Lrivi 22
22
Bulane ki la sapatarumarane
1Ku Tamatama wacunu ki Musi pelaela 2ki Arungu si lalalakeini, “Kunumi madha kudrukudrulru ki saniange ka naganeli, dradrela tukucingalre marasikai kwini sapatarumarane nakwane ki swa Iseraylri. Kunaku Tamatamaku. 3Ikai ki mwabaibalrithi numiane, sanaka aneanenga la ikai ki kakudhane ka kaika mabula si adeethe ki sapatarumarane nakwane ki swa Iseraylri, kwini lasu kai lri maka peelanga ikai ki tapatarumaramaraneli marasikai nakwane. Ku mwabaibalrithi numiane lrika palralrawthu pasusu kikai kakudhane. Tamatamaku.
4“Ikai ki mwabaibalrithi ki Arungu, sanaka aneane ku maraibiu ku pakatwase ku bulu lu apece ku umawmase lri pakela ku taka bulane ala lri maka kane kwini tinusaniange ka sapatarumarane. Ku barakalai alaiyasi ka amanini ku pakatwase ku bulu lu apece, ku wasulrape ki kiaelrenga ki wapacai si kaika mabulanga ka lamanemane, la kielre ki pakatwase ku bulu saapece, 5si drumane ka kaika mabula ka waudriwdripi si umawmase, amani ku kaika mabulanga. 6Ku barakalai sana kaika mabulanga lri pakela ki miauawbu ka kaika mabula. Kwini lasu lri tara sikelre ala lri maka kane ku saniange ka sapatarumarane. 7Sana lriwgunga ku vai, kwi lasu mabulanga, lri dulru kane ku kitudrulruini ku saniange ka sapatarumarane; kwini amani ku akaneaneini. 8Kai lri maka kane ku ngiakakamani pacai, ku kiakace si pacai ka waudriwdripi. Amani lu kisaela ki makudrulru. Tamatamaku.
9“Sanaka barakalai lri tara pasusu makanaelre sanaka baaili pelaela ku kakudhane. Lu kai pia kwini, kwi lalasu yakai ku pasalrivane, lri tara paacai, asi lwiyane kwi lalasu twadreadrekase si kai pasusu ku saniange ka tukakudhaneli. Amaniaku ka pakasaniange liniane ka Tamatama.
10“Kathane ku wacekecekele ki barakalai ku lri maka kane ku saniange ka sapatarumarane; ku drumane kai lri maka kane, adravane ka yakai ki daane ki barakalai ku umawmase ku mwalrawlrau mialri kai lri maka kane. 11Ai ku duri ki barakalai, adravane ka nilangadhane ara paisu ku kiatulalake ikai ki daaneini, lri maka kane ku kitudrulru ki barakalai. 12Ku lalake ki barakalai ku labaibai alaiyasi karudrange mwa ki kaika barakalai ka lakawkawlu kai lri maka kane ku saniange ku sapatarumarane. 13Ai ku labaibai ka lalake ki barakalai alaiyasi ka walibakane lu makakatwase ki tawaneini, laka kadrwa ku lalalake si siwlri mutavanane, lri maka kane kwini kitudrulru ki tamaini kwini akaneane. Kathane ku wacekecekele ki barakalai kulri maka kane ku sapatarumarane.
14“Ku langumawmawmase alaiyasi kaika pwalringalringau la kane ku saniange ku sapatarumarane, lri singikai ku naika taingeane ki nipau lrimane si sawlri baai ki barakalai. 15-16Ku barakalai madha pakane ki mapapangale capange ku saniange ku sapatarumarane si kudrulru ki sapatarumarane; kikai lri papasalriu kwini ki umawmase, si kipathavungu. Amaniaku ka pakasaniange kwini ki sapatarumarane ka Tamatama.”
17Ku Tamatama wacunu ki Musi, 18papia ki Arungu, ki lalalakeini, si mapapangale ki swa Iseraylri iya kai, “Ku swa Iseraylri si yakai liniane ku singibadhane, sanaka patarwamara ku Lama ka lrisi, adravane ka pangiamia ku kiketeketeini ku ngikakamanini, lri tara patarumara ku mwadringadringai ku niculwane. 19Kunumi patarumara ku mwadringadringai ku sawvalai ku lwange, balase ka nikiubawbalane ka kiu ku balase ka kiu lri kikiragai kitarumara. 20Lu patarumara numi ku kaika mwadringadringai ku satulrisiane ka nilapulapwane, ku Tamatama kai lri kiragai tarumara. 21Adravane ka aneane, kulri pangimia ku kiketeketeini ku ngiakakamani patarumara ku Sulivatane ka lrisi baai ki Tamatama, lri tara patarumara ku mwadringadringai ku niculwane ala lri kikiragai kitarumara. 22Madha malra ku mamukici, mapiapilai, kai kiatulrepenge ku kinawmasane, madula ku lrangici, ku mwabalrake, ku makuvingi ku satulrisiane ka nilapulapwane si patarumara ki Tamatama. Madha patarumara ku miyaiya kai ku satulrisiane ka nilapulapwane si ikai ki tapatarumaramarane tu Apwi ka lrisi baai ki Tamatama. 23Lri maka patarumara numi ku kaika kiatulrepenge ku tacebeane ku kaika mathariri ku tangimiane ku sawvalai ka lwange ku lrulai ka nikiubawbalane ka kiu tungiakakamaniane tulrisi, ai kikai miyaiya kai ku satulrisiane ka nilapulapwane madha tusapangimiane ku takiketeketane patarumara. 24Madha malra kwidra duladula ku karithiri, ku kiadrepete si kaburau, yakai ku bakici, ku kiagelregelre ku satulrisiane ka nilapulapwane si patarumara baai ki Tamatama. Ikai ki cekele numi kaika nipalraingane ikai ku miyaiya kikai.
25“Ku nikibaadhane twalai ki maelane ka kuni ku waudriwdripi, kunumi madha tuakaneane si patarumara baai ki Twaumase, ku miyaiya kai ku waudriwdripi kia tu kaimwadringadringai, kai lri kikiragai kitarumara ki Tamatama.”
26Ku Tamatama wacunu ki Musi iya kai, 27“Ku tau kitulalake ku lrulai ka sawvalai ka lwange, lrulai ka nikiubawbalane ka kiu, ku lrulai ka kiu, ikai kwini ki nimakapitulane madha pakidaidaili ki tina ka lwange ki tina ka kiu, lu makavalrulunga, lri dulru tu Apwi ka lrisi si patarumara ki Tamatama. 28Madha apasilasilange ivaivai malra kwini tina ka lwange si lrulai ka lwange, tina ka nikiubawbalane ka kiu si lrulai ka nikiubawbalane ka kiu, tina ka kiu si lrulai ka kiu tusapatarumarane. 29Lu patarumara ku sakiaseasenane ki Tamatama, si singikai ku kakudhane lri kikiragai kitarumara. 30Kunumi ikaiya kwini ki vaivai kane eleme kwini satulrisiane ka beate, madha pukaiyaiyane pakela ki mialrealre. Amaniaku ku Tamatama.
31“Kunumi pudriadringadha pasusu ku padradrekaseli; Tamatamaku. 32Kunumi madha tusinalremelreme ku saniange ka naganeli; ku mapapangale ki swa Iseraylri lri tara musakene nakwane tumabula. Amaniaku ka twasaniange numiane ka Tamatama; 33kunaku nawasangilukaku numiane katwase ka Izipiti, lri a Twaumasaku numiane. Tamatamaku.”
Currently Selected:
Lrivi 22: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
