Lrivi 23
23
Kalalrilrisiane ki Takisuswane
1Ku Tamatama wacunu ki Musi, 2si papia ki swa Iseraylri baai pelaela ku kakudhane pangukai ki kalalrilrisiane ki Takisuswane; ikai ki kalalrilrisiane, lri yelrelre numi si sukubu ki Tamatama. 3Ki nimaka pitulane yakai ku amakanemelane dulru kaungu twatumane, ai ki samakapitulu amani ku tinusaniangane ka Taisadrasadrane ka vai, lri tara isadra numi. Kikai ki vai, kai numi lri maka pia sanaka awngane patuelre ku piapia numi ki vaivai, lri yelrelre numi si sukubu. Adravane ikai numi ki druanga, kikai Taisadrasadrane ka vai Tamatamane. 4Kunumi pelaela kikai lebe kikai lavai amani ku nikelretane ka la atulrisisiane, ka asukubane ki Tamatama.
Takilragavane si Tamwalrane ku sapawsemakane ka lrisi
(Taasipane 28.16-25)
5Ki samaka 14 ki vai ki aswalalanga ki dramare, twalai ki miauawawbu amani ku tapathagilane ku Takilragavane ka lrisi ki Tamatama. 6Ki samaka 15 ki aswalalanga ki dramare tapathagilane ki Tamwalrane ku sapawsemakane ka lrisi; ikai ki nimakapitulane ka vai, kunumi madha kanekane ku nipawsemakane ku pange. 7Ku aswalalanga ka vai kai ki lrisi, kunumi yelrelrea sukubu ki Tamatama, madha kauawngu ku awngane numi patuelre ku piapia numi ki vaivai. 8Ikai ki nimakapitulane lukavaivai papia ki Tamatama patarumara ku Apwi ka lrisi. Ki samakapitulu, kunumi la pelaanga yelrelre sukubu ki Tamatama, ai madha kauawngu patuelre ku piapia numi ku la awngane ki vaivai.
9-10Lu mudaanenga numi ku baai ki Tamatama numiane ka kadaengane, luka kalakitalekane kunumi malra nguererece kwini aswalaalanga ku taleke si mwa ki barakalai; 11lri malra kwini tinupawkalrivilane ka saceacebe patarumara ki Tamatama, lanu kikiragai ki Tamatama. Ku barakalai lri ikai ki kaiyane ki Taisadrasadrane ka vai patarumara kikai ki nipawkalrivilane. 12Kwini vai ki tapatarumarane ku taleke, kunumi lri patarumara numi ku vaeva ku taracailinga ka mwadringadringai ku lrulai ka balase ka nikiubawbalane ka kiu tu Lama ka lrisi, 13la pasilange patarumara ku drusa ki kukingi ku nithalreane ki lawlau ki ulrive ka pange tu Taleke ka lrisi, malra kwini si tusangwalreme ka saceacebe patarumara ki Tamatama, kunumi mialria patarumara ku vaeva ki kukingi ku saparalikilikane ku bava. 14Ku tau kitalekane ku taleke, adravane ka ngetana, ka niringiringanenga, ku niakamanenga ka pange, lu maka patarumaranga ki Twaumase lri maka kane. Ku mwabaibalrithi numiane, adravane ikai ki druanga, tara ka palralrawthu pasusu kikai kakudhane.
Lrisi ki takitalekane
(Taasipane 28.26-31)
15Twaladha ki samakapusale ki Taisadrasadrane ka vai, kwini ki vai ku tapatarumarane numi ku taleke ki Tamatama asipi, lri asipi numi ku nisangupitulane sukubu. 16Pakeela ki mwasaka malrimale ka vai, mukaiyane ki mwasakapitu ki Taisadrasadrane ka vai, kunumi malra kwini tau kitalekane ka taleke tu Taleke ka lrisi si patarumara baai ki Tamatama. 17Ki dadadaane lri iluku ku drusa ki kukingi ku malaelamenge ku milrikinku pwa ku sapawsemakane si ka niakamane, tubavane ka tau kitalekane ka lrisi patarumara baai ki Tamatama. 18Kaika pange sikakathane, kunumi patarumara ku pitu ku taracailinga ka lrulai ka balase ka nikiubawbalane ka kiu, si vaeva ku lrulai ka sawvalai ka lwange, drusa ku balase ka nikiubawbalane ka kiu; kikai niculwane yadrepele ka mwadringadringai. Kikai lri kiculu ka nilapulapwane lri paelre ki Taleke ka lrisi si Paralikiliki ka lrisi pakaredele tu Lama ka lrisi si patarumara baai ki Tamatama. Ku sangulremane ki sapatarumarane amani ku kiragai ki Tamatama. 19Kunumi mialria patarumara ku vaeva ku balase ka kiu tu Balrithane ki pasalrivane ka lrisi, drusa ku taracailinga ku balase ka nikiubawbalane ka kiu tu Sulivatane ka lrisi. 20Ku barakalai lri malra ku pange si drusa ku balase ka nikiubawbalane ka kiu patarumara ki Tamatama kaamani kudra nipawkalrivilane ka saceacebe, si baai ki barakalai; kikai la sapatarumarane saniange. 21Ki kwini ki vai, kunumi madha kauawngu ku awngane lukavaivai, yelrelrea si sukubu ki Tamatama. Ku mwabaibalrithi numiane, adravane ikai tali inu kidruanga, lrika palralrawthu pasusu kikai kakudhane.
