Lrivi 8
8
Pacegecege abarakalai ki Arungu si lalalakeini
(Takatwasane Izipiti 29.1-37)
1Ku Tamatama wacunu ki Musi, 2“Kusu iluka ki Arungu si lalalakeini mwa ki lrawlrawdru ki Alrivilrivi ka balrawbauli. La iluka ku sangiragelanane ki barakalai, sa arakaiyane pacegecege ka lawlau, vaeva ku Balrithane ki pasalrivane ka lrisi, ka lrulai ka sawvalai ka lwange, drusa ka balase ka nikiubawbalane ka kiu, si akuvaeva ki cepenge ku kaika nipawsemakane ka pange si mwa, 3ala dawlu ki mapapangale makanaelre mwa kwini isarubu.”
4Ku Musi pasusu ku drekase ki Tamatama si pangimia. Ku mapapangale sa makitu isarubunga ikai ki lrawlrawdru ki Alrivilrivi ka balrawbau, 5la pelaela liniane, “Kikai pangimiamiali kai pasuswaku ku drekase ki Tamatama.”
6Ku Musi la ililuku ki Arungu si lalalakeini kainganai mucucubungu, si pasikelre liniane. 7La pasilaimai ki Arungu ku sapakadringane, palimemelre, pasilakete. La malra ku Ipude pasilaimai ki Arungu, nitumatharirane caisi ka lakete la paraisi pwa ki kinawmasaneini ku Ipude. 8Ala malra ku tupi pasitupi ki Arungu, la malra kwini “Urime” si “Thumime” puadringi ki tupi. 9Ala malra ku pagamucu pasipagamucu ki Arungu, arakai ku lakingi pangiragelane tali cubungane ki pagamucu, tusaniange ka pagamucu. Kikai patuelre pasusu ku drekase ki Tamatama si pangimia.
10Ku Musi la malra ku saniange ka lawlau drisisi ki tasukusukubane si nipikaikaiyane ka lawbubulu, la pangimia kikai patuelre pakitulrepenge patarumara ki Tamatama. 11La arakai ku lawlau sangwa pitulu paralikiliki pikai ki tapatarumaramarane si kwini la nipibelengane, sangwa pitulu paralikiliki ki tasinasinavane ka vintange si tapikaiyane ki vintange, pakai ku amalrane patarumara ki Tamatama. 12La malra ku saniange ka lawlau gugu pwa ki awlru ki Arungu, si pacegecege iniane abarakalai. 13La pacungulu, ku Musi wailuku ki lalalake ki Arungu mucucubungu, la pasilaimai ku sapakadringane, pasilakete, pasitalrupunu. Kikai patuelre pasusu ku drekase ki Tamatama si pangimia.
14Ku Musi wamalra ku Balrithane ki pasalrivane ka lrisi, ka lrulai ka sawvalai ka lwange; ku Arungu si lalalakeini la pubelenge ki awlru ki sawvalai ka lwange ku alrima lini. 15Ku Musi la culu kwini sapatarumarane, la arakai ku galawgau depe ku erai, sakidri thalringulu ki nitulawngane ki tapatarumaramarane, pakai ku apatarumarane, ala malra ku tedrane ku erai gugu pwa ki taikaiyane ki tapatarumaramarane. Lu mia kai, pakiatukudhanga tusaniange ki tapatarumaramarane, si paalrivilrivi iniane. 16Ku Musi la malra ku lamace ki adringi ki niculwane, takatharirane ki athai, drusa ka pede si lamace ki pede, pubelenge ki tapatarumaramarane, si lama patuelre. 17La malra ku tedrane ku lwange, paelre ku lrangici, beate, buru, iluku patuelre mulatadre ki tasuladhane si lama. Kikai patuelre pasusu ku drekase ki Tamatama si pangimia.
18La pacungulu, ku Musi wamalra ku vaeva tu Lama ka lrisi ka balase ka nikiubawbalane ka kiu; ku Arungu si lalalakeini la pubelenge ki awlru ki balase ka nikiubawbalane ka kiu ku alrima lini. 19Ku Musi la culu kwini sapatarumarane, la paralikiliki ku erai thalringulu ki tapatarumaramarane. 20-21La teketeke ku beate, arakai ku acilai sinau ki tali adringi si vagisi, la malra kilakikai patala awlru ki kiu, lamace demedeme pubelenge ki tapatarumaramarane lama patarumara. Kikai sangulremane ki Apwi ka lrisi amani ku kiragai ki Tamatama. Kikai patuelre pasusu ku drekase ki Tamatama pangimia.
