreaku ki lasituli ikai ki daanesu pangimia ku Takilragavane ka lrisi.’ ”

19Ku lasitu la singikai ku taiyane ki Yesu katwase marasikai ku kwaubu ki Takilragavane ka lrisi.

20Sakamiauawbunga, ku Yesu si kudra ta 12 ka lasitu la utaetalane. 21Sakanekane, la iya kai ku Yesu, “Nau pelaela numiane, ikai numiane yakai kai tangea ku lri kilangai nakwane.”

22Kwi lalasu la makitu kwalri ku kidremedreme lini turamuru, si tarungangea kivaga iniane iya kai, “Tamatama, bekacaku kamani?”

23La tubalre ku Yesu iya kai, “Ku kiasasilange nakwane pikai ki usara dapenge ku pange si kane kwini umawmase amani ku lri kilangai nakwane. 24Mia ku taiyane ki Sisiu, ku Lalake ki Umawmase lri kitulisi, ai kwidra kialangai ki Lalake ki Umawmase yakai ku amatikurwane! Naika maesaesai ana kai kitulalake kwini lasu!”

25Kudra kialangai ki Yesu ka Yuda la mialri kivaga iya kai, “Sinsi, bekacaku kamani?” Ku Yesu la iya kai, “Kwini ngiaiyangasu.”

Kwaubu ki Tamatama

(Maruku 14.22-26; Luka 22.14-20; 1 Kurintu 11.23-25)

26Kwini lalasu sa kanekane, ku Yesu wamalra ku pange, la paswala inulri kiaseasene, ala apapipithingi, si apavalavala baai ki lasitu, si iya kai, “Kunumi malra si kane; kikai yai kinawmasaneli.”

27La pacungulu malra ku kupu, sa papianga ki Twaumase kiaseasene, la baai liniane, si iya kai, “Ungula makanaelre; 28kikai yai eraili, ka sapatuthingalane ku sakiketeketane ki Twaumase ki umawmase ka erai, ka pasiakai mwaludru ku akipacepane ku pasalrivane ki takaalra ka umawmase. 29Nau pelaela numiane, lri kainaku pelanga ungulu kikai budu ka bava, pakeela ku aikaiyane ki kuni ki Ama taelre numiane ungulu ku bavane ka bava ka vai.”

30Kai lalasu la senai asivaeva ku senai, la mulatadre, si papia Ulrive lregelrege.

Wayugingi ku angikawlrawlravane ki Pitiru iniane

(Maruku 14.27-31; Luka 22.31-34; Yuhani 13.36-38)

31Sakabilrilinga, ku Yesu amia kai ki lasitu, “Kai maungu, lri ngwalai numi nakwane si cilri nakwane; asi lwiyane amia kikai kai Sisiu, ‘Ku Twaumase lri papacai ki taraagwagu ka umawmase. Ku lakiu lai lri mawvagavagai.’ 32Ai lu sielanga naku panianiake, lri aswalaku numiane mwa ka Galrilri.”

33Ku Pitiru la iya kai ki Yesu, “Adravane cilri muswane makanaelre kai drumane kai umawmase, lri kainaku cilri muswane lutuumane!”

34Ku Yesu la iya kai ki Pitiru, “Nau pelaela muswane, kai maungu, lu kaiyana kuka, lri kingitulrulusu ngikawlrawlravane nakwane.”

35Ku Pitiru la tubalre iya kai, “Adravane kalri tara tupalraku muswane pacai, kainaku lri dulru ngikawlrawlravane lutuumane!”

Kudra drumane ka lasitu la mialri iya kai makanaelre.

Tainulriane ikai babengelradhane Gesimani

(Maruku 14.32-42; Luka 22.39-46)

36Ku Yesu si lasitu wakela mwa kudra ki taingeane, ka sia Gesimani; kwini lasu la iya kai liniane, “Kunumi ikaikaiya kai nene, nau mwana kavai inulri.” 37Lakamani ku ilukuini ki Pitiru si lalake ki Zibidi ka tadrusa karededele katwase. Kwini lasu la pathagili kipakwalri ku kidremedreme, 38la iya kai liniane, “Kwalri turamuru kai kidremedremeli, kisanu pacapaacainga. Kunumi ikaikaiya kai, si tupapalra nakwane kasimeameace!”

39Kwini lalasu la aru papucucubungu katwase, si pidruru guruthungane, la inulri iya kai, “Ama! Alaiyasi ka adulrudulrwane, madha paungungulu nakwane kikai mapalili kai yakupwane! Ai madha singikaikai ki kidremedremeli, singikaiya ki takidremedremanesu sikakathane.”