22Luka takitaletalekane, kunumi madha ketaketabe ku ngwa babiabila ki angangade ku taleke, la mialri madha siwlriwlri siludu ku nipawrurwane ku madru; pasura kilakikai baai ki matiakukuru si badhabadha ka yakaikai numiane. Ku Tamatama amani ku Twaumase numi.
Bavane ka caili
(Taasipane 29.1-6)
23-24Kunumi ki caicaili ki aswalalanga ka vai ki sakapitu ka dramare tara pasuswa tunipawkalrivilane ka Taisadrasadrane ka vai; ngirapa tusangulringavane, la yelrelre sukubu ki Tamatama. 25Kunumi madha kauawngu ku awngane lukavaivai; papia ki Tamatama patarumara ku Apwi ka lrisi.
Tamupasalrivanane ka vai
(Taasipane 29.7-11)
26-27Ki caicaili ki samakamangeale ka vai ki sakapitu ka dramare amani ku vai ki tamupasalrivanane ka vai. Ikai kwini ki vai, kunumi laisa, si yelrelre la sukubu ki Tamatama, patarumara ku Apwi ka lrisi. 28Ikai kwini ki vai, kunumi madha kauawngu ku awngane lukavaivai, asi lwiyane amani ku tamupasalrivanane ka vai, icucubunga ki Tamatama ka Twaumase numi marasikai ki Balrithane ki pasalrivane ka lrisi. 29Adravane ka aneane, ala kane ikai kwini ki vai lri kimwalra patwalai ki kawkawlu ki Twaumase. 30Adravane ka aneane, ala ikai kwini ki vai la kaungu, ku Tamatama lri ngikakamani mwalra iniane patwalai ki kawkawluini. 31Ku mwabaibalrithi numiane, adravane ikai ki druanga, lrika palralrawthu pasusu kikai kakudhane. 32Twalai ki samaka bangate ka vai ki sakapitu ka dramare ki miauawbu pakela ki miauawbu ki samaka pusale, kunumi tara pasuswa kikai ki nimakavalane tunipawkalrivilane ka Taisadrasadrane ka vai, si ikai kikai ki vai laisi.
Talakangane ka lrisi
(Taasipane 29.12-40)
33Ku Tamatama wacunu ki Musi, 34malra kikai lebe kai kakudhane si pelaela ki mapapangale ki swa Iseraylri: Luka saka 15 ki samakapitulu ka dramare amani ku Talakangane ka lrisi, lri pacungulu makapitulu tulrisisi. 35Ikai ki aswalalanga ka vai ki Talakangane ka lrisi, yelrelrea si sukubu ki Tamatama, madha kauawngu ku awngane lukavaivai. 36Ikai ki nimaka pitulane ka tatulrisisisiane, lukakaiya kunumi papia ki Tamatama patarumara ku Apwi ka lrisi; luka samakavalrulu, la pela yelrelre sukubu ki Tamatama, papia iniane patarumara ku Apwi ka lrisi. Kikai vai amani ku asukubane ki Tamatama ka vai, kunumi madha kauawngu ku awngane lukavaivai.
37Kikai belenge kai nipatilibane ka vai amani ku kalalrilrisiane ki takisuswane. Kunumi yelrelrea sukubu ki Tamatama, si lukavaivai singikai ku kakudhane patarumara iniane ku Apwi ka lrisi, Lama ka lrisi, Taleke ka lrisi, Niculwane ka lrisi, si Paralikiliki ka lrisi. 38Kathane ku nikelretanenga ku Taisadrasadrane ka vai, kunumi tara pasuswa kikai la kalalrilrisiane; kathane ku tapiyaiyane ku sapatarumarane, pangiabilri ka sapatarumarane si ngiakakamani patarumara, kunumi lri papiana numi ki Tamatama patarumara kikai sapatarumarane.
39Lu maka kitalekenga, kunumi twaladha ki samaka 15 ka vai ki sakapitu ka dramare pathagili pasusu kikai lrisi makapitulu. Ku aswalalanga si mwasaka valru ka vai amani ku nipawkalrivilane ka Taisadrasadrane ka vai. 40Ki aswalalanga ka vai, kunumi malra ku mathariri ku madru ki angatu, ricingi ki abare, ku maribecele ku vasau si ricingi ki yanagi ikai cucubungu ki Tamatama ka Twaumase numi kiraragai tulrisisi. 41Kunumi tulrisisia kikai lrisi makapitulu; lri pasusu numi kikai kakudhane, pakela ki mwabaibalrithi palralrawthu. 42Sanaka swa Iseraylri lri ikai ki balrawbau makapitulu, 43Lanu pathingale ki mwabaibalrithi numiane ku Tamatama sasangilukunga ki swa Iseraylri katwase Izipiti, kwi lalasu nayakai ki ngilisiane ka balrawbau. Amanini ku Tamatama ka Twaumase numi.
44Kikai, ku Musi papia ki swa Iseraylri pelaela ki Tamatama ku kakudhane ki kalalrilrisiane ki takisuswane.
Currently Selected:
Lrivi 23: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