22Ku Musi la iluku ku vaevanga ku balase ka nikiubawbalane ka kiu, kikai nipasikaiyane ki pacegecege ki barakalai patarumara. Ku Arungu si lalalakeini lri pubelenge ki awlru ki kiu ku alrima lini. 23Ku Musi la culu kwini sapatarumarane, si malra ku erai sakidri pwa ki vanale ki tali lebe ki calringa, ki dradrangalrane ki vanale ki alrima si dradrangalrane ki vanale ki drapale ki Arungu. 24Ku Musi la iluku ki lalalake ki Arungu mucucubungu, la sakidri ku erai pwa ki vanale ki tali lebe ki calringa, ki dradrangalrane ki vanale ki alrima si dradrangalrane ki vanale ki drapale lini, la malra ku tedrane ku erai gugu thalringulu ki tapatarumaramarane. 25La malra ku lamace, si maricuru ka tawthu, paelre ku lamace ki tali adringi, takatharirane ki athai, drusa ka pede si lamace ki pede si vagisi pakitukudha. 26La patwalai kwini ki apatarumarane ki Tamatama ka yacepengane ka kaika nipawsemakane ka pange nguvaeva, ku vaeva niarakaiyane ku lawlau ki ulrive ka pange si vaeva ka malubibiri, si pubelenge ki lamace si vagisi, 27ala malra kilakikai pubelenge ki alrima ki Arungu si lalalakeini, kwini lalasu la malra kikai si tunipawkalrivilane ka acebe patarumara ki Tamatama. 28La pacungulu ku Musi patwalai ki alrima lini tarumara kikai la akaneane, la pubelenge ki tapatarumaramarane ki Lama ka lrisi si lama patarumara. Kikai amani ku apatarumarane lu pacegecege ki barakalai. Kikai sangulremane ki Apwi ka lrisi amani ku kiragai ki Tamatama. 29Ku Musi ala malra ku beate ki tuku tunipawkalrivilane patarumara ki Tamatama; kikai naika taingeane ka drulru ki Musi ka nipatwaladhane ki sapatarumarane ka nikubawbalane ka kiu. Kikai patuelre pasusu ku tadrekasane ki Tamatama pangimia si pia.
30Ku Musi la malra ku saniange ka lawlau si erai ka yabelenge ki tapatarumaramarane si paralikiliki pwa ki kinawmasane ki Arungu si lalalakeini, si pwa ki laimai lini. Lu mia kai, la malra kwini laimai lini patarumara ki Tamatama.
31Ku Musi la pelaela ki Arungu si lalalakeini, “Kunumi pasuswa ku drekase ki Tamatama iluku ku beate mwa ki lrawlrawdru ki Alrivilrivi ka balrawbau, ikai kwini si aga, la ikai kwini kane, si la kane kwini yakai ki cepenge ku pange ki sapacegecegane. 32Ku tedrane ku beate si pange la lama. 33Lri makapitulu numi ikai lrawlrawdru ki Alrivilrivi ka balrawbau, madha katwatwase, pakeela ki tatulrepengane ku kakwakudhane ki lrisi ki pacegecege. 34Kaikameane kikai pangimia nai kikai pasusu nai ku pia kwini taiyane ki Tamatama; kikai drekase pasiakai ku amwalrane ki pasalrivane nai. 35Kunumi tara ikaiya ki lrawlrawdru ki Alrivilrivi ka balrawbau makapitulu, ki vaiyane ki maungu ikaiya kwini, pasusu ku drekase ki Tamatama. Amani lwiyasi kai numi pangimia, lri tara pacai numi. Kikai amani ku drekase ki Tamatama.” 36Ku Arungu si lalalakeini la pasusu pia ku tadrekasane ki Tamatama pangukai ki Musi.
Currently Selected:
Lrivi 8: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