40Ku Yesu la siwlri mwa kwini ki tatulru ka lasitu, la drele liniane kasipeelrengenga makanaelre, la iya kai ki Pitiru, “Kai numi maka twapapalra nakwane kasimeameace ku navaevanga ki tuki? 41Kasimeameaca inulri, amani lu ulrabuku numi ki salrilrigilane. Kwini kidremedreme numi adravane palraingi, kwi kinawmasane numi twaramuru.”

42Ku Yesu la muanga ku saka kingipusale inulri iya kai, “Ama, alaiyasi kikai mapalili ka yakupwane lu kaika adulrwane pakidaili nakwane, si lri tara ka awngulaneli, ku takidremedremanesu ani kitulrepengenga ngimia.” 43Ku Yesu la katuasenga mwa ki lasitu, si drele liniane la kasipeelrenge kwini lalasu; ku maca lini lakai maka manwamaca.

44Ku Yesu la katwasenga liniane, saka ngusitulrulu katwase inulri, ku taiyane mararaamau ki aswalaala. 45Ala siwlri mwa kwini ki lasitu, si iya kai, “Masipeelrengeana numi, si isaadrana numi? Drela, wakelanga ku akikilangadhane kai Lalake ki Umawmase pikai ki mapasaisalriu ka umawmase. 46Ngidrakala, ila ta katwase! Drela, ka kialangai nakwane ka umawmase wakelaanga!”

Kiapwalra ku Yesu

(Maruku 14.43-50; Luka 22.47-53; Yuhani 18.3-12)

47Sa kawrivarivana ku Yesu, wakela ku tangea kwidra ki ta 12 ka situ ki Yesu ka sia Yuda. La takaalra ku laumawmase ku mailuku ku lrabu si angatu kainganai tupapalra iniane; kwini lalasu yai nipakainganadhane ki marudrange ki barakalai si laciwru ki cekele. 48Kudra kialangai ki Yesu ka umawmase paswalanga pelaela liniane ku vaeva ka sapatuthingale, amia kai, “Ku mwali uma, amani ku lrika amalrane numi ka umawmase, kunumi la pwalranga iniane.”

49Ku Yuda sakela la makakai katwase mucucubungu ki Yesu, si iya kai, “Sinsi, Asu ka mwadringadringai.” Si uma iniane.

50Ku Yesu la iya kai, “Talragi, kirimwa pia! Ku nau pia iyasu!#26.50 “kirimwa pia! Ku nau pia iyasu!” ku wahunyake madu iya kai “Wakelasu tumane?””

Lakamani, Kudra laumawmase la arwacucubungu, si ruthuku ki Yesu, la malra kerenge iniane. 51Kudra yakai ki Yesu taelre ku umawmase, yakai ku tangea ku wasudru ku lrabu, si papia calrigi ki sasiakawlu ki abebeelengenga ki barakalai, la lrathipi kudra thili ku calringaini. 52Ku Yesu la iya kai iniane, “Kwini lrabusu putawbubana! Asi lwiyane sanaka pwadremenga, lri tara paacai kiara lrabu. 53Bekacesu kai thingale, ka lri dulrwaku kitubi ku akiparalubane ki Ama, si lri makakai pakainganai ku tai 12 ku tairubwane ki kwapingi ka sasiakawlu belenge? 54Alaiyasi piaku kai, ku taiyane ki Sisiu, kudra lrika atarangimiane kudra lavaga lai maka dulru ngimia?”

55La pacungulu, ku Yesu papia ki mapapangale iya kai, “Kai iluku numi kai lrabu si angatu kainganai pwalra nakwane, twasadre numi nakwane? Lukakaiya waneneaku ikai ki daane ki Twaumase bulrubulru ki umawmase, la kai numi pwalralra nakwane. 56Ai, kikai lrika angimiane kai patuelre lri tara ngimia ku taiyane ki yuginsia ikai ki Sisiu.”

Sakamani kwidra, ku lasitu lamakitu cilri iniane, si mawbebere.

