Lrivi 7
7
Kakudhane ki Samupasalrivanane ka lrisi
1Kikai amani ku kakudhane ki Samupasalrivanane ka lrisi; kikai sapatarumarane tinusaniangane turamuru. 2Ikai ki tali dradha ki tapatarumaramarane, amani kwidra taculuculwane ki Lama ka lrisi, culu kwini Samupasalrivanane ka lrisi ka waudriwdripi, ku erai la paralikiliki thalringulu ki tapatarumaramarane. 3-4Nguelre ku lamace, patueelre ku tawthu, takwalamace ka tali adringane, drusa ka pede si lamace ki pede, takatharirane ki athai, lri patueelre pubelenge ki tapatarumaramarane. 5Ku barakalai lri pubelenge ki tapatarumaramarane kwini lamace demedeme si lama patarumara ki Tamatama; kikai amani ku Samupasalrivanane ka lrisi. 6Kwini lawacekecekele ki barakalai sanaka sawvalai lri dulru kane kikai sapatarumarane ka labeate, ai lri tara ikai ki saniange ka taikaiyane si kane, kikai amani saka tinusaniangane ka lrisi.
7Yakai ku sivale ku kakudhane tara swadalepe arakai ki Balrithane ki pasalrivane ka lrisi si Samupasalrivanane ka lrisi: Ku beate lri baai ki marasiakai ki lrisi ka barakalai. 8Kwini lrangici ki Lama ka lrisi lri baai ki marasiakai ki lrisi ka barakalai. 9Ku Taleke ka lrisi, adravane arakai ku talabwane kutu, arakai ku palungu kirikiri, ka arakai ku kaika alrukulu ka palungu akame, lri tara baai kwini ki marasiakai ka barakalai. 10Ai ku ngeta ka Taleke ka lrisi, adravane ka nithalreane ara lawlau ka meameale, abadhane patuelre ki ngwakai ki Arungu ka barakalai makanaelre, kwini lalasu lri maramaramau madrudrulru kikai sapatarumarane.
Kakudhane ki Sulivatane ka lrisi
11Kikai lebe amani ku kakudhane ki lu papia ki Tamatama patarumara ku Sulivatane ka lrisi. 12Lwiyasi ikai ku lri kiaseasene ki Tamatama si patarumara ku Sulivatane ka lrisi, kai lri ka sapatarumarane ka niculwane sikakathane, lri drimana patarumara ku kaika nipawsemakane ka pange: Malaelamenge ka milrikinku ka nithalreane ku lawlau ki ulrive tumakudremelre ka pange, nisakidrane ku lawlau ki ulrive ka malubiri ka pange si malaelamenge ka milrikinku ka nipaelreane ki lawlau ki ulrive ka pange. 13Kai ka kathane kikai, lri patarumarana ku la nipawsemakane ka pange. 14Lri patwalai kikai ki lapange malra ku nipawkalrivilane ka acebe patarumara ki Tamatama. Kikai acebe abadhane kwini ki amani ku wamalra ku erai ki Sulivatane ka lrisi paralikiliki pwa ki tapatarumaramarane ka barakalai. 15Ku nipatarumarane ku beate lri kane demedeme ikai kwini ki vaivai ki tapatarumarane, madha putedratedra ku namanemanenga pakela ki kaiyane ki mialrealre.
16Lwiyasi kwini sapatarumarane ka Sulivatane ka lrisi ka twasapatarumarane ku ngikaketeketeini ku ngikakamanini kidremedreme pia kwini ka sapatarumarane, ku sapatarumarane ka beate kai lri ivaivai kane patuelre, ku tedrane kai lri katumane pukaiyane ala kane. 17Lwiyasi la pikaiyana pakela ki samakatulrulu, lri tara lama. 18Lwiyasi la pakelana ki samaka pusale kanekaaneana kwini beate, ku Twaumase kai lri tarumara kwini sanaka patarumaraini; kwini la patarumaraini kai lri kipaasipi. Kikai sapatarumarane kia tumakudrulru; ku aneanenga ku wakane kikai beate lri siamece ku luludane ki pasalrivane. 19Lwiyasi kwini beate la kiraisi kudra ki kai kiatumabula ka lamanemanenga, madha kanekane, lamaa.
