Lrivi 6
6
1Ku Tamatama wabaai pelaela ki Musi kilakikai kakudhane. 2-3Lwiyasi ikai ku umawmase la ngwalai ku kai mwabangalre sawlri baai ki sakacekele ka swa Iseraylri ku nipaswalane baai ku sapadrepetane ku paisu, ku kwaupa ku lamanemane ki palrapalra, ku wamalra vutha ki umawmase, ku wadraedrangelre maulrau ku lamanemane iya, si kiketeketeana kainaku kiadringai iya ku kidringaingaini ku lamanemane, la pasalriunga ki Tamatama, kwini lasu lri tara patarumara ku sapatarumarane. 4-5Lwiyasi ka pasalriu kikai taiyane belenge patuelre, kwini lasu lri tara sawlri kwini nikadraedrangelrane si malra kwini lamanemane; ku kwaupa, ku wamalra vutha, ku nipaswalane baai ka paisu, ku nikidringadhane ka lamanemane, ku nitavuvulrucane kiketekete si malra ku lamanemane, ikai ki takitupasalrivananeini ka vai, kwi lasu lri tara pakanaelre sawlri baai ki pimanemanane, lai lri padrima baai ku idai lrika mapusale. 6Pakai ku athavungane ki la pasalrivaneini, kwini lasu lri tara iluku ku vaeva ku mwadringadringai ka balase ka nikiubawbalane ka kiu mwa ki barakalai, tu Samupasalrivanane ka lrisi baai ki Tamatama. Ku luludane ki kiu lri singikai ku takelretane ki Alrivilrivi ka taikaikaiyane. 7Ku barakalai lri ikai cucubungu ki Tamatama pasikai iniane marasikai ku Sabalrithane ki pasalrivane ka lrisi, kwini lasu lai lri kipacepe.
Kakudhane ki Lama ka lrisi
8Ku Tamatama wadrekase ki Musi, 9baadha ki Arungu si lalalakeini pelaela ku kakudhane ki Lama ka lrisi. Kwini Lama ka lrisi lri pubelenga ki tapatarumaramarane, twalai ki maungu pakela ki mialrealre, pataleare lama. 10Ku barakalai lri si laimai ku palimemelre ka lalasare ka kaimadhane si edredrekane ka kaswi, la malra kwini yakai ki tapatarumaramarane ka abu ka sangulamane ki Lama ka lrisi si gugu pwa ki thili ki tapatarumaramarane. 11Ala pacungulu kipabalrithi ku laimai, la iluku kwini abu mwa kwidra nikelretane ki kakudhane ka mabula ka taikaiyane. 12Kwini apwi ki tapatarumaramarane lri pakudaladaalai, kai pakaedrepe. Luka mialrealre, ku barakalai lri drima pwa ku angatu, ku Lama ka lrisi lai lri patilibi pikai belenge, si lama ku Sulivatane ka lrisi ka lamace. 13Kwini apwi ki tapatarumaramarane lri pakudaladaalai adravane ka vaiyane adravane ka maungu, kai pakaedredrepe.
Kakudhane ki Taleke ka lrisi
14Kikai lebe amani ku kakudhane ki Taleke ka lrisi. Kwidra swakai ki Arungu ka barakalai lri ikai cucubungu ki tapatarumaramarane si papia ki Tamatama patarumara ku Taleke ka lrisi. 15Kwi lasu lri malra ku malamenge ka milrikinku, ulrive ka lawlau, si sangwalreme pikai belenge ki tapatarumaramarane lama, tusapelaelane ka patarwamaranga ki Tamatama patuelre. Kikai sangulremane ka lrisi yai, kiragai ki Tamatama. 16-17Ku barakalai lri kane ku tedrane ku sangu patarumarane. Kilakikai sapatarumarane lri tu kaika nipawsemakane ka pange, ikai ki Alrivilrivi ka taikaikaiyane, kane ikai cucubungu ki Alrivilrivi ka balrawbau kalatadrane. Ku Tamatama wabaainga ki barakalai ku drumane ka nilamane ka taleke; kikai yai mararaamau ki Balrithane ki pasalrivane ka lrisi Samupasalrivanane ka lrisi ka sanianganane. 18Ku sawvalai ku mwabaibalrithi ki Arungu lri makitu kane kikai nilamane ka sapatarumarane, kikai lrika drulru lini kwini ki lamwabaibalrithi liniane. Adravane ka aneane ku kiaraisi takela kikai tinu saniange ka Apwi ka lrisi lri tara kipakadula.
19-20Ku Tamatama la baai pelaela ki Musi ku kakudhane ku tapacegecegane abarakalai ki ngwakai ki Arungu. Luka takipacegecegane ki barakalai, lri patarumara ki Tamatama ku vaeva ki kukingi ka malaelamenge ka milrikinku (ku takathanane thadalrane ki nipatarumaramarane ku Taleke ka lrisi lukavaivaivai), apararamaava la patarumara ki mialrealre si maungu. 21Ku milrikinku apaelrea ki lawlau thalre, si pwa ki kaika alrukulu ka palungu akame, la tiiti, si patarumara ki Tamatama ka Taleke ka lrisi. Kikai sangulremane ki sapatarumarane amani ku kiragai ki Tamatama. 22Kwidra ngwakai ki Arungugu ku mwacungulu ka abebeelengenga ki barakalai, sanaka maelanenga ku mwabalrithi mucungulu lri tara lama patuelre kikai sapatarumarane baai ki Tamatama. 23Ku pia ki barakalai ku Taleke ka lrisi lri tara lama patuelre, ku umawmase kai lri maka kane.
Kakudhane ki Balrithane ki pasalrivane ka lrisi
24Ku Tamatama wacunu ki Musi, 25malra kwini kakudhane ki Balrithane ki pasalrivane ka lrisi si baai pelaela ki Arungu si lagaganeini. Ikaiya kwini ki dradha ki tapatarumaramarane, ka taculuculwane ki Lama ka lrisi si culu, kwini waudriwdripi ka Balrithane ki pasalrivane ka lrisi. Kikai yai saniange turamuru ka sapatarumarane. 26Kwini amani ku marasiakai ka barakalai lri ikai ki saniange ka taikaiyane, ikai kalatadrane ki Alrivilrivi ka balrawbau ki Tamatama, kane kikai sapatarumarane. 27Adravane ka umawmase ka lamanemane sanaka kiaraisi takela kikai ki sapatarumarane lri tara kipakadula kai ki puku ki tinu saniange. Kwidra niarakaiyane ku makalrilau caisi tumanemane lu kimwa ki erai ki sapatarumarane, lri tara ikaai ki saniange ka taikaiyane sinau. 28Kwidra saagane ki beate ku dumulu ka palungu tara cagecaga cwake; alaiyasi ka arakai ku bulavane ka palungu aga, sakidra pakabula, la arakai ku acilai ubu sinau. 29Kwidra swakai ki barakalai sanaka sawvalai lri dulru kane kikai sapatarumarane ka beate; kikai tinu saniange turamuru. 30Ai, ku erai ki niculwane ka sapatarumarane alaiyasi iluku mudaane ki Alrivilrivi ka balrawbau ki Tamatama, pakai ku asukubane ku balrithane ki pasalrivane tulrisi ikai ki Alrivilrivi ka taikaikaiyane, kikai beate ki niculwane kai lri maka kane, lri tara pwa lama.
Currently Selected:
Lrivi 6: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