Yakai takaigigiane kisaibange

(Maruku 14.53-65; Luka 22.54-55, 63-71; Yuhani 18.13-14, 19-24)

57Kudra la pwalra ki Yesu ku umawmase wamalra iluku ki Yesu pwa ki daane ki Kayapa ka abebeelengenga ki barakalai. Ikai kwini, yacengecenge irubu ku tarabulrubulru ki Sisiu si laciwru. 58Ku Pitiru la sadaaili kabibibilrili ki Yesu, sakelanga kalatadrane ki daane ki abebeelengenga ki barakalai. Ku Pitiru la mwa kalatadrane, si taelre nene ki tarakadrekadrenge, lri dredrele ku lrika apangimiane ki kikai. 59Ku marudrange ki labarakalai si ku swa giingi makanaelre la kidremedreme silape ku atakaiyane hukuku ki Yesu, ku lrika apapacadhane iniane, 60adravane ikai ku takaalra ku wacapange hukuku iniane ku umawmase, ai kai maka kiadringai ku siwmi. Ku bibiilrilinga, la ikai ku tadrusa ku arwacucubungu si iya kai: 61“Kikai umawmase amianga kikai: ‘Lri dulrwaku buruku kai daane ki Twaumase, ki minaka tulrulane ka vai la alra tupela tudaane.’ ”

62Ku abebeelengenga ki barakalai la acegecege, si kivaga ki Yesu iya kai, “Kai hukuku muswane kai ki laumawmase, kadruua ku satubalreanesu?” 63Ku Yesu la icelrebe kai avavaga. Ku abebeelengenga ki barakalai la peelana iya kai iniane, “Lri papiaku ki nagane ki palralrawthu ka Twaumase drekase muswane kiketeketa si pelaela naiane, amanisu kwidra Kirisitu, ka Lalake ki Twaumase?”

64Ku Yesu la tubalre iya kai, “Kikai yai amanisu ka amia. Ai nau pelaela numiane, twalainga kikai, lri drele numi ki Lalake ki Umawmase ku wanene ikai tali vanale ki sapupukuanenga, si ngukaikai ki ememe kainganai mulebe!”

65Ku abebeelengenga ki barakalai sakilalra kikai vaga, la thurilace ku laimaini, si iya kai, “Kai lasu twasinalrelreme ki Twaumase! Kaita mwarikainga ku wasiwmi ku umawmase. Kialalranga numi makanaelre ku tatusinalrelremeaneini ki Twaumase; 66Lu kidremedreme numi ngitwatumane?”

Kwini lalasu la iya kai tubalre, “Apapacadhane kai lasu!”

67Kwini lalasu la sungalruthu ki lringawini, si gemegeme lrumai iniane. Kudra wacamilrigi iniane ku umawmase, 68la iya kai, “Kirisitu! Yuginsiasu! Ala pelaelaa, laka aneane kai walrumai muswane?”

Ku Pitiru ngiakawlrawlravane ki Yesu

(Maruku 14.66-72; Luka 22.56-62; Yuhani 18.15-18, 25-27)

69Ku Pitiru yakai latadre nene; la ikai ku kaiyanganai ku sasiakawlu ka ababai ki abebeelengenga ki barakalai, la iya kai, “Papapalrasu kavai ki swa Galrilri ka Yesu.”

70Ku Pitiru la icucubungu ki laumawmase ngikawlrawlravane ki Yesu. La iya kai, “Kainaku wathingale luka tumana amiamiasu!” 71Ala katwase, sakelanga ki lrawlrawdru ki kalatadrane. La ikainga ku tangea ku sasiakawlu ka ababai ku wadrele iniane, la iya kai kwini ki acegecege ikai kwini ka laumawmase, “Kikai umawmase kai papapalra ki swa Nazarethe ka Yesu.”

72Ku Pitiru la peelanga ngikawlrawlravane ki Yesu, si kiketekete iya kai, “Kainaku wathingale kwini ki umawmase!”

73La kai tarathainu ku tangilribatane, kudra acegecege ithili ku umawmase la kainganai, si iya kai ki Pitiru, “Tengatenganesu ka papapalra liniane; kwini athingalane kwi lingausu.”

74Ku Pitiru la peelanga pusu iya kai, “Kainaku wathingale kwini ki umawmase. Alaiyasi kaika patengane kwini takawrivaneli, lri pathavungu nakwane ku Twaumase!”

Icengecenge kwini, ala kuuka. 75Ku Pitiru ala ngulringau ku taiyane ki Yesu ku vaga iya kai, “Lu kaiyana kuka, lri kingitulrulusu ngikawlrawlravane nakwane.” Kwini lasu la katwase, sa kai beserenga la kirimu tubi tungawngau.

Currently Selected:

Matai 26: NDV

Highlight

Copy

Compare