Ku kiatumabula ku umawmase ikai ki lalrisi, adravane ka aneane, lri kane kikai beate ki Sulivatane ka lrisi. 20Ai ku umawmase la kane kikai beate ka kai kiatumabula ki lalrisi, lri tara kimwalra twalai ki kawkawlu ki Twaumase. 21Alaiyasi ikai ku umawmase ku kiaraisi ki kai kiatumabula ka lamanemane ikai ki lalrisi la kane kikai beate, adravane kwini kielreini ka umawmase ka bulabulai, ka namanemanenga ka kai kiatumabula, kwini lasu lri tara kimwalra patwalai ki kawkawlu ki Twaumase.
22Ku Tamatama wacunu ki Musi malra kikai kakudhane si baai pelaela iya 23ki swa Iseraylri. Ku lamace ki lwange ki nikiubawbalane ka kiu si kakiuane. 24Ku lamace ki wapacai ku kiakace ki bulabulai ka waudriwdripi madha kanekane, ai lri maka arakai papia ki drumane. 25Ku naaneanenga ku wakane ku lamace ku nilamane ka sapatarumarane ki Tamatama, lri tara kimwalra patwalai ki kawkawlu ki Twaumase. 26Ku swa Iseraylri, adravane ikai kidruanga, kai maka kane ku erai ki adhadhame si bulabulai. 27Sanaka aneanenga ku pasalriu kai ki kakudhane, kwini aneane lri tara kimwalra patwalai ki kawkawlu ki Twaumase.
28Ku Tamatama wacunu ki Musi baai pelaela kikai lebe kai kakudhane 29si baai ki swa Iseraylri. Adravane ka aneane lu patarumara ku Sulivatane ka lrisi, lri tara malra kivala ku beate tusacebane si patarumara ki Tamatama. 30Lri tara ngikakamani malra kikai acebe iluku si patarumara ki Tamatama tusapatarumarane. Lri malra ki lamace ki sapatarumarane si tali tuku ka beate, tunipawkalrivilane ka acebe si patarumara ki Tamatama. 31Ku barakalai lri malra kikai lamace pubelenge ki tapatarumaramarane lama; ku tali tukwane ku beate lai lri baai ki Arungu si lagaganeini. 32-33Ku tali vanale ka vagisi lri baai kwini ki marasiakai patarumara ku acebe ka Sulivatane ka lrisi si erai ka barakalai. 34Ku tali tuku ki sapatarumarane si tali vanale ka vagisi Tamatama ku wamalra patwalai ki swa Iseraylri si baai ki barakalai ka nipawkalrivilane ka acebe. Ku swa Iseraylri lri tara malra kikai si baai ki labarakalai. Kikai kai lri kaela ka kakudhane palralrawthu. 35Kikai sapatarumarane ka beate amani ku nikelretane ka abadhane liniane twalai kwini ki vai ku takipacegecegane ki Arungu si lagaganeini abarakalai. 36Kwini vai kikwini, ku Tamatama wadrekase ki swa Iseraylri malra kikai talikai kai iya ka beate si baai padrudrulru ki labarakalai. Ku swa Iseraylri lri tara ka palralrawthu pasusu kikai kakudhane.
37Kikai belenge kai lanipacasane amani ku kakudhane ki Lama ka lrisi, Taleke ka lrisi, Balrithane ki pasalrivane ka lrisi, Samupasalrivanane ka lrisi, apacegecegane ki barakalai si Sulivatane ka lrisi. 38Ku Tamatama yakai calragulragu, ikai lregelrege Sinai malra kikai kakudhane si baai ki Musi. Kwini ki vaivai, ku Twaumase wadrekase ki swa Iseraylri papia ki Tamatama patarumara tulrisi iya.
Currently Selected:
Lrivi 7: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